నేను ఇద్దరు ఆడబిడ్డల తండ్రిని.. ‘దిశ’ ఘటనపై పవన్ సంచలన వ్యాఖ్యలు

0

శంషాబాద్ హత్యోదంతంపై జనసేన అధినేత పవన్ కళ్యాణ్ సంచలన వ్యాఖ్యలు చేశారు. సమాజంలో ధైర్యం లేకుండా పోయిందని ఆవేదన వ్యక్తం చేశారు. అందరం సమూహంలోనే ఉన్నాం కానీ.. ఒంటరిగా ఉన్నామన్నారు పవన్. సమాజంలో ధైర్యాన్ని తీసేశారని.. లేకుంటే నలుగురు ఉన్మాదులు రద్దీగా ఉండే రోడ్డు పక్కన ఒక ఆడబిడ్డను అత్యాచారం, హత్య చేసేవారా అని ప్రశ్నించారు.

‘నేను ఇద్దరు ఆడబిడ్డల తండ్రిని. నా బిడ్డలను బయటకు పంపిస్తే క్షేమంగా రావాలనుకుంటాను. దిశ ఘటనతో ఆ తల్లి ఏడుపు చూసి నాకు నిస్సహాయత వచ్చింది.’ అని పవన్ భావోద్వేగానికి గురయ్యారు. తాను కూడా అక్కచెల్లెళ్లతో పెరిగిన వాడినేనని.. ఆ భయం తనకు తెలుసని పవన్ వ్యాఖ్యానించారు. ఆడపిల్లను బయటకు పంపిస్తే ఇంటికి తిరిగొచ్చే వరకూ గుండె లబలబ అని కొట్టుకూనే ఉంటుందన్నారు. షూటింగ్‌కి వచ్చే జూనియర్ ఆర్టిస్టులను ఎవరైనా ఇబ్బందులు పెడితే కర్రపట్టుకునేవాడినని.. కొన్నిసార్లు తన కారులోనే పంపించేవాడినని అన్నారు.

మన ఆడబిడ్డల మానప్రాణాలను కాపాడుకోలేకపోతే 151 సీట్లు ఇచ్చి ఏం ఉపయోగమని ప్రశ్నించారు. నాయకులే బూతులు మాట్లాడితే సమాజం ఎలా తయారవుతుందో తెలుసుకోవాలని.. ఇష్టమొచ్చినట్లు ప్రవర్తిస్తారని ఆయన వ్యాఖ్యానించారు. దిశ నిందితులను సింగపూర్ తరహాలో శిక్షించాలని.. కర్ర పట్టుకుని తోలు ఊడేలా బహిరంగంగా శిక్షించాలని పవన్ అన్నారు. దారుణాలు జరిగాక ఉరి తీయడం కాదని.. జరగకుండా ఉండేలా శిక్షలు ఉండాలని అభిప్రాయపడ్డారు.

కర్నూలులో 2017లో పద్నాలుగేళ్ల పాప ఉరి వేసుకుని చనిపోయిందని చెప్పారని.. అయితే ఆ పాపపై అత్యాచారం చేసి చంపేసినట్లు వైద్యులు ధ్రువీకరించారని పవన్ అన్నారు. టీడీపీ హయాంలో జరిగిన ఈ ఘటనలో సాక్ష్యాలు ఒకలా.. వైద్యుల రిపోర్టు మరోలా ఉందని.. ఇంతవరకు ఆ పాపకు న్యాయం జరగలేదన్నారు. తెలుగుదేశానికి వ్యతిరేకంగా వెళ్తున్న జగన్.. ఈ కేసును ఎందుకు పట్టించుకోలేదని ప్రశ్నించారు. ఒక ఆడబిడ్డకు అన్యాయం జరిగితే ప్రశ్నించలేని వారు నాయకులా అని నిలదీశారు.




Please Read Disclaimer