వివేకా హత్య.. విశాఖలో జగన్‌పై పవన్ ఆసక్తికర వ్యాఖ్యలు

0

విశాఖపట్నంలో గాజువాక నియోజకవర్గం నుంచి పోటీచేస్తోన్న జనసేన అధినేత పవన్ కల్యాణ్ గురువారం నామినేషన్ దాఖలు చేసి, ఎన్నికల ప్రచారం ప్రారంభించారు. భీమిలి నియోజకవర్గంలోని ఆనందపురంలో నిర్వహించిన బహిరంగ సభలో పవన్ మాట్లాడుతూ వైసీపీ అధినేత జగన్, ముఖ్యమంత్రి చంద్రబాబుపై విమర్శలు గుప్పించారు. ముఖ్యంగా వైఎస్ వివేకా హత్య గురించి జగన్‌ను ఉద్దేశించి ఆసక్తికర వ్యాఖ్యలు చేశారు. జగన్మోహన్ రెడ్డి తన సొంత చిన్నాన్న హత్యకు గురైతే దాని గురించి ఎందుకు మాట్లాడటం లేదని పవన్ ప్రశ్నించారు. ఒక పార్టీకి అధ్యక్షుడిగా ఉండి, రాష్ట్రానికి ముఖ్యమంత్రి కావాలనుకుంటున్న వ్యక్తి తన సొంత బాబాయి హత్యకు గురైతే దాని గురించి ఎందుకు మాట్లాడడం లేదని, అది మీకు తెలియదా? నేనైతే నమ్మడంలేదని జనసేనాని వ్యాఖ్యానించారు.

అంతేకాదు ఈ హత్య ఎలా జరిగిందో ఇప్పటికీ తెలియలేదని, ఎవరో కిరాయి హంతకులు చేశారని, ఆధారాలు చెరిపేశారని అంటున్నారు. సొంత మనిషి చనిపోయినా అదేమంత పెద్ద విషయం కాదన్నట్టుగా వ్యవహరిస్తున్నారని పేర్కొన్నారు. రేపు ఈ విధంగా విశాఖలో ఎవరైనా హత్యకు గురైతే పట్టించుకుంటారా? అని పవన్ నిలదీశారు. విశాఖ సౌత్ దక్షిణ నియోజకవర్గంలో వైసీపీ ఇంఛార్జ్‌ కోలా గురువులతో రూ. కోట్లు ఖర్చు పెట్టించి చివరకు అతడికి టికెట్‌ ఇవ్వలేదని ఆరోపించారు.

ప్రభుత్వ భూముల్ని టీడీపీ నేతలు అడ్డగోలుగా దోచేశారని, ప్రజా ప్రతినిధులపై, మంత్రి గంటాపైనా ముఖ్యమంత్రి చంద్రబాబు పట్టుకోల్పాయారని దుయ్యబట్టారు. విశాఖ భూకబ్జాలపై వేసిన సిట్‌ నివేదిక ఎక్కడుందో సీఎం సమాధానం చెప్పాలని పవన్ డిమాండ్‌ చేశారు. గత ఎన్నికల్లో రూ. 40 కోట్లు ఖర్చుపెట్టి గెలిచిన గంటా రూ. 400 కోట్లు దోచుకుందామని భావించారని, ఓటమి భయంతోనే ఆయన భీమిలి నుంచి పారిపోయారని ధ్వజమెత్తారు. ఆంధ్రావాళ్లను దోపిడీదారులని కేసీఆర్ అంటుంటే ఒక్కరూ ఎందుకు నోరు విప్పడంలేదని నిలదీశారు. గతంలో వరంగల్‌లో సభ పెట్టిన వ్యక్తిపై రాళ్లు వేయించి ఇప్పుడు అదే వ్యక్తికి ఆయన మద్దతు పలుకుతున్నారని కేసీఆర్, జగన్‌లను ఉద్దేశించి పరోక్షంగా వ్యాఖ్యానించారు. ఒకవేళ రిటర్న్‌ గిఫ్ట్‌ ఇవ్వాలనుకుంటే రాజమార్గంలో ఆంధ్రకు వచ్చి పోటీ చేయాలని టీఆర్‌ఎస్‌కు సూచించారు.




Please Read Disclaimer