స్మార్ట్‌ఫోన్ యూజర్లకు SBI స్ట్రాంగ్ వార్నింగ్.. అలా చేయొద్దంటూ హెచ్చరిక.. లేదంటే..

0

దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తన కస్టమర్లను హెచ్చరిస్తోంది. స్మార్ట్‌ఫోన్స్‌కు చార్జింగ్ పెట్టుకునే సమయంలో జాగ్రత్తగా ఉండాలని సూచిస్తోంది. మోసగాళ్లు మాల్వేర్‌బైట్స్‌ ద్వారా సమాచారం తస్కరించే అవకాశముందని హెచ్చరించింది.

పబ్లిక్ ఎక్కువగా ఉన్న ప్రాంతాల్లో స్మార్ట్‌ఫోన్‌కు చార్జింగ్ పెట్టేటప్పుడు అప్రమత్తంగా ఉండాలని సూచించింది. మోసగాళ్లు లేదా హ్యాకర్లు మాల్వేర్ సాయంతో మీ ఫోన్‌‌లోని డేటా తస్కరించొచ్చని హెచ్చరించింది. ఈ విధంగా బ్యాంక్ అకౌంట్ వివరాలు కూడా హ్యాకర్ల చేతిలోకి వెళ్లొచ్చని పేర్కొంది.

సైబర్ క్రైమ్ నిపుణుల ప్రకారం.. మాల్వేర్, ఫిషింగ్, అల్గరిథమ్ వంటి వాటి సాయంతో స్మార్ట్‌ఫోన్‌ నుంచి వివరాలు కొట్టేసే ప్రమాదముంది. ఆటో డేటా ట్రాన్స్‌ఫర్ డివైజ్ ద్వారా హ్యాకర్ల ఈ పని పూర్తి చేస్తారని నిపుణులు పేర్కొంటున్నారు. ఇవి 300 నుంచి 400 డాలర్లకు అలీబాబా వెబ్‌సైట్‌లో అందుబాటులో ఉన్నాయని తెలిపారు.

మొబైల్ చార్జింగ్ స్టేషన్స్ ద్వారా ఏ విధంగా ఆన్‌లైన్ మోసాలు జరుగుతాయో హెచ్చరిస్తూ ఎస్‌బీఐ ట్వీట్ చేసింది. ‘చార్జింగ్ స్టేషన్స్‌లో ఫోన్‌కు చార్జింగ్ పెట్టుకునే సమయంలో ఒకటికి రెండు సార్లు ఆలోచించండి. మీ ఫోన్‌పై మాల్వేర్ దాడి చేయొచ్చు. దీంతో హ్యాకర్లు మీ ఫోన్ డేటాను తస్కరించే ప్రమాదముంది’ అని ఎస్‌బీఐ పేర్కొంది.

‘హ్యాకర్లు లేదా ఆన్‌లైన్ మోసాలకు పాల్పడేవారు ప్లగ్ ఇన్ కార్డు ఉపయోగిస్తారు. వీటిని ఆటో డేటా ట్రాన్స్‌ఫర్ డివైజ్ అని కూడా పిలుస్తారు. చార్జింగ్ స్టేషన్‌లో వీటి ద్వారా ఫోన్‌కు చార్జింగ్ పెట్టినప్పుడు ఒక పాపప్ మెసేజ్ వస్తుంది. చాలా మంది దీన్ని చదవరు. ఓకే కొట్టేస్తారు. ఇక్కడి నుంచే డేటా తస్కరణ ప్రారంభమౌతుంది’ అని న్యూఢిల్లీకి చెందిన సైబర్ క్రైమ్ నిపుణులు ఒకరు వివరించారు.

ఈ మోసాల బారిన పడకుండా ఉండాలంటే స్మార్ట్‌ఫోన్‌లో యాంటి మాల్వేర్ సాఫ్ట్‌వేర్ ఇన్‌స్టాల్ చేసుకోవాలని నిపుణులు సూచిస్తున్నారు. అలాగే మల్టీ కేబుల్ ద్వారా చార్జింగ్ పెట్టుకోవద్దని పేర్కొన్నారు. అలాగే సొంత చార్జర్‌తోనే ఫోన్‌కు చార్జింగ్ పెట్టుకునేందుకు ప్రయత్నించాలని తెలిపారు. లేదంటే ఒక పవర బ్యాంక్ వెంటపెట్టుకోవడం మంచిదని పేర్కొన్నారు.




Please Read Disclaimer