ప్లాస్టిక్ రహిత తిరుమల.. భక్తులకు షాక్ ఇస్తున్న లడ్డూ బ్యాగుల ధర!

0

ఇల వైకుంఠం తిరుమల ప్రకృతి రమణీయతకు కూడా ఆలవాలం. ఎన్నో జీవరాశులకు ఆలవాలమైన తిరుమలను ప్లాస్టిక్ రహితంగా తీర్చిదిద్దాలని తిరుమల తిరుపతి దేవస్థానం నిర్ణయించింది. ఆ దిశగా చర్యలు తీసుకుంటున్న దేవస్థానం మరో ముందడుగు అడుగు వేసింది. కలియుగ వైకుంఠాన్ని ప్లాస్టిక్ రహితంగా తీర్చదిద్దే ప్రణాళికలో భాగంగా లడ్డూ కవర్ల విషయంలో నిర్ణయం తీసుకుంది. ప్లాస్టిక్‌ కవర్ల వినియోగాన్ని తగ్గించేందుకు లడ్డు, ఇతర ప్రసాదాలను తీసుకెళ్లేందుకు భక్తులకు జ్యూట్‌ బ్యాగులను అందుబాటులోకి తీసుకొచ్చింది. శ్రీవారి దర్శనం కోసం వెళ్లే భక్తులకు బార్‌ కోడ్‌ విధానం ద్వారా లడ్డూలు అందిస్తామని.. దర్శనం చేసుకున్న వారికే లడ్డూ ప్రసాదం అందజేస్తామని టీటీడీ గతంలోనే ప్రకటించింది.

దీనికి కొనసాగింపుగా ప్లాస్టిక్ కవర్లను నిషేధించింది. వాటికి ప్రత్యామ్నాయంగా జూట్ బ్యాగులు, పేపర్‌ బాక్స్‌లను ప్రవేశపెట్టారు. అయితే, వీటి ధరలు మాత్రం భక్తులకు షాక్ ఇస్తున్నాయి. ప్లాస్టిక్ కవర్లకు బదులు పర్యావరణ అనుకూలమైన ఈ బ్యాగులు 5 లడ్డూలు సామర్థ్యం రూ.25, పది లడ్డూలది రూ.30, 15 లడ్డూలది రూ.35, 25 లడ్డులది రూ.55గా నిర్ణయించారు. ఇక, అట్టపెట్టలు ఒక లడ్డూది రూ.3, రెండు లడ్డూలది రూ.5, నాలుగు లడ్డూలది రూ.10గా ధరల పట్టికలో పేర్కొన్నారు.

అట్టపెట్టెలను గతేడాది నవంబరులోనే తీసుకురావాలని టీటీడీ భావించింది. అయితే ఈ విధానం వల్ల టీటీడీ ఆదాయానికి గండిపడే ప్రమాదం ఉండటంతో జ్యూట్ బ్యాగులను కూడా అందుబాటులోకి తెచ్చింది. ప్లాస్టిక్ కవర్లలో లడ్డూలు పంపిణీ చేసినప్పుడు ఎక్కువ లడ్డూలు కొనుగోలు చేసిన భక్తులు వాటిని తీసుకెళ్లేందుకు కవర్లను డబ్బులు పెట్టి కొనుగోలు చేసేవారు. జ్యూట్ బ్యాగులు, లడ్డూలు బాక్సుల్లో పెట్టడం వల్ల వాటి నాణ్యతలో ఎలాంటి మార్పు ఉండబోదని టీటీడీ తెలిపింది. పేపర్ బాక్సుల్లో లడ్డూ సుమారు పది రోజుల పాటు తాజాగా ఉంటుందని తెలిపారు. టీటీడీ రోజుకు సుమారు 10వేలకుపైగా ప్లాస్టిక్ కవర్లను భక్తులకు అందజేస్తోంది.. వాటి స్థానంలో పేపర్ బాక్సులు, జ్యూట్ బ్యాగులను తీసుకొచ్చారు.




Please Read Disclaimer