పాము, గబ్బిలాలతో కలిసి కరోనా కొత్త వైరస్..!

0

ప్రాణాంతక కరోనా వైరస్ ప్రపంచాన్ని వణికిస్తోంది. చైనాలో పుట్టిన ఈ ప్రాణాంతక వైరస్ ఇప్పటికే 132 మందిని బలితీసుకుంది. బుధవారం (జనవరి 29) నాటికి ఈ వైరస్ లక్షణాలతో 6 వేల మందికి పైగా చికిత్స పొందుతున్నట్లు చైనా అధికార వర్గాలు వెల్లడించాయి. ఈ వైరస్ బారిన పడుతున్న వారి సంఖ్య రోజు రోజుకు రెట్టింపు అవుతుండటం ఆందోళన కలిగించే అంశం. సోమవారం నాటికి 2835 కేసులు నమోదవ్వగా.. మంగళవారం నాటికి దాదాపుగా అవి రెట్టింపయ్యాయి. బుధవారం ఒక్క రోజే 1500 కొత్త కేసులు నమోదవడం పరిస్థితి తీవ్రతకు అద్దం పడుతోంది.

కరోనా వైరస్ బారిన పడి రోజుకు 10 మంది ప్రాణాలు కోల్పోతున్నారు. చైనాతో పాటు 16 దేశాలకు కరోనా వైరస్ వ్యాపించింది. దీంతో భారత్‌లోనూ ముందు జాగ్రత్త చర్యలు చేపట్టారు. ఈ నేపథ్యంలో అసలు కరోనా వైరస్ ఏంటి? తొలిసారిగా ఎలా వ్యాప్తి చెందింది? దానికి ఆ పేరు ఎలా వచ్చింది? తదితర వివరాలు పరిశీలిద్దాం..

లాటిన్‌లో కరోనా అంటే ‘కిరీటం’ అని అర్థం. మైక్రోస్కోప్‌లో చూసినప్పుడు ఈ వైరస్ కిరీటం ఆకృతిలో ఉండటంతో ఆ పేరు పెట్టారు. శ్వాస వ్యవస్థపై తీవ్ర ప్రభావం చూపే ఈ వైరస్‌ను 1960లలో కనుగొన్నారు. ఇప్పటి వరకూ 6 రకాల కరోనా వైరస్‌లను గుర్తించారు. అయితే.. ఇవి ఎక్కువగా పక్షులు, క్షీరదాలపై ప్రభావం చూపించేవి.

కానీ, తాజాగా వ్యాపిస్తున్న కరోనా వైరస్ మనుషులపై తీవ్ర ప్రభావం చూపుతోంది. తాజా వైరస్ గబ్బిలాల్లో కనిపించే కరోనా వైరస్, పాములో ఉన్న వైరస్‌తో కలసి కొత్తగా పుట్టిందని పరిశోధకులు గుర్తించారు. దీనికి 2019 నావెల్ కరోనా వైరస్ అని పేరు పెట్టారు.

తొలిసారిగా ఇలా వ్యాప్తి..
చైనాలోని ఉహాన్‌లో ఓ అక్రమ జంతు విక్రయ కేంద్రం నుంచి తొలిసారిగా కరోనా వైరస్ మనుషులకు వ్యాప్తి చెందినట్లు గుర్తించారు. ఈ వైరస్ విరుగుడుకు ఇప్పటివరకు సరైన వ్యాక్సిన్ లేకపోవడం మరింత ఆందోళన కలిగించే అంశం. ఉహాన్‌లో వెలుగులోకి వచ్చిన ఈ వైరస్ క్రమంగా చైనాలోని అన్ని ప్రాంతాలకు వ్యాపిస్తోంది.

థాయిలాండ్‌లో 8 కేసులు, అమెరికా, ఆస్ట్రేలియా, సింగపూర్, థైవాన్‌లో ఐదేసి కేసులు, మలేషియా, దక్షిణ కొరియా, జపాన్ దేశాల్లో నాలుగేసి కేసులు, ఫ్రాన్స్‌లో 3 కేసులు, వియత్నాంలో 2 కేసులు, నేపాల్, కెనడా, కాంబోడియా, శ్రీలంక, జర్మనీలో ఒక్కో కేసు చొప్పున నమోదయ్యాయి.

కరోనా వైరస్ వేగంగా వ్యాపిస్తుండటంతో చైనాలో పరిస్థితి భయానకంగా మారింది. ఉహాన్ నగరానికి రాకపోకలు పూర్తిగా నిలిపేశారు. అత్యవసర వాహనాలు తప్ప ఇతర వాహనాలను అనుమతించట్లేదు. సుమారు 11 మిలియన్ల మంది నిర్బంధంలో ఉన్నారు. అనుమానితులను ఆస్పత్రుల్లో ఉంచి చికిత్స అందిస్తున్నారు. మరోవైపు చైనాలో ఉన్న తమ వారిని వెనక్కి రప్పించుకోవడానికి వివిధ దేశాలు చర్యలు ప్రారంభించాయి. భారత్, జపాన్ సహా పలు దేశాలు ప్రత్యేక విమానాలను పంపించి తమవారిని వెనక్కి తీసుకువచ్చే ప్రయత్నాలు ప్రారంభించాయి.




Please Read Disclaimer