కరుస్తుందనుకున్న కుక్క నలుగురిని కాపాడి ప్రాణ త్యాగం.. ప్రకాశంలో కదిలించే ఘటన

0

నలుగురు గొర్రెల కాపర్లు తమ మేకలను తోడ్కొని అటుగా వెళ్తుంటే ఓ వీధి కుక్క అడ్డుగా వచ్చింది. అదే పనిగా అరిచింది. తమపై దాడి చేస్తుందేమోనని వారు భయపడ్డారు. కుక్కను తరమడానికి ముందుకు కదిలారు. మేకల మంద ముందుకు వెళ్లి చూడగా.. అక్కడ ఓ మేక విగతజీవిగా పడి ఉంది. ఆ పక్కనే కరెంట్ స్తంభం నుంచి తెగిపడి వేలాడుతున్న ఓ వైరు ఉంది. అప్పటిగానీ ఆ గొర్రెల కాపర్లకు అసలు విషయం అర్థం కాలేదు.

తెగి పడిన కరెంట్ తీగలో విద్యుత్ ప్రసారం అవుతున్న విషయాన్ని గమనించిన గొర్రెల కాపర్లు.. గుంపుగా అటువైపు దూసుకొస్తున్న తమ మేకలను వెనక్కి తరిమారు. ఆ శునకం పెద్దగా అరుస్తూ వారికి సహాయపడింది. కానీ, మేకలను కాపాడే యత్నంలో ప్రమాదవశాత్తూ కరెంట్ తీగకు తగిలి చూస్తుండగానే అది ప్రాణాలు కోల్పోయింది. ఆ దృశ్యం చూసి గొర్రెల కాపర్ల గుండె చెరువైంది. ఈ హృదయ విదారక ఘటన ప్రకాశం జిల్లా అర్థవీడు మండలం అయ్యవారిపల్లిలో శుక్రవారం (జులై 28) మధ్యాహ్నం చోటుచేసుకుంది.

అర్థవీడు మండలం అయ్యవారిపల్లి పంచాయతీ చిలుకానగర్‌ కాలనీలో 10 కుటుంబాలు నివసిస్తున్నాయి. వీరందరూ మేకలను పెంచుకొని జీవనం సాగిస్తున్నారు. శుక్రవారం ఉదయం నలుగురు కాపర్లు మేకల మందను తోడ్కొని భైరవుని కొండ ప్రాంతం వైపు కదిలారు.మార్గమధ్యలోని తిప్పల సమీపానికి చేరుకోగానే మేకలన్నీ మేత కోసం పరుగులు తీశాయి. వాటి కాపర్లు మాటల్లో పడి నెమ్మదిగా వస్తూ వెనుకబడి పోయారు.

కుక్క అడ్డుకోకపోతే మేకలు వందల సంఖ్యలో మృత్యువాత పడేవి. దేవుడిలా వచ్చి తమను, తమ జీవాలను కాపాడిన ఆ శునకానికి కాపర్లు మనసులోనే కృత‌జ్ఞత చెప్పుకున్నారు. బతుకుజీవుడా అంటూ అక్కడ నుంచి బయటపడ్డారు. ఈ విషయం ఈ నోటా ఆ నోటా నలిగి స్థానికంగా చర్చనీయాంశంగా మారింది.

గాలివానకు కూలిన విద్యుత్ స్తంభం..
ఇటీవల కురిసిన వర్షాలకు 11 కేవీ విద్యుత్తు స్తంభం నేలకూలింది. కానీ, ఆ విషయాన్ని ఎవరూ గుర్తించలేదు. రెండు, మూడు రోజులుగా ఆ తీగలో విద్యుత్‌ ప్రసరణ జరుగుతోంది. దీంతో మందలోని ఓ మేక కరెంటు తీగకు తగిలి మృతి చెందింది. దీన్ని గమనించిన కుక్క మిగిలిన మేకలు అటువైపు వెళ్లకుండా అడ్డుపడింది.

ఆ శునకం లేకపోయి ఉంటే తాము కరెంటు తీగకు తగిలి ప్రాణాలు విడిచే వారమని కాపర్లు తెలిపారు. స్తంభం కూలి విద్యుత్తు ప్రసరణ జరుగుతున్నా అధికారులు పట్టించుకోవడం లేదని ఆవేదన వ్యక్తం చేశారు.

విద్యుత్ స్తంభం కూలిందని తమకు ఎలాంటి ఫిర్యాదు అందలేదని సంబంధిత అధికారులు చెబుతున్నారు. తక్షణమే చర్యలకు ఉపక్రమించినట్లు తెలిపారు. వర్షా కాలంలో అప్రమత్తంగా ఉండాలని సూచించారు.




Please Read Disclaimer