అమరావతి ఇన్‌సైడర్ ట్రేడింగ్.. వైసీపీకి టీడీపీ ఛాలెంజ్; మీవాళ్లు కొన్న భూములివిగో..

0

అమరావతిలో ఇన్‌సైడర్ ట్రేడింగ్ జరిగిందంటూ.. వైఎస్సార్సీపీ వీడియో రిలీజ్ చేయగా.. కాసేపటికే టీడీపీ దానికి కౌంటర్ ఇచ్చింది. అమరావతిలో ఇన్‌సైడర్ ట్రేండింగ్ జరిగిందని నిరూపించడానికి జ్యుడీషియల్ ఎంక్వైరీ వేయాలని టీడీపీ నేత బోండా ఉమ ప్రభుత్వాన్ని సవాల్ చేశారు. వైఎస్సార్సీపీ నేతలు ఇష్టానుసారంగా మాట్లాడుతున్నారని మండిపడ్డారు. 4096 ఎకరాల్లో ఇన్‌సైడర్ ట్రేడింగ్ జరిగిందంటున్నారు… ఈ విషయంలో ఎలాంటి విచారణకైనా మేం సిద్ధంగా ఉన్నామన్నారు. డాక్యుమెంట్లు తీసుకొని ఇప్పుడే వస్తాం.. తాడేపల్లిలోని మీ పార్టీ ఆఫీసులోనే తేల్చుకుందాం అని వైఎస్సార్సీపీ నేతలకు బోండా ఉమ సవాల్ విసిరారు. మీడియా సాక్షిగానే చర్చిద్దాం అన్నారు.

‘‘వేమూరి రవి అనే వ్యక్తి నారా లోకేశ్ బినామీ అని వైఎస్సార్సీపీ నేతలు అంటున్నారు. కానీ ఆయనో ఎన్నారై.. 2004లోనే అమరావతిలో ఆరెకరాల భూమి కొనుగోలు చేశారు. 2014లో దాని పక్కనే మరో ఏడెకరాలు కొనుగోలు చేశారు. కానీ ఆయన్ను లోకేశ్ బినామీ అంటూ తప్పుడు ప్రచారం చేస్తున్నార’’ని బోండా ఉమ స్పష్టం చేశారు.

‘‘బాలయ్య వియ్యంకుడు ఎమ్మెల్సీ రామారావు పరిశ్రమ కోసం దరఖాస్తు చేస్తే.. 2013లో కాంగ్రెస్ ప్రభుత్వం జగ్గయ్యపేట సమీపంలోని జయంతిపురంలో భూములు ఇచ్చింది. ఆ భూములను ఇప్పటికీ తమకు ఇవ్వలేదని.. డబ్బులు తిరిగి ఇవ్వాలని రామారావు గారి అబ్బాయి భరత్ స్పష్టంగా చెప్పారు. కానీ బాలయ్య వియ్యంకుడికి చంద్రబాబు 500 ఎకరాలను ఉచితంగా కట్టబెట్టారని ప్రచారం చేస్తున్నారు. కిరణ్ కుమార్ రెడ్డి హయాంలో వేల ఎకరాల భూములను పరిశ్రమలకు ఇచ్చారు’’ అని టీడీపీ మాజీ ఎమ్మెల్యే తెలిపారు.

హెరిటేజ్ అనేది పబ్లిక్ లిమిటెడ్ కంపెనీ. చట్టం ప్రకారం ఈ సంస్థ సెంటు భూమి కొనుగోలు చేయాలన్నా నిబంధనలు పాటించాలని బోండా ఉమ తెలిపారు. 2013 మార్చిలో.. ఐదు చోట్ల హెరిటేజ్ ఫుడ్స్ భూములు కొనుగోలు చేస్తున్నట్టు చెప్పింది. కంతురూరు గ్రామంలో హెరిటేజ్ భూములు కొనుగోలు చేసింది.. రాజధాని పరిధిలోని 19 గ్రామాల్లో ఈ సంస్థ కొనుగోలు చేయలేదన్నారు.

వైసీపీ వాళ్లు ఇచ్చి జాబితా పరిశీలిస్తే.. 2004 నుంచి కూడా మొత్తం 50 ఎకరాలు లేదు. కానీ 4 వేల ఎకరాలు ఇన్‌సైడర్ ట్రేడింగ్ జరిగిందంటున్నారని ఉమ తెలిపారు. గతంలో మీరు క్విడ్ ప్రొ క్రో చేశారు. కాబట్టి దీనికి ఇన్‌సైడర్ ట్రేడింగ్ అని పేరు పెట్టారని టీడీపీ నేత ఆరోపించారు.

అమరావతి ప్రాంతంలో వైఎస్సార్సీపీ నేతలు కూడా భూములు కొనుగోలు చేశారన్నారు. ఎన్నికల అఫిడవిట్లో పేర్కొన్న వివరాల ప్రకారం.. మంగళగిరి ఎమ్మెల్యే ఆళ్ల రామకృష్ణారెడ్డి తన భార్య పేరిట ఐదెకరాల భూమి కొనుగోలు చేశారు. పెదకూరపాడు ఎమ్మెల్యే నంబూరు శంకర్ రావు కూడా ఐదెకరాల భూమి కొనుగోలు చేశారు. ఎమ్మెల్యే బ్రహ్మ నాయుడికి 35 ఎకరాల భూమి ఉంది. తాడికొండ ఎమ్మెల్యే శ్రీదేవి భర్త పేరిట రెండెకరాల భూమి కొనుగోలు చేశారు. గుంటూరు-2 ఎమ్మెల్యే అభ్యర్థిగా పోటీ చేసిన ఏసురత్నంకి భారీగా భూములు ఉన్నాయి. ఇవన్నీ మీ కంటికి కనిపించడం లేదా..? అని బోండా ఉమ ప్రశ్నించారు.

‘2014 జూన్ నుంచి డిసెంబర్ వరకు కృష్ణా, గుంటూరు జిల్లాల్లో రిజిస్ట్రేషన్ అయిన భూములు మొత్తం 4068 ఎకరాలుగా లెక్క తేల్చారు. ఇవన్నీ టీడీపీ వాళ్లు కొనుగోలు చేశారంటున్నారు. ప్రభుత్వం నుంచి ముందుగానే సమాచారం లీక్ చేశారంటున్నారు. కానీ ఎలా లీక్ అవుతుంది.. రైతుల కోరిక మేరకే రిజిస్ట్రేషన్లు ఆపలేదు. ప్రభుత్వానికి పూర్తిగా సహకరిస్తామని రైతులు చెప్పారు. ఇప్పటికీ రైతులు అదే చెబుతున్నార’ని బోండా ఉమ తెలిపారు.




Please Read Disclaimer