‘విశాఖ జోన్.. ఏపీ ప్రజలు ఆవును కోరితే కేంద్రం ఎద్దును ఇచ్చింది’

0

మూడు రోజుల కిందట లోక్‌సభలో ఏపీకి విభజన హామీలపై మాట్లాడిన టీడీపీ యువ ఎంపీ రామ్మోహన్ నాయుడు కేంద్రంలోని బీజేపీ సర్కారుపై విరుచుకుపడిన విషయం తెలిసిందే. బీజేపీ పాలిత రాష్ట్రాలపైనే కేంద్రం ప్రేమ చూపుతోందని ధ్వజమెత్తిన ఆయన, తాజాగా రైల్వే జోన్ విషయంలో మరోసారి గళమెత్తారు.

విశాఖపట్నం రైల్వేజోన్‌ విషయంలో ఆంధ్రప్రదేశ్ ప్రజలు ఆవు కావాలని డిమాండు చేస్తే కేంద్రం ఎద్దును ఇచ్చిందని రామ్మోహన్ ఎద్దేవా చేశారు. గురువారం లోక్‌సభలో రైల్వే పద్దులపై చర్చలో భాగంగా ఆయన మాట్లాడుతూ.. ఎన్డీఏ సర్కారును తూర్పారబట్టారు. వాల్తేరు, విజయవాడ, గుంతకల్లు, గుంటూరు డివిజన్లు కలిపి వాల్తేరు డివిజన్‌ ప్రధాన కార్యాలయంగా జోన్‌ ఏర్పాటుచేయాలని కోరితే కేంద్రం వాల్తేరు డివిజన్‌ను మూసేయాలని చూస్తోందని ఆయన ఆరోపించారు.

శ్రీకాకుళం జిల్లాలోని పలాస నుంచి ఇచ్ఛాపురం వరకు 4స్టేషన్లు కొత్తజోన్‌లో చేర్చాలని రామ్మోహన్ డిమాండ్ చేశారు. అలాగే బడ్జెట్‌లో విశాఖ, విజయవాడ మెట్రోల ఊసే లేకపోవడం బాధాకరమని వ్యాఖ్యానించారు. రాష్ట్రంలో 80 కొత్తలైన్లు, 50 డంబ్లింగ్‌ పనులు చేపట్టాల్సి ఉందని టీడీపీ ఎంపీ పేర్కొన్నారు. జులై 9న లోక్‌సభలో తనకు నాలుగు నిమిషాలపాటే సమయం కావాలని కోరిన రామ్మోహన్ నాయుడు తన ప్రసంగంతో ఆకట్టుకున్నారు. ఏపీ ఆర్థిక సంక్షోభాన్ని ఎదుర్కొటోందని, తమకు న్యాయం చేయాలని డిమాండ్ చేసే హక్కు ఉందని అన్నారు. దేశాభివృద్ధి అంటే గుజరాత్‌ ఒక్కటేనా? అని మండిపడ్డ ఆయన సమాఖ్య స్ఫూర్తి గురించి మాట్లాడే అర్హత మోదీ సర్కారుకు లేదన్నారు. విభజనతో నష్టపోయిన ఏపీకి న్యాయం చేయాలని కోరుతున్నా పట్టించుకోని కేంద్రం.. అభివృద్ధిలో ముందున్న గుజరాత్ రాష్ట్రంపైనే కేంద్రం ఆపేక్ష చూపిస్తోందని రామ్మోహన్‌ ఆరోపించారు.

గుజరాత్‌ ఇంటర్నేషనల్‌ ఫైనాన్స్‌ సర్వీస్‌ సెంటర్‌లో పెట్టుబడులు పెట్టేందుకు వీలుగా పన్ను రాయితీలు కల్పిస్తున్నారని తెలిపారు. ఏపీ న్యాయమైన డిమాండ్లను బీజేపీ పట్టించుకోవడం లేదు. కానీ గుజరాత్‌కు పన్ను రాయితీ ప్రయోజనాలు, అదనపు బడ్జెట్ కేటాయిస్తున్నారని విమర్శించారు. ఏపీ లాంటి రాష్ట్రాలు రేపటి రోజున గుజరాత్‌తో ఎలా పోటీ పడగలవని ఆయన ప్రశ్నించారు.




Please Read Disclaimer