బుగ్గన భజన బుడగ తుస్సుమంది.. వరల్డ్ బ్యాంక్ రుణంపై టీడీపీ ‘జబర్దస్త్’ పంచ్

0

వరల్డ్ బ్యాంక్ రుణం అంశం ఏపీలో హాట్ టాపిక్‌గా మారింది. అమరావతి నిర్మాణానికి 300 మిలియన్ డాలర్ల రుణసాయాన్ని నిలిపేస్తున్నట్టు ప్రపంచ బ్యాంక్ ప్రకటించింది. దీంతో వైఎస్ఆర్సీపీ తీరు వల్లే అమరావతికి ఇస్తామన్న రుణాన్ని వరల్డ్ బ్యాంక్ ఆపేసిందని టీడీపీ విమర్శలు ప్రారంభించింది. ఏపీకి 1000 మిలియన్ల రుణసాయాన్ని అందజేస్తామని ప్రపంచ బ్యాంక్ ప్రకటించింది. జగన్ క్లీన్ ఇమేజ్ వల్లే వరల్డ్ బ్యాంక్ భారీ రుణసాయానికి ముందుకొచ్చిందని ఆర్థిక మంత్రి బుగ్గన అసెంబ్లీలో ప్రకటించారు.

ఆర్థిక మంత్రి చేసిన వ్యాఖ్యల పట్ల స్పందించిన టీడీపీ.. బుగ్గన బుడగ తుస్సుమందంటూ సెటైర్లు వేసింది. ‘‘బుగ్గన గారి స్వామిభక్తి రోజురోజుకీ శృతిమించుతోంది. ఆ పారవశ్యంలో ఆయన అసెంబ్లీలో అబద్ధాలను గాలి బుడగల్లా వదులుతున్నారు. 11 అక్టోబర్ 2018న చంద్రబాబుగారి ప్రభుత్వం హెల్త్ సెక్టార్లో రుణం కోసం ప్రపంచ బ్యాంకుకు దరఖాస్తు చేసుకుంటే, 15 మే 2019న ప్రపంచ బ్యాంకు ఆమోదించింది.

YS Jagan Mohan Reddy గారి క్లీన్ ఇమేజ్ చూసే ప్రపంచబ్యాంకు ఈ సాయానికి సిద్ధపడిందని బుగ్గనగారు అసెంబ్లీలో బుడగ వదిలారు. అంటే అప్పటికి ఇంకా ఎన్నికల ఫలితాలు కూడా రాకపోయినా జగన్ గారు ముఖ్యమంత్రి అవుతారని, క్లీన్ ఇమేజితో పాలించేస్తారని వరల్డ్ బ్యాంకు వాళ్ళు ఊహించేశారన్న మాట.

ఎలా బుగ్గన గారు… ఇన్ని అబద్దాలు ఎలా ఆడగలుగుతున్నారు? మీరు చెప్పింది విన్నాకా … రేపు ఉదయం ఇదే అసెంబ్లీలో చంద్రయాన్ 2 ప్రయోగం కూడా జగన్ గారి వల్లే విజయవంతం అయ్యిందని చెపుతారేమో అనిపిస్తోంది. ఎందుకైనా మంచిది రేపటి భజనకి చిడతలు కూడా పట్టుకురండి’’ అని నారా లోకేశ్ సోషల్ మీడియాలో పోస్ట్ చేశారు. బుగ్గన మాటలకు జబర్దస్త్ స్కిట్‌ క్లిప్‌లను కూడా జత చేసిన వీడియోను వదిలిన లోకేశ్.. ఫేస్‌బుక్‌లో మాత్రం అది వాట్సాప్ ఫార్వార్డ్ అని పేర్కొనడం గమనార్హం.




Please Read Disclaimer