పర్వతమెక్కుతూ 500 అడుగుల ఎత్తు నుంచి పడ్డాడు, చివరికి ఇలా బతికాడు!

0

500 అడుగుల ఎత్తు నుంచి పడటమంటే మాటలు కాదు. అంత ఎత్తు నుంచి పడే వ్యక్తులు ప్రాణాలతో బతికి బయటపడ్డ దాఖలాలు లేవు. అయితే, భారత సంతతికి చెందిన 16 ఏళ్ల పర్వతారోహకుడు గుర్బజ్ సింగ్ అంత ఎత్తు నుంచి పడి కూడా ప్రాణాలతో ఉన్నాడు. అమెరికాలో అత్యంత ఎత్తైన మౌంట్ హూడ్ పర్వతాన్ని ఎక్కుతుండగా ఈ ప్రమాదం చోటుచేసుకుంది.

చిన్న వయస్సులోనే గుర్బజ్ సింగ్ 89 ఎత్తైన పర్వతాలు ఎక్కి తనకుంటూ ప్రత్యేక గుర్తింపును తెచ్చుకున్నాడు. మౌంట్ హూడ్ అధిరోహించి 90వ మరో రికార్డును తన ఖాతాలో వేసుకొనేందుకు మంగళవారం తన స్నేహితులతో కలిసి పర్వతారోహణకు బయల్దేరాడు. 11,240 అడుగులు ఎత్తుకు ఎక్కిన తర్వాత కాలు జారింది. దీంతో రెప్పపాటు వ్యవధిలో గుర్బజ్ దొర్లుకుంటూ లోయలో పడ్డాడు.

దీంతో అతడి స్నేహితులు అధికారులకు సమాచారం ఇచ్చారు. అయితే, పర్వతం చాలా ఎత్తుగా ఉండటం, అతడి పడిన ప్రాంతం ప్రమాదకరంగా ఉండటంతో రెస్క్యూ ఆపరేషన్ ఆలస్యమైంది. రెస్క్యూ సిబ్బంది కొన్ని గంటలపాటు శ్రమించి గుర్బజ్‌ పడిన ప్రాంతాన్ని కనుగొన్నారు. సుమారు 10,500 అడుగుల ఎత్తులో అతడు చిక్కుకున్నట్లు తెలుసుకున్నారు. ఆశ్చర్యం ఏమిటంటే.. అంత ఎత్తు నుంచి పడినా అతడికి ప్రాణాలకు ఏమీ కాలేదు. కాలు విరిగడంతో నడవలేకపోయాడు.

రెస్క్యూ సిబ్బంది గుర్బజ్‌ను రక్షించి, హెలికాప్టర్లో పోర్ట్‌ల్యాండ్‌లోని హాస్పిటల్‌కు తరలించారు. ఈ సందర్భంగా గుర్బజ్ మాట్లాడుతూ.. ‘‘అంత ఎత్తు నుంచి పడినా.. నాకు ఏమీ కాకపోవడానికి కారణం, నా హెల్మెట్. అది నా తలకు దెబ్బ తగలకుండా కాపాడింది. కిందపడిన తర్వాత చూస్తే.. అది తునకలై కనిపించింది. అదే లేకపోతే.. తల పగిలిపోయేదేమో. మంచుతో ఉన్న ఆ కొండపై ఐస్‌ను గొడ్డలితో కొట్టి పట్టుకోవాలి. కానీ, అది పట్టుతప్పడంతో కిందపడిపోయా’’ అని తెలిపాడు. అయితే, ఈ ప్రమాదం తర్వాత గుర్బజ్ తన ధైర్యం కోల్పోలేదు. పూర్తిగా కోలుకున్న తర్వాత మళ్లీ పర్వాతాన్ని అధిరోహిస్తానని చెబుతున్నాడు.




Please Read Disclaimer