మాస్క్‌లను ఉచితంగా పంపిణీ చేయండి.. తెలంగాణ హైకోర్టు ఆదేశం

0

రాష్ట్రంలో కరోనా వైరస్‌ వ్యాప్తిపై ఆందోళనల నేపథ్యంలో తెలంగాణ హైకోర్టు కీలక ఆదేశాలు జారీ చేసింది. మురికి వాడల్లోని పేదలకు రేషన్‌ దుకాణాల ద్వారా ఉచితంగా మాస్క్‌లు, శానిటైజర్లు పంపిణీ చేసే అంశాన్ని పరిశీలించాలని రాష్ట్ర ప్రభుత్వానికి సూచించింది. ప్రధాన బస్టాండ్‌లు, రైల్వే స్టేషన్లలోనూ స్క్రీనింగ్‌ కేంద్రాలు ఏర్పాటు చేయాలని సూచించింది. తెలంగాణలో కరోనా తొలి కేసు నమోదైన అంశంపై సిద్ధలక్ష్మి అనే మహిళ దాఖలు చేసిన ప్రజా ప్రయోజన వ్యాజ్యంపై హైకోర్టు రెండో రోజైన గురువారం (మార్చి 5) విచారణ కొనసాగించింది.

మురికివాడలపై ప్రత్యేక దృష్టి సారించాలని రాష్ట్ర ప్రభుత్వాన్ని హైకోర్టు ఆదేశించింది. కరోనా వైరస్ మురికివాడల్లో ఎక్కువగా వ్యాప్తి చెందే ప్రమాదం పొంచి ఉందని హైకోర్టు ధర్మాసనం ఆందోళన వ్యక్తం చేసింది. ప్రధాన న్యాయమూర్తి జస్టిస్ ఆర్‌ఎస్ చౌహాన్‌, జస్టిస్ ఎ అభిషేక్‌ రెడ్డితో కూడిన ధర్మాసనం కరోనా పిటిషన్‌పై విచారణ చేపట్టింది.

తెలంగాణ ఐపీఎం డైరెక్టర్ డాక్టర్ శంకర్‌.. కేసు విచారణ సందర్భంగా కోర్టుకు హాజరయ్యారు. కరోనాపై ప్రభుత్వం తీసుకుంటున్న చర్యలను న్యాయస్థానికి వివరించారు. ప్రభుత్వం అన్ని రకాల చర్యలు చేపట్టిందని తెలిపారు. ప్రస్తుతం గాంధీ, టీబీ, ఛాతీ, ఫీవర్‌ ఆస్పత్రుల్లో కరోనాకు చికిత్సతో పాటు సౌకర్యాలు అందుబాటులో ఉన్నాయని కోర్టుకు ఆయన వివరించారు. వైద్య సిబ్బందికి కరోనా సోకకుండా పర్సనల్‌ ప్రివెంటివ్‌ ఎక్విప్‌మెంట్‌ అందజేసినట్లు హైకోర్టుకు శంకర్ తెలిపారు.

కరోనాతో తెలంగాణలో ఆందోళన నెలకొన్న నేపథ్యంలో.. ఇదే అదనుగా కొంత మంది వ్యాపారులు క్యాష్ చేసుకుంటున్నారు. మాస్కుల ధరలను భారీగా పెంచారు. ఇప్పటివరకు రూ.1.60కి విక్రయించిన మాస్కులను కొన్ని మందుల షాపుల్లో రూ.20 నుంచి రూ.30 వరకు అమ్ముతున్నారు. డిమాండ్ పెరుగుతుండటంతో ఈ రేట్లను మరింత పెంచే అవకాశం ఉంది. ఇక రూ.35 – 40 విలువ చేసే ఎన్‌ 95 మాస్కులను ఏకంగా రూ.300లకు అమ్ముతున్నారు. ప్రజల్లో ఉన్న కరోనా భయాన్ని సొమ్ము చేసుకోవడానికి ఇదే అనువైన సమయంగా భావిస్తున్నారు. కృత్రిమ కొరత సృష్టించి అమ్మకాలు సాగిస్తున్నారు. ఈ నేపథ్యంలో హైకోర్టు ఆదేశాల పట్ల పలువురు హర్షం వ్యక్తం చేస్తున్నారు.




Please Read Disclaimer


30రూ|| మాస్క్ కేవలం 2రూ|| కే తయారు చేసుకోండి Make your own mask for Just Rs.2/-