ఆర్టీసీ అంశంపై హైకోర్టు కీలక నిర్ణయం

0

ఆర్టీసీ సమస్య పరిష్కారానికి ముగ్గురు సుప్రీంకోర్టు మాజీ న్యాయమూర్తులతో కమిటీ వేస్తామని హైకోర్టు పేర్కొంది. దీనిపై ప్రభుత్వ అభిప్రాయం చెప్పాలని అడ్వొకేట్‌ జనరల్‌ను ఉన్నత న్యాయస్థానం ఆదేశించింది. కోర్టు ఆదేశాలను ప్రభుత్వం దృష్టికి తీసుకెళ్తామని ఏజీ చెప్పారు. ఆర్టీసీ సమ్మె, రూట్ల ప్రైవేటీకరణపై హైకోర్టులో మంగళవారం (నవంబర్ 12) విచారణ కొనసాగింది. ఈ సందర్భంగా కీలక వ్యాఖ్యలు చేసింది.

కార్మికుల సమ్మె చట్ట విరుద్ధమా? కాదా? అని చెప్పే అధికారం హైకోర్టుకు ఉందా అని ధర్మాసనం ప్రశ్నించింది. ఈ అంశంపై వివరించాలని నీనియర్‌ న్యాయవాది విద్యాసాగర్‌ను కోర్టు కోరింది. ఎస్మా కింద సమ్మె చట్ట విరుద్ధమని ప్రకటించవచ్చని ఈ సందర్భంగా విద్యాసాగర్ తెలిపారు. ఆర్టీసీని 1998, 2015లో ఎస్మా పరిధిలోకి తీసుకొస్తూ ప్రభుత్వం ఉత్తర్వులు జారీ చేసిందని ఆయన తెలిపారు.

ఆర్టీసీసి ఎస్మా పరిధిలోకి తీసుకొస్తూ రాష్ట్ర ప్రభుత్వం 1998లో ఇచ్చిన ఉత్తర్వులు ఏపీఎస్‌ ఆర్టీసీకి మాత్రమే వర్తిస్తాయని హైకోర్టు ధర్మాసనం తెలిపింది. 2015లో ప్రభుత్వం మరోసారి జీవో ఇచ్చిందని లాయర్ విద్యాసాగర్‌ తెలపగా.. పరిశీలించిన న్యాయస్థానం ఆ జీవో 6 నెలల వరకే వర్తిస్తుందని పేర్కొంది. హైకోర్టు చట్టానికి అతీతం కాదని.. చట్టాల పరిధి దాటి వ్యవహరించలేదని ఈ సందర్భంగా ధర్మాసనం వ్యాఖ్యానించింది.

ఆర్టీసీ సమ్మెను అనుకూలంగా చేసుకొని కొంత మంది అక్రమాలకు పాల్పడుతున్నారని.. బస్సుల్లో అధిక ఛార్జీలు వసూలు చేస్తున్నారని పిటిషనర్‌ తరపు న్యాయవాది హైకోర్టు దృష్టికి తీసుకొచ్చారు. దానిపై వినియోగదారుల ఫోరంలో ఫిర్యాదు చేయాలని ఉన్నత న్యాయస్థానం సూచించింది. అధిక ఛార్జీల వసూలు కారణంగా సమ్మె చట్ట విరుద్ధమని ప్రకటించలేమని స్పష్టం చేసింది.

ఆర్టీసీ యాజమాన్యం కార్మికులతో చర్చలు జరపాలని ఏ చట్టంలో ఉందని.. హైకోర్టు ఈ విషయంలో ఏ ప్రాతిపదికన ఆదేశించగలదని ధర్మాసనం ప్రశ్నించింది. తదుపరి విచారణను బుధవారానికి వాయిదా వేసింది. ఆర్టీసీ సమ్మెపై ముగ్గురు సుప్రీంకోర్టు మాజీ న్యాయమూర్తులతో కమిటీ వేసే అంశంపై రేపటి లోగా అభిప్రాయాలు చెప్పాలని ప్రభుత్వాన్ని ఆదేశించింది.

ఆర్టీసీ వ్యవహారంపై చర్చల సమయం ముగిసిందని.. ఇక చట్ట పరిధిలోనే విచారించి తేలుస్తామని రాష్ట్ర ఉన్నత న్యాయస్థానం స్పష్టం చేసిన సంగతి తెలిసిందే. సోమవారం ఈ అంశంపై విచారణ సందర్భంగా న్యాయస్థానం కీలక వ్యాఖ్యలు చేసింది. ఆర్టీసీ ఎస్మా పరిధిలోకి రాదని చెప్పింది. సమ్మె చట్ట విరుద్ధమని ప్రకటించడానికి కోర్టు వేదిక కాదని పేర్కొంది. చర్చల విషయంలో ప్రభుత్వం, ఆర్టీసీ సంఘాలు.. ఎవరూ తగ్గలేదని, చర్చలు జరపాలంటూ కోర్టు ఎవరినీ ఆదేశించలేమని వ్యాఖ్యానించింది.




Please Read Disclaimer