TikTokతో నవ్వించిన ఆ చిన్నారి.. ఈ లోకాన్ని వీడింది, కన్నీళ్లు మిగిల్చింది!

0

‘టిక్‌టాక్’.. ఇది తెలియకుండానే మనకు కొత్త మిత్రులను పరిచయం చేస్తుంది. వారి సరదా మాటలు.. ఆటలు.. వేషాలు రోజూ చూసేలా పురిగొలుపుతుంది. అలా మెప్పించే వ్యక్తులే ‘టిక్‌టాక్’ స్టార్‌లుగా వైరల్ అవుతున్నారు. కేరళకు చెందిన ఆ చిన్నారి కూడా అలాగే స్టారైంది. ముద్దు ముద్దు మాటలతో నవ్విస్తూ, మురిపిస్తూ ఎంతో అభిమానాన్ని పొందింది. ఆ దేవుడికి కూడా ఆమె బాగా నచ్చేసిందో ఏమో.. నూరేళ్లు నిండకుండానే తనతో తీసుకెళ్లిపోయాడు.

ఆరుణి కురుప్ (9).. కేరళ ప్రజలకు ఈ పేరు సుపరిచితమే. టిక్ టాక్‌ వీడియోలతో మలయాళీ ప్రజల మనసు దోచుకున్న ఆరుణి శుక్రవారం కన్నుమూసింది. ఈ విషయాన్ని ‘బిహైండ్ వుడ్స్’ అనే వెబ్‌సైట్ వెల్లడించింది. ఆరుణి మెదడుకు అంతుచిక్కని వ్యాధి సోకిందని, దీనివల్ల ఆమె కొన్ని రోజులుగా అనారోగ్యంతో బాధపడుతుందోని తెలిపింది. ఇటీవల తీవ్ర జ్వరం, తలనొప్పితో అస్వస్థతకు గురైన ఆమెను త్రివేండ్రంలోని S.I.T. ఆస్పత్రికి తరలించారు. అయితే, వైద్యులు ఆమె ప్రాణాలను కాపాడలేకపోయారు. చికిత్స చేస్తుండగానే ఆ చిన్నారి లోకాన్ని వీడింది.

ఈ వార్త తెలియగానే మలయాళీ అభిమానులు సోషల్ మీడియా ద్వారా తమ బాధను వ్యక్తం చేస్తున్నారు. ఆ చిన్నారి ఇకలేదని తలచుకుంటుంటే కళ్లల్లో నీళ్లు తిరుగుతున్నాయని, ఆమె ఆత్మకు శాంతి కలగాలని కోరుతున్నారు. ఆరుణి నాలుగో తరగతి చదువుతున్నట్లు తెలిసింది. ఆరుణిని ఎంతో ప్రేమగా చూసుకునే తండ్రి 2018లో సౌదీ అరేబియాలో జరిగిన ప్రమాదంలో చనిపోయారు. చివరికి ఆరుణి కూడా తండ్రి వద్దకే వెళ్లిపోయి.. ఆమె తల్లి, కుటుంబికులను కన్నీటి సంద్రంలో ముంచింది.




Please Read Disclaimer