టిక్‌టాక్ స్టార్‌కు ఎమ్మెల్యే టికెట్.. బీజేపీ సరికొత్త వ్యూహం

0

టిక్‌‌టాక్‌‌తో ఎంతోమంది సెలబ్రిటీలయ్యారు. తమ టాలెంట్‌తో అదరగొడుతూ ఓవర్ నైట్ స్టార్లుగా మారిన వారు చాలామందే ఉన్నారు. మొన్నటి వరకు సినిమా రంగానికే పరిమితమైన ఈ టాలెంట్‌ను రాజకీయ పార్టీలు కూడా తమ వ్యూహాలకు ఆయుధంగా మార్చుకుంటున్నాయి. హర్యానాలో అదే జరిగింది.. ఓ టిక్‌టాక్ స్టార్‌కు ఏకంగా బీజేపీ నుంచి ఎమ్మెల్యే టికెట్ దక్కింది. ఆదంపూర్‌ నియోజకవర్గం నుంచి ఈ స్టార్ బరిలోకి దిగుతున్నారు.

సోనాలీ ఫొగాట్‌ సరదాగా టిక్‌టాక్‌లో వీడియోలు చేస్తుండేవారు. అతి తక్కువ సమయంలోనే ఆమె టిక్‌టాక్‌లో లక్షకుపైగా ఫాలోవర్స్‌‌ను సంపాదించారు. వెరైటీ, వెరైటీ వీడియోలతో ఆకట్టుకున్నారు. తన టాలెంట్‌తో ఆమె పెద్ద టిక్‌టాక్ స్టారయ్యారు. ఫాలోయింగ్ కూడా పిచ్చి, పిచ్చగా పెరగడంతో.. బీజేపీ నేతలు ఆమెను ఎన్నికల బరిలోకి దించాలని భావించారు. కమలనాథులు వ్యూహాత్మకంగా ఆమెకు కాంగ్రెస్‌ పార్టీ బలంగా ఉన్న ఆదంపూర్ నియోజకవర్గాన్ని ఎంచుకున్నారు.

బీజేపీ రెండో జాబితాలో ఆమెకు ఆదంపూర్ నుంచి టికెట్ కేటాయించారు. ఈసారి ఎలాగైనా ఆ నియోజకవర్గంలో బీజేపీ జెండా ఎగరేయాలనే పట్టుదలతో ఉన్నారు. అందుకే ఆమెను వ్యూహాత్మకంగా బరిలోకి దించారు. మరి ఈ టిక్‌టాక్ స్టార్‌కు అదృష్టం ఎలా కలిసొస్తుంది.. విజయం వరిస్తుందో లేదో చూడాలంటే మరికొన్ని రోజులు ఆగాల్సిందే. అయితే సోనాలి గెలపు ఖాయమని కమలనాథులు మాత్రం ధీమాతో ఉన్నారట.

ఈ ఆదంపూర్ నియోజకవర్గానికి సంబంధించి వివరాలు పరిశీలిస్తే.. ఇక్కడి 1969 నుంచి వరుసగా 8సార్లు మాజీ సీఎం భజన్‌లాల్‌ గెలిచారు. 1987, 1998ల్లో భజన్‌లాల్ భార్య, కుమారుడు చెరోసారి విజయం సాధించారు. ఈ నియోజకవర్గంలో బిష్ణోయ్‌ కుటుంబ ప్రభావం కూడా ఎక్కువగా ఉంటుందట.. అందుకే ఈ స్థానాన్ని సోనాలీ ఫొగాట్‌కు కేటాయించారట. హర్యానా అసెంబ్లీకి అక్టోబర్‌ 21న ఎన్నికలు..24న ఫలితాలు వెలువడనున్నాయి.




Please Read Disclaimer