ఉమేశ్ యాదవ్ రికార్డుల మోత.. సగర్వంగా సచిన్ సరసన

0

దక్షిణాఫ్రికాతో రాంచీ వేదికగా జరుగుతున్న మూడో టెస్టు మ్యాచ్‌లో భారత టెయిలెండర్ బ్యాట్స్‌మెన్ ఉమేశ్ యాదవ్ 5 సిక్సర్లతో సరికొత్త రికార్డ్‌ల్ని నెలకొల్పాడు. మ్యాచ్‌లో రెండో రోజైన ఆదివారం రెండో సెషన్‌లో బ్యాటింగ్‌‌కి వచ్చిన ఉమేశ్ యాదవ్ (31: 10 బంతుల్లో 5×6) రెండు ఓవర్ల వ్యవధిలోనే ఏకంగా 5 సిక్సర్లు బాదేశాడు. స్పిన్నర్ జార్జ్ లిండే బౌలింగ్‌ని లక్ష్యంగా చేసుకున్న ఉమేశ్.. అన్ని సిక్సర్లూ అతడికే కొట్టి.. వికెట్ కూడా సమర్పించుకున్నాడు. ఈ టెస్టులో డబుల్ సెంచరీ బాదిన రోహిత్ శర్మ 255 బంతులాడి 6 సిక్సర్లు బాదగా.. ఉమేశ్ యాదవ్ కేవలం 10 బంతుల్లో 5 సిక్సర్లు నమోదు చేయడం కొసమెరుపు.

టెస్టు మ్యాచ్‌లో ఎదుర్కొన్న తొలి రెండు బంతుల్నీ సిక్సర్లుగా మలిచిన ఉమేశ్ యాదవ్.. దిగ్గజ క్రికెటర్ సచిన్ టెండూల్కర్ సరసన నిలిచాడు. ఆస్ట్రేలియా స్పిన్నర్ నాథన్ లయన్ బౌలింగ్‌లో సచిన్ అప్పట్లో ఈ ఘనత సాధించాడు. ఇక 10 బంతుల్లోనే 310 స్ట్రైక్‌రేట్‌తో 31 పరుగులు చేసిన ఉమేశ్ యాదవ్.. టెస్టు క్రికెట్‌లోనే అత్యధిక స్ట్రైక్ రేట్‌తో(కనీసం 25 పరుగులు) బ్యాటింగ్ చేసిన ఆటగాడిగా నిలిచాడు.




Please Read Disclaimer