చైనాతో తాడోపేడో.. భారత సైన్యానికి పూర్తి స్వేచ్ఛ.. ఆయుధాల కొనుగోలుకు అధికారాలు

0

భారత్‌- చైనా సరిహద్దు ప్రాంతంలో తీవ్ర ఉద్రిక్త పరిస్థితులు నెలకొన్న నేపథ్యంలో కేంద్ర ప్రభుత్వం కీలక నిర్ణయం తీసుకుంది. భారత రక్షణ దళాలకు ప్రత్యేక ఆర్థికశక్తినిచ్చింది. రూ. 500 కోట్ల లోపు అత్యాధునిక యుద్ధ సామాగ్రిని కొనుగోలు చేసుకునేందుకు వీలుగా త్రివిధ దళాలకు అధికారం ఇచ్చింది.

త్రివిధ దళాలకు ఆర్థికశక్తిని అందించే కార్యక్రమంలో భాగంగా ప్రధాని నరేంద్ర మోదీ నేతృత్వంలోని కేంద్రం ప్రభుత్వం అత్యవసరాల నిమిత్తం రూ.500 కోట్లలోపు ఆయుధాలను కొనుగోలు చేయడం, లేదా అప్‌గ్రేడ్‌ చేసుకునేలా ప్రత్యేక అధికారాలను ఇచ్చిందని ప్రభుత్వ వర్గాలు వెల్లడించాయి.. దీని ద్వారా నూతన, అత్యాధునిక ఆయుధాలను కొనుగోలు చేసే వీలు కలుగుతుందని ప్రభుత్వ వర్గాలు తెలిపాయి. ఈ నిధుల ద్వారా ఆర్మీ సరికొత్త ఆయుధాలను సమకూర్చుకోనుంది. త్రివిధ దళాలు ఇప్పటికే ఎలాంటి ఆయుధాలను కొనుగోలు చేయాలన్న దానిపై కసరత్తు ప్రారంభించాయి. ఆయుధాల జాబితాను సిద్ధం చేసుకొంటున్నాయి.

అలాగే సరిహద్దుల్లో చైనాతో ఉద్రిక్త పరిస్థితులు నెలకొన్న నేపథ్యంలో రక్షణశాఖ మంత్రి రాజ్‌నాథ్‌ సింగ్‌ తాజాగా ఉన్నత స్థాయి సమీక్ష నిర్వహించారు. ఈ భేటీకి త్రిదళాధిపతి జనరల్‌ బిపిన్‌ రావత్‌, ఆర్మీ చీఫ్‌ జనరల్‌ ఎం.ఎం.నరవణె, నావికాదళాధిపతి అడ్మిరల్‌ కరంబీర్‌ సింగ్‌, వాయుసేనాధిపతి చీఫ్‌ మార్షల్‌ ఆర్‌.కె.ఎస్‌ భదౌరియా హాజరయ్యారు. చైనా సైన్యం దుస్సాహసాలకు గట్టిగా బదులివ్వడానికి సిద్ధంగా ఉండాలని భారత సైన్యానికి రాజ్‌నాథ్‌ సూచించినట్లు విశ్వసనీయ వర్గాలు తెలిపాయి. సైన్యానికి పూర్తి స్వేచ్ఛ ఇచ్చినట్లు వెల్లడించాయి.




Please Read Disclaimer