3 రాజధానులపై మా స్టాండ్ ఇదే.. కేంద్ర మంత్రి సంచలన వ్యాఖ్యలు

0

రాష్ట్ర ప్రభుత్వ మూడు రాజధానుల నిర్ణయంపై కేంద్ర హోం శాఖ సహాయ మంత్రి కిషన్‌రెడ్డి సంచలన వ్యాఖ్యలు చేశారు. మూడు రాజధానులపై వైసీపీ ప్రభుత్వం నుంచి ఇప్పటి వరకు ఎలాంటి సమాచారం లేదని వెల్లడించారు. అమరావతి రైతులు, జేఏసీ నేతలు ఆదివారం (ఫిబ్రవరి 2) ఢిల్లీలో కేంద్ర మంత్రి కిషన్‌రెడ్డిని కలిశారు. రాష్ట్ర ప్రభుత్వ నిర్ణయం వల్ల రైతులు తీవ్రంగా నష్టపోతున్నారని ఐకాస నేతలు మంత్రి దృష్టికి తెచ్చారు. ఆందోళనకారులపై రాష్ట్ర ప్రభుత్వం అక్రమ కేసులు పెడుతోందని, రాజధాని విషయంలో కేంద్రం జోక్యం చేసుకోవాలని రైతులు విజ్ఞప్తి చేశారు.

రైతులతో సమావేశం అనంతరం కేంద్ర మంత్రి కిషన్‌రెడ్డి మీడియాతో మాట్లాడుతూ.. మూడు రాజధానులపై వైఎస్సార్ కాంగ్రెస్ పార్టీ ప్రభుత్వం నుంచి ఇప్పటి వరకు కేంద్ర ప్రభుత్వానికి ఎలాంటి సమాచారం లేదని తెలిపారు. కేంద్రానికి లిఖితపూర్వకంగా సమాచారం అందిన తర్వాతే ఏపీ ప్రభుత్వంతో మాట్లాడతామని తెలిపారు. రాజ్యాంగం పరిధిలోనే కేంద్రం వ్యవహరిస్తుందని స్పష్టం చేశారు.

‘మూడు రాజధానులు వద్దు’
రాజధాని వ్యవహారం రాష్ట్ర ప్రభుత్వానికి చెందిన విషయమైనా.. కొన్ని సూచనలు చేస్తామని కేంద్ర మంత్రి కిషన్‌రెడ్డి వెల్లడించారు. రైతుల గురించి కూడా ఆలోచించాలని రాష్ట్ర ప్రభుత్వానికి చెబుతామని పేర్కొన్నారు. అభివృద్ధి వికేంద్రీకరణ మంచిదే అయినా రాజధాని మార్పు మంచిది కాదన్నారు. బీజేపీ రాష్ట్ర పార్టీ మూడు రాజధానులు వద్దని చెప్పిందని కిషన్‌రెడ్డి వెల్లడించారు.




Please Read Disclaimer