పాకిస్థాన్‌తో యుద్ధంపై వెంకయ్య ఆసక్తికర వ్యాఖ్యలు, కేంద్రం అడుగులు అటువైపేనా?

0

పాకిస్థాన్‌తో చర్చలంటూ జరిగితే అది పాక్ ఆక్రమిత కశ్మీర్‌ను భారత్‌కు అప్పగించడం గురించేనని ఉపరాష్ట్రపతి వెంకయ్య నాయుడు తెలిపారు. బుధవారం వైజాగ్‌లో జరిగిన నావల్ సైన్స్ అండ్ టెక్నాలజీ లేబరేటరీ అర్ధ శతాబ్ది ఉత్సవాల ముఖ్య అతిథిగా పాల్గొన్న వెంకయ్య పాకిస్థాన్ గురించి ఆసక్తిక వ్యాఖ్యలు చేశారు. భద్రతను పెంపొందించుకోవడం కోసమే భారత్ ఆయుధాలను సమకూర్చుకుంటోందన్న ఆయన.. పొరుగు దేశాలపై దాడి కోసం కాదన్నారు. భారత్ ఇప్పటి వరకూ ముందుగా దాడికి దిగలేదన్న ఆయన.. ఒకవేళ పాకిస్థాన్ యుద్ధానికి సిద్ధపడితే.. వారు జీవితంలో ఎప్పటికీ మర్చిపోలేని విధంగా బదులిస్తామన్నారు.

మేం యుద్ధాన్ని కోరుకోవడం లేదు. శాంతి ప్రేమికులం అన్న వెంకయ్య.. పాకిస్థాన్ సరిహద్దుల్లో ఉద్రిక్తతలను పెంచుతోందన్నారు. మానవాళికి తాము చేస్తున్న హాని గురించి పట్టించుకోకుండా.. దాయాది ఉగ్రవాదానికి నిధులు అందజేస్తోందని, శిక్షణ ఇస్తోందని వెంకయ్య వ్యాఖ్యానించారు.

వేరే దేశాల అంతర్గత వ్యవహారాల్లో తాము తలదూర్చమన్న ఉపరాష్ట్రపతి.. తమ అంతర్గత వ్యవహారాల్లో మరొకరి జోక్యాన్ని సహించబోమని కశ్మీర్‌ను ఉద్దేశించి వ్యాఖ్యానించారు.

కశ్మీర్ భారత్‌లో భాగమన్న వెంకయ్య 1954 నుంచి ఆ రాష్ట్రంలో ఎన్నికలు జరుగుతున్నాయి, ముఖ్యమంత్రులను ఎన్నుకుంటున్నారని తెలిపారు. ఇక చర్చించాల్సిందల్లా పాక్ ఆక్రమిత కశ్మీర్ అప్పగింత గురించేనన్నారు.

మరో వైపు పాకిస్థాన్ మంత్రులు భారత్‌తో యుద్ధం గురించి మాట్లాడుతున్నారు. ఎలాంటి యుద్ధానికైతే తాము సిద్ధంగా ఉన్నామని పాక్ విదేశాంగ మంత్రి సోమవారం తెలిపారు. తాజాగా పాక్ రైల్వే మంత్రి మాట్లాడుతూ.. అక్టోబర్లో భారత్‌తో యుద్ధం వస్తుందని, కశ్మీర్ స్వేచ్ఛ కోసం జరిగే చివరి యుద్ధం ఇదేనని వ్యాఖ్యానించారు. ఇలాంటి తరుణంలో వెంకయ్య వ్యాఖ్యలు ఆసక్తికరంగా మారాయి.




Please Read Disclaimer