ఆ ఫేస్‌బుక్ పోస్టు చూసి.. దొంగిలించిన వస్తువులు తిరిగిచ్చేసిన దొంగ

0

సోషల్ మీడియా వల్ల పిల్లలు చెడిపోతున్నారని చాలామంది అంటారు. కానీ, అదే సోషల్ మీడియా ఓ దొంగలో పరివర్తన తీసుకొచ్చింది. అతడు చేసిన పనికి సిగ్గుపడేలా చేసింది. చివరికి.. అతడు దొంగిలించిన వస్తువులను తిరిగిచ్చేలా చేసింది. అమెరికాలో చర్చనీయంగా మారిన ఈ ఘటన పూర్తి వివరాలు ఇలా ఉన్నాయి.

సోమవారం వర్జీనియాలోని రిచ్‌మండ్‌‌లో గల ఓ మ్యూజిక్ స్కూల్‌కు వెళ్లిన ఓ వ్యక్తి.. రిసెప్షన్‌లో ఉన్న సెల్‌ఫోన్లు, సన్నాయి ( clarinet) దొంగిలించాడు. చూట్టూ ఎవరూ లేరనే ధైర్యంతో చేతికి పని చెప్పిన ఆ దొంగ.. ఆ గదిలో సీసీటీవీ కెమేరాలు ఉన్నాయనే సంగతి తెలుసుకోలేకపోయాడు. ఈ ఘటనపై స్కూల్ యాజమాన్యం పోలీసులకు ఫిర్యాదు చేశారు. పోలీసులు ఆ సీసీటీవీ వీడియోను తమ ట్విట్టర్, ఫేస్‌బుక్ పేజ్‌లో అప్‌లోడ్ చేశారు. ఆ వీడియోలను టీవీల్లో కూడా ప్రసారం చేశారు.


ఆ వీడియో వైరల్‌గా మారి.. ఆ దొంగకు కూడా చేరింది. అతడిలో మార్పు తీసుకొచ్చింది. బుధవారం అతడు తాను దొంగిలించిన వస్తువులను ఒక సంచిలో తీసుకొచ్చి మ్యూజిక్ స్కూల్‌లో గల మ్యూజిక్ ట్రీకి తగిలించి వెళ్లిపోయాడు. ఆ బ్యాగ్ తెరిచి చూసిన స్కూల్ యాజమాన్యం ఆశ్చర్యపోయారు. అవన్నీ ఆ దొంగ తీసుకెళ్లిన సామాన్లే అని తెలుసుకుని పోలీసులకు ఫోన్ చేశారు.

క్షమించండి తప్పుచేశా: అతడు వదిలిన ఆ బ్యాగులో దొంగిలించిన వస్తువులనే కాకుండా ఓ లేఖను కూడా పెట్టా. ‘‘దయచేసి క్షమించండి. నేను చేసిన ఆ పనికి ఎంతో బాధపడుతున్నా. నన్ను నేనే మోసం చేసుకున్నా. ఈ నేరానికి మరెవరో బాధ్యులు కావడం నాకు ఇష్టం లేదు’’ అని లేఖలో తెలిపాడు. ఆ దొంగలో వచ్చిన పరివర్తనను గుర్తించి పోలీసులు ఆ కేసును కొట్టేశారా లేదా అనేది తెలియరాలేదు. అయితే, అతడు ప్రొఫెషనల్ దొంగ కాకపోయి ఉండవచ్చని, ఎవరూ లేని సమయంలో వాటిని దొంగిలించాలనే బుద్ధి పుట్టి ఉంటుందని పలువురు భావిస్తున్నారు.




Please Read Disclaimer