రిజర్వాయర్‌లో పసిబిడ్డ మృతదేహం.. 23 ఏళ్ల తర్వాత వీడిన హత్య మిస్టరీ

0

అది 1996.. ఓ రిజర్వాయర్ ఒడ్డున ఏదో మెరుస్తున్నట్లు కనిపించడంతో ఇద్దరు పిల్లలు అక్కడికి వెళ్లారు. అక్కడ కనిపించిన ప్లాస్టిక్ కవర్‌ను విప్పి చూసి గట్టిగా కేకలు పెట్టారు. దీంతో చుట్టుపక్కల జనం అక్కడికి చేరుకున్నారు. వెంటనే పోలీసులకు సమాచారం ఇచ్చారు. ఆ ప్లాస్టిక్ కవర్‌లో రక్తపు ముద్దలా కనిపిస్తున్న పసిబిడ్డను చూసిన పోలీసులు.. వెంటనే ఆసుపత్రికి తీసుకెళ్లారు.

ఆ పసిబిడ్డకు వైద్య పరీక్షలు నిర్వహించిన డాక్టర్లు.. అప్పటికే ఆమె చనిపోయిందని నిర్ధరించారు. పైగా, ఆమెది సహజ మరణం కాదని, ఎంతో ఆరోగ్యంగా పుట్టిన ఆమెను ఎవరో హత్య చేశారని తెలిపారు. దీంతో పోలీసులు గుర్తుతెలియని వ్యక్తులపై కేసు నమోదు చేశారు. చిన్నారికి సంబంధించిన రక్త నమూనాలు, జట్టు తదితర శాంపిళ్ల ఆధారంగా కేసును దర్యాప్తు చేయడం మొదలు పెట్టారు. అయితే, ఆమెను హత్య చేసిన హంతకులు ఎవరనేది తెలియరాలేదు. దీంతో పోలీసులు రెండేళ్ల తర్వాత.. అంటే 1998లో దర్యాప్తు నిలిపేశారు.

2006లో డీఎన్ఏ పరీక్షలు అందుబాటులోకి రావడంతో పోలీసులు మరోసారి ఆ ఫైలు దుమ్ము దులిపారు. ఆ పాప నమూనాలతో ఆమె డీఎన్ఏ కనుగొన్నారు. దాని ఆధారంగా ఆమె రక్తసంబంధికులను తెలుసుకొనే ప్రయత్నం చేశారు. అయితే, ఆ ప్రయత్నం కూడా ముందుకు సాగలేదు. ఆ డీఎన్ఏతో మ్యాచ్ అయ్యే వ్యక్తులెవరూ తెలియకపోవడంతో పోలీసులు మరోసారి ఈ కేసును మూసివేయాల్సి వచ్చింది. కానీ, ఎప్పటికైనా ఆ డీఎన్ఏ ద్వారా ఆమె కుటుంబికుల ఆచూకీ తెలుసుకోవచ్చనే విశ్వాసం పోలీసుల్లో కలిగింది.

అప్పట్లో ఈ కేసు స్థానికంగా సంచలనంగా మారడంతో.. అక్కడ ఏ అధికారి విధుల్లోకి చేరినా ఈ మిస్టరీ కేసును చేధించేందుకు ప్రయత్నించేవారు. దీంతో 2016లో అందుబాటులోకి వచ్చిన అత్యాధునిక సాంతికేత ఆధారంగా పోలీసులు ఆ పసిబిడ్డ కుటుంబికుల వివరాలను కనుగొనే ప్రయత్నం చేశారు. మొత్తం ఐదుగురి డీఎన్ఏలు ఆ పాప డీఎన్‌ఏతో మ్యాచ్ అయ్యాయి. వారిలో ఇద్దరి డీఎన్ఏ స్పష్టంగా మ్యాచ్ కావడంతో పోలీసులు వారి కోసం గాలింపులు మొదలుపెట్టారు. చివరికి ఆ పసిబిడ్డను చంపిన వ్యక్తి ఆచూకీ తెలిసింది.

అంతుచిక్కని మిస్టరీల్లో ఒకటిగా నిలిచిపోయిన ఈ ఘటన అమెరికాలోని కొలరాడో చోటుచేసుకుంది. తమకు లభించిన ఆధారాలతో మెరీల్యాండ్ చేరుకున్న పోలీసులు ఓ వ్యక్తిని అదుపులోకి తీసుకుని ప్రశ్నించారు. అయితే, ఆ పసిబిడ్డ ఎవరో తనకు తెలియదని చెప్పాడు. దీంతో పోలీసులు ఐదో వ్యక్తి వివరాలను అతడికి చెప్పారు. దీంతో అతడు.. ఆ ఐదో వ్యక్తి చిరునామాను పోలీసులకు ఇచ్చాడు.

పోలీసులు ఆ చిరునామాకు చేరుకున్నారు. ఆ ఇంట్లో ఉంటున్న జెన్నిఫర్ అనే మహిళను అదుపులోకి తీసుకుని ప్రశ్నించారు. చివరికి 23 ఏళ్ల మిస్టరీని చేధించారు. హత్యకు గురైన ఆ పసిబిడ్డ జెన్నిఫర్ కుమార్తె అని తెలుసుకున్నారు. ఆ పాప పేరు బేబీ ఫెయిత్ అని, ఆమెను జెన్నీఫరే హత్య చేసి, కవర్లోపెట్టి రిజర్వాయర్లో పడేసిందని విచారణలో తేలింది.

గతవారం పోలీసులు ఆమెను అదుపులోకి తీసుకుని కోర్టులో హాజరుపరిచారు. కోర్టు ఆమెకు రూ.18 లక్షల పూచీకత్తుపై బెయిల్ మంజూరు చేసింది. ఈ కేసు సంచలనంగా మారడంతో కొలరాడో ప్రభుత్వం కొత్త చట్టం తెచ్చింది. దీని ప్రకారం.. బిడ్డను పోషించడం భారమని భావిస్తే.. పుట్టిన 72 గంటల్లోపు ఆ బిడ్డను ఫైర్ స్టేషన్‌, లేదా ఆసుపత్రిలో అప్పగించి వెళ్లవచ్చు. వారిపై ఎలాంటి కేసు నమోదు కాదు.




Please Read Disclaimer