చనిపోయిన తండ్రి ఫోన్‌కు 4 ఏళ్లుగా కూతురు మెసేజ్‌లు.. చివరికి రిప్లై వచ్చింది!

0

 ఘటన గురించి చదివితే మీకు తప్పకుండా.. నాని నటించిన ‘గ్యాంగ్ లీడర్’ సినిమా గుర్తుకు వస్తుంది. అందులో ఓ అమ్మాయి చనిపోయిన సోదరుడి ఫోన్‌కు మెసేజ్‌లు పెడుతుంది. తన మనసులో మాటలను అందులో చెబుతుంది. సరిగ్గా ఇలాంటి ఘటనే అమెరికాలోని అర్కాన్సాస్‌లో చోటుచేసుకుంది.

ఛాస్టిటీ ప్యాటెర్సన్ అనే 23 ఏళ్ల యువతి తండ్రి జాసన్ లిగాన్స్ నాలుగేళ్ల కిందట చనిపోయాడు. ఆ ప్రమాదంలో అతడి ఫోన్ కూడా పోయింది. తండ్రిని ఎంతగానో ప్రేమించే ఆమె.. తన మనసులో భావాలను ఎప్పటికప్పుడు ఆ ఫోన్లో మెసేజ్ ద్వారా వ్యక్తం చేసేది. ప్రతి సంఘటనా అందులో వివరించేంది. ఇలా నాలుగేళ్ల నుంచి ఆమె మెసేజ్‌లను పంపుతూనే ఉంది. శుక్రవారం (అక్టోబరు 25న) తండ్రి చనిపోయిన రోజు కావడంతో గురువారం ఎప్పటిలాగానే ఓ మెసేజ్ పెట్టింది.

‘‘నాన్న రేపు చాలా బాధకరమైన రోజు. నిన్ను కోల్పోయి సుమారు 4 ఏళ్లు కావస్తోంది. ఈ తక్కువ సమయంలో నా జీవితంలో చాలా సంఘటనలు జరిగాయి. నీకు మాట ఇచ్చినట్లుగానే నేను క్యాన్సర్‌ను జయించాను. కాలేజ్ చదువు ముగించి గ్రాడ్యూయేషన్ పట్టా అందుకున్నాను. నేను ఓ వ్యక్తి ప్రేమలో పడ్డాను. కానీ, అతడు నా గుండె ముక్కలు చేశాడు (నువ్వు ఉండి ఉంటే అతడిని చంపేసేవాడివి). అయితే, అప్పటి నుంచే నేను తలెత్తుకుని ధైర్యవంతమైన మహిళగా జీవిస్తున్నాను. నా స్నేహితులంతా దూరమయ్యారు. అలాంటి సమయంలో ఓ వ్యక్తి నా జీవితంలోకి వచ్చాడు. నేను ఇప్పటివరకు పిల్లలను కనలేదు. నీకు ఈ విషయం సంతోషాన్ని కలిగించవచ్చు. కానీ, నేను పిల్లలను కనడానికి సిద్ధంగానే ఉన్నా. అమ్మాను జాగ్రత్తగా చూసుకుంటున్నా. నీకు అవసరమైనప్పుడు నేను అక్కడ లేకపోయాను. నాకు పెళ్లంటే భయంగా ఉంది. పెళ్లిలో నువ్వు లేకుండానే నేను నడావాలి. అన్ని బాగుంటాయని ధైర్యం చెప్పడానికి కూడా నువ్వు లేవు. నేను ఇప్పటికీ అలాగే ఉన్నా. ఎలాంటి మార్పు రాలేదు. నా బరువు కూడా పెరగలేదు. ఆ బరువు కేవలం తలకు మాత్రమే ఎక్కింది. నేను నిన్ను ఎంతో ప్రేమిస్తున్నా.. ఎంతో మిస్ అవుతున్నా’’ అని ఆ మేసేజ్‌లో పేర్కొంది.

ఊహించని విధంగా ఆమె మెసేజ్‌కు చనిపోయిన తండ్రి పోన్ నెంబరు నుంచి మెసేజ్ వచ్చింది. అయితే, అది తన తండ్రి పంపిన మెసేజ్ కాదు, బ్రాడ్ అనే వ్యక్తిది. ‘‘హాయ్, స్వీట్ హార్ట్.. నేను నీ తండ్రిని కాదు. కానీ గత నాలుగేళ్లుగా నీ మెసేజ్‌లు నా ఫోన్‌కు వస్తున్నాయి. ఉదయం, రాత్రి వేళల్లో పంపే మెసేజ్‌లు చూస్తూనే ఉన్నా. నా పేరు బ్రాడ్. 2014లో జరిగిన కారు ప్రమాదంలో నా కూతురును కోల్పోయాను. నువ్వు నా ఫోన్‌కు మెసేజ్ చేస్తున్నప్పుడల్లా.. అది దేవుడి నుంచి వచ్చిందని భావించేవాడిని. నీకు ఎంతో కావల్సిన వ్యక్తిని కోల్పోయినందుకు బాధగా ఉంది. కానీ, నిన్ను కొన్నేళ్ల నుంచి చూస్తున్నా. నీ ఎదుగుదల చూశాను. చాలాసార్లు నీకు రిప్లై ఇద్దామని భావించాను. కానీ, నీ గుండెను బద్దలు చేయడం నాకు ఇష్టం లేదు. నువ్వు అసాధారణ మహిళవు. బహుశా.. నా కూతురు బతికి ఉంటే నీలాగే ఉండేదేమో. రోజు నీ అప్‌డేట్స్‌ను పంపుతున్నందుకు ధన్యవాదాలు. నీ వల్ల దేవుడు ఉన్నాడని, నా కూతురు చనిపోవడానికి కారణం ఆయన కాదని తెలుసుకోగలిగాను. ఆయన నిన్ను ఇచ్చాడు. ఎప్పటిలాగే నీ మెసేజ్‌లు పంపిస్తూ ఉండు’’ అని ఆ వ్యక్తి మెసేజ్ ఇచ్చాడు.

చనిపోయిన జాసన్ నా సొంత తండ్రి కాదు: ఆమె ఫేస్‌బుక్ ద్వారా ఈ మెసేజ్‌ను షేర్ చేయడంతో క్షణంలో వైరల్ అయ్యింది. చాలామంది ఆమెకు సానుభూతి వ్యక్తం చేశారు. మరి, మెసేజ్‌లు కొనసాగిస్తావా అని కూడా అడిగారు. ఇందుకు ఆమె సమాధానం ఇస్తూ.. ‘‘చనిపోయిన జాసన్ నా సొంత తండ్రి కాదు. కానీ, నాకు ఊహ తెలిసిన రోజు నుంచి ఆయనే నా తండ్రిగా ఉన్నారు. నా స్కూల్‌లో జరిగే ఏ కార్యక్రమాన్ని ఆయన మిస్ కాలేదు. ఆయన నన్ను ఎంతో ప్రేమగా చూసుకొనేవారు. నాతో కలిసి నడిచేవారు. నాకు బాధ కలిగితే ఆయన ఏడ్చేవారు. నా బాయ్ ఫ్రెండ్స్‌ను పరిచయం చేస్తే అందరి తండ్రిలాగానే క్లాస్ పీకేవారు. ఆయన లేని లోటు ఎప్పటికీ భర్తీ చేయలేనిది. ఆయనను నా లైఫ్‌లో ఎంతో మిస్ చేస్తున్నాను. నేను నాలుగేళ్లుగా పంపుతున్న మెసేజ్‌లు వేరే వ్యక్తికి వెళ్తున్న సంగతి నాకు తెలీదు. భవిష్యత్తులో మళ్లీ మెసేజ్‌లు పంపిస్తానో లేదో కూడా ఇప్పుడే చెప్పలేను. కానీ, ఆయన నన్ను చూసి గర్వంగా ఉందని చెప్పడం, ఆయన కూడా తన కుమార్తెను కోల్పోయి బాధలో ఉన్నాడని చెప్పడం నన్ను కదిలించింది’’ అని ఆమె తెలిపింది.




Please Read Disclaimer