పెళ్లైన వారానికే పాలల్లో విషం కలిపి భర్తకు ఇచ్చింది

ఇష్టం లేని బంధాల్ని కష్టమ్మీదా కొనసాగించటం కష్టం. అలాంటి పరిస్థితి ఉంటే.. విడిపోవటానికి మించిన ఉత్తమమైన పని మరొకటి ఉండదు. అంతేకాదు.. అందుకు భిన్నంగా ఏ మాత్రం సంబంధం లేని వ్యక్తిని.. అందునా జీవిత భాగస్వామిని చంపేయాలన్న ఆలోచనకు మించిన చెత్త పని ఇంకేం ఉంటుంది. గతానికి భిన్నంగా ఇటీవల కాలంలో భర్తను.. భార్యలు చంపే ట్రెండ్ ఒకటి అంతకంతకూ పెరుగుతోంది. ఇంట్లో వాళ్లు నచ్చని పెళ్లి చేశారనో.. వివాహేతర సంబంధాల మోజులో పడి నిక్షేపంలాంటి మొగుడ్ని చంపేసి బతుకుల్ని ఆగమాగం చేసే దారుణమైన మైండ్ సెట్ ఈ మధ్యన ఎక్కువ అవుతోంది.

తాజాగా ఆ తరహా నేరాలకు పరాకాష్ఠంగా తాజా ఉదంతాన్ని చెప్పాలి. పెళ్లి చేసుకొని కేవలం వారం కూడా కాక ముందే.. భర్తను చంపేసే దారుణానికి తెర తీసిందో యువతి. బీహార్ లో చోటు చేసుకున్న ఈ దారుణం సంచలనంగా మారింది. బీహార్ లోని బేగుసరాయ్ జిల్లాకు చెందిన ఒక యువతికి ఒక యువకుడితో పెళ్లి చేశారు. ప్రేమించిన వాడిని కాదని.. తనకు నచ్చని యువకుడితో పెళ్లి చేయటాన్ని ఆమె ఒప్పుకోలేదు. తల్లిదండ్రుల బలవంతంతో సరేనంది.

పెళ్లి జరిగిన రెండు రోజులకే తన ప్రేమ వ్యవహారాన్ని భర్తకు చెప్పేసింది. పెళ్లి అయిపోయింది కదా.. పాత ప్రేమను మర్చిపోయి.. కొత్తగా బతుకుదామన్న భర్త మాటలకు పైకి ఓకే అన్నా.. మనసులో ఉన్న ప్రియుడికి ఫోన్ చేసి.. తనను తీసుకెళ్లిపోవాల్సిందిగా బతిమిలాండింది. భర్త ఉండగా తీసుకెళ్లను.. కావాలంటే… భర్తను అడ్డు లేకుండా తప్పించు.. వచ్చి తీసుకెళతానని చెప్పటంతో.. విచక్షణ కోల్పోయిన ఆ యువతి దారుణానికి పాల్పడింది.

పెళ్లై వారం కూడా కాక ముందే.. భర్తకు ఇచ్చే పాలలో విషాన్నికలిపి ఇచ్చేసింది. భార్యను నమ్మిన భర్త.. ఆ పాలను తాగటం.. అపస్మారక స్థితిలోకి చేరటం జరిగాయి. ఈ దారుణాన్ని గుర్తించిన కుటుంబ సభ్యులు అతడ్ని హుటాహుటిన ఆసుపత్రికి తరలించారు. భర్త తమ్ముడు ఇచ్చిన ఫిర్యాదు ఆధారంగా చేసుకొని భార్యను విచారించటంతో పాటు.. ఆమె చేసిన తప్పుడు పనికి షాక్ తిని అదుపులోకి తీసుకున్నారు. పచ్చని సంసారాన్ని నిప్పులు పోసుకోవటం.. లేదంటే బతుకును ఆగం చేసుకోవటం అంటే ఇదేనేమో?