వంటల తాత ‘గ్రాండ్‌పా‌ కిచెన్’ నారాయణ రెడ్డి ఇకలేరు.. కంటతడి పెట్టిస్తున్న వీడియో

0

వంటల తాత నారాయణ రెడ్డిని ప్రత్యేకంగా పరిచయం చేయక్కర్లేదు. యూట్యూబ్‌లో ‘గ్రాండ్‌పా కిచెన్’ పేరుతో అప్‌లోడ్ చేసిన ఆయన వంటల వీడియోలకు ప్రపంచవ్యాప్తంగా అభిమానులు ఉన్నారు. తనదైన శైలిలో సంప్రదాయ, ఆధునిక వంటకాలను పెద్ద మొత్తంలో అత్యంత సులభంగా వండటమే కాకుండా.. ఆ వంటకాలను అనాథ పిల్లలకు వడ్డిస్తూ ప్రపంచానికి మంచిని పంచిన ఆ వంటల తాత ఇకలేరు. ఆయన మృతితో యూట్యూబ్ చిన్నబోయింది.

తెలంగాణకు చెందిన వంటల తాత నారాయణ రెడ్డి ఆదివారం (అక్టోబర్ 27) మృతి చెందారు. ఈ విషయం ఆలస్యంగా వెలుగులోకి వచ్చింది. నారాయణ రెడ్డి ఫైనల్ జర్నీపై యూట్యూబ్‌లో గురువారం 5 నిమిషాల నిడివి గల ఓ వీడియోను పోస్టు చేశారు. దీంతో ఆయన ఇకలేరనే విషయం ప్రపంచానికి తెలిసింది.

నారాయణ రెడ్డి వంటల వీడియోలతో నడుపుతున్న ‘గ్రాండ్‌పా కిచెన్’ యూట్యూబ్ ఛానెల్‌కు 6.11 మిలియన్ సబ్‌స్క్రైబర్స్ ఉన్నారంటే ఆయన ఎంత పాపులరో అర్థం చేసుకోవచ్చు. ఆగస్టు 2017న ప్రారంభించిన ఈ ఛానెల్‌లో వివిధ వంటలకు సంబంధించి మొత్తం 220 వీడియోలు పోస్టు చేశారు.

ఫ్రెంచ్ ఫ్రైస్ తయారీపై నారాయణ రెడ్డి పోస్టు చేసిన వీడియోకు అత్యధికంగా 37 మిలియన్ వ్యూస్ వచ్చాయి. 100 మ్యాగీ నూడుల్స్ ప్యాకెట్స్‌ను ఉపయోగించి ఆయన చేసిన వంట వీడియో రెండో స్థానంలో నిలిచింది. నారాయణ రెడ్డి వంటల వీడియోలకు మొత్తం 600 మిలియన్ల వ్యూస్ వచ్చాయి. ఆయన ఫేస్‌బుక్ పేజీకి 5.3 లక్షల ఫాలోవర్లు ఉన్నారు.

ఆంగ్లంలో ప్రావీణ్యం లేకపోయినా..
నారాయణ రెడ్డికి ఇంగ్లిష్‌ భాషలో పెద్దగా ప్రావీణ్యం లేకపోయినా.. వచ్చీ రాని ఇంగ్లిష్ మాటలతో వంటల విధానాన్ని వర్ణిస్తారు. ప్రపంచంలో ఏ భాష మాట్లాడేవారికైనా అది ఇట్టే అర్థమవుతుంది. అందుకే అంత మంది అభిమానులను సంపాదించుకున్నారు. ఆయన వంటకాలపై విదేశీ మీడియాలోనూ ప్రత్యేక కథనాలు వచ్చాయి. మటన్ కరీ, చికెన్ బిర్యానీ నుంచి మొదలుకొని బర్గర్లు, చిప్స్, కేకులు, మిల్క్‌షేక్స్ తయారీ వరకు అనేక వంటకాలపై ఆయన వీడియోలు ఉన్నాయి. నిజాం నవాబుల బిరియానీ నుంచి ఆధునిక వంటలన్నీ వండుతారు. వాటితో అనాథల కడుపు నింపుతారు.

నారాయణ రెడ్డి ఫైనల్ జర్నీ వీడియో..

లవింగ్.. కేరింగ్.. షేరింగ్..
ఇక మన వంటల తాత వంటలంటే.. అదేదో కుటుంబానికి మాత్రమే సరిపోతాయనుకుంటే పొరపాటే. వంటకాలను పరిచయం చేస్తూనే.. వందలాది మందికి సరిపడా వంట చేయడం నారాయణ రెడ్డి ప్రత్యేకత. వంట పూర్తైన తర్వాత వందలాది మంది అనాథ పిల్లలకు వడ్డించడం వీడియో చివర్లో కనిపిస్తుంది.

‘మంచిని పది మందికి పంచు’ అనేది నారాయణ రెడ్డి నినాదం. ఆయన వీడియోలన్నీ ‘లవింగ్.. కేరింగ్.. షేరింగ్..’ అనే మాటతో మొదలవుతాయి. నారాయణ రెడ్డి మృతిపై రూపొందించిన వీడియోలోనూ నిర్వాహకులు ఇదే విషయాన్ని ప్రధానంగా ప్రస్తావించారు. ‘మంచిగా జీవించండి.. మంచి చేయండి.. మంచిని పంచండి’ అంటూ ఇచ్చిన సందేశం అభిమానులను కంటతడి పెట్టిస్తోంది. ఆయన మృతికి నివాళి అర్పిస్తూ వేలాది మంది కామెంట్లు పెడుతున్నారు.

మీసం మెలేస్తూ చిరునవ్వు చిందించే నారాయణ రెడ్డి వయసు మరణించే నాటికి 73 ఏళ్లు. యూట్యూబ్‌లో చివరిసారిగా ఆయన అక్టోబర్ 24న కనిపించారు. తన వంటలకు సంబంధించిన ఆసక్తికర వివరాలను లైవ్ స్ట్రీమింగ్ ద్వారా అభిమానులతో పంచుకున్నారు. అయితే.. తన వంటల ద్వారా ప్రపంచవ్యాప్తంగా పాపులారిటీ సంపాదించిన ఈ తెలంగాణ తాత స్వస్థలం, వ్యక్తిగత వివరాలు, కుటుంబ నేపథ్యం గురించి వివరాలు తెలియాల్సి ఉంది.




Please Read Disclaimer