మహిళలకు శుభవార్త చెప్పిన సీఎం జగన్

0

ఆంధ్రప్రదేశ్ ముఖ్యమంత్రి వైఎస్ జగన్‌మోహన్‌రెడ్డి శుభవార్త చెప్పారు. రాష్ట్రవ్యాప్తంగా మార్కెట్‌ యార్డ్ కమిటీ ఛైర్మన్ల పదవులు సగం మహిళలకే ఇవ్వాలని ఆదేశించారు. ఈ మార్కెట్ యార్డ్ కమిటీల్లో సభ్యులు కూడా సగం మహిళలకే ఇవ్వాలని ఇదివరకే జీవో ఇచ్చామన్న సీఎం.. అక్టోబరు చివరినాటికి భర్తీకి చర్యలు తీసుకోవాలన్నారు. గురువారం ముఖ్యమంత్రి మార్కెటింగ్, సహకార శాఖలపై సమీక్ష నిర్వహించారు. ధదరల స్థిరీకరణ, మార్కెట్లలో కనీస సదుపాయాలు, మిల్లెట్స్‌ బోర్డులపై రివ్యూ చేశారు. సహకార రంగం పటిష్టతపై మంత్రులు కన్నబాబు, మోపిదేవి వెంకటరమణ, అధికారులతో చర్చించారు.

మూడు మార్గాల్లో వ్యవసాయ ఉత్పత్తులు, వాటికున్న డిమాండ్, వివిధ ప్రాంతాల్లో ధరలపై ఎప్పటికప్పుడు సమాచారం ఇవ్వాలన్నారు సీఎం. ఇప్పుడున్న అగ్రికల్చర్‌ మార్కెట్‌ కమిటీలు, అగ్రివాచ్‌తో సహా మరో ఏజెన్సీ ఏర్పాటుకు గత సమీక్షలో నిర్ణయం తీసుకోగా.. దీనిపై ప్రతిపాదనల్ని అధికారులు వివరించారు. వ్యవసాయ ఉత్పత్తుల భవిష్యత్‌ ధరలు, బిజినెస్‌ కన్సల్టెన్సీ, ధరల స్థిరీకరణ నిధి నిర్వహణ, వ్యవసాయ ఉత్పత్తులకు అదనపు విలువ జోడించడం.. ఈ ఏజెన్సీ విధులుగా ఉండాలని ముఖ్యమంత్రి దిశానిర్దేశం చేశారు. నిపుణులను ఇందులో ఉండేలా చర్యలు తీసుకోవాలన్నారు.

పప్పు ధాన్యాల కొనుగోళ్ల కేంద్రాలపై ముఖ్యమంత్రి ఆరా తీశారు. ఆరు తడి పంటల వివరాలను ఆన్‌లైన్‌లో రైతులు నమోదు చేయించుకోవాలని అధికారులు చెప్పారు. ఆరుతడి పంటలపై అక్టోబరు 10 నుంచి రైతులు రిజిస్ట్రేషన్‌ చేసుకోవాలన్నారు. అక్టోబరు 15 నుంచి కొనుగోలు ప్రారంభిస్తామన్నారు. అలాగే 85 రైతు బజార్లలో రూ.25లకే కిలో ఉల్లిపాయలు విక్రయించామని అధికారులు తెలిపారు. 660 మెట్రిక్‌ టన్నులు వినియోగదారులకు ఇచ్చామన్నారు అధికారులు. రూ. 32లకే కిలో ఉల్లి ధరను అదుపు చేయగలిగామన్నారు. మళ్లీ ధరలు పెరిగిన క్రమంలో ఆదుకోవడానికి సిద్ధంగా ఉన్నామన్నారు. రాష్ట్రంలో ఇప్పుడు సరిపడా నిల్వలు ఉన్నాయా? లేదా? అని అధికారుల్ని అడిగి సీఎం వివరాలు తెలుసుకున్నారు. అలాగే టమోటాల నిల్వలపైనా ఆరా తీశారు.

ఇటు రాయలసీమ ప్రాంతాన్ని చిరు ధాన్యాలు (మిల్లెట్స్‌) హబ్‌గా మార్చాలన్నారు ముఖ్యమంత్రి. 9 నెలలపాటు గ్రీన్‌ కవర్‌ ఉండేలా చూడాలన్నారు. మిల్లెట్స్‌ బోర్డులో కూడా నిపుణులకు పెద్దపీట వేయాలని సూచించారు. వ్యవసాయ విధానాలు, మార్కెటింగ్, ప్రొసెసింగ్‌ అన్నీ బోర్డు పరిధిలో ఉంచాలన్నారు. మిల్సెట్స్‌ బోర్డు విధివిధానాలపై సమావేశంలో చర్చించారు.. అక్టోబరు చివరినాటికి ఏర్పాటుకు చర్యలు తీసుకోవాలన్నారు సీఎం.

కందులు, మినుములు, పెసలు, శెనగలు, టమోటా, పత్తి పంటలకు భవిష్యత్తు ధరలు ఎలా ఉంటాయన్న దానిపై సమావేశంలో చర్చించారు. ధరల విషయంలో ప్రభుత్వం జోక్యం చేసుకున్న తర్వాత పరిస్థితి కచ్చితంగా మారాలన్నారు ముఖ్యంత్రి. రైతులకు కచ్చితంగా భరోసా ఇచ్చామని.. నమ్మకం కలగాలన్నారు. క్షేత్రస్థాయి వరకూ అది జరగాలన్న సీఎం.. పంట వేసినప్పుడు వాటికి ధరలు ప్రకటించే పరిస్థితి ఉండాలన్నారు. ఆ ధర ఏమాత్రం తగ్గుతున్నా.. ఆదుకోవడానికి తగిన ప్రణాళికలతో ప్రభుత్వం సిద్ధంగా ఉండాలన్నారు.

దళారీలకు పంటలను తెగ నమ్ముకోవాల్సిన పరిస్థితి ఉండకూడదన్నారు సీఎం జగన్. దళారులు లేకుండా వ్యవసాయ ఉత్పత్తులు విక్రయాలు జరగాలి అన్నారు. అరటి, చీనీ, మామిడి, కమలాపండ్ల, బొప్పాయి సహా ఏ పంట విషయంలోనైనా దళారులు లేకుండా చూడాలని జగన్ సూచించారు. 6 నెలల్లోగా దళారీ వ్యవస్థను నిర్మూలించాలని.. అధికారులు దీన్ని సవాల్‌గా తీసుకోవాలన్నారు. మార్కెటింగ్‌లో ప్రభుత్వం అనుసరించే విధానాలు రైతుల ప్రయోజనమే లక్ష్యం కావాలి అన్నారు. గ్రామ సచివాలయాల్లోనే ఈ క్రాప్‌ వివరాలు, ధరలు ప్రకటించాలన్నారు ముఖ్యమంత్రి. కనీస మద్దతు ధరలు లేని పంటలకూ ధరలు ప్రకటించాలన్నారు. రైతుకు నష్టం రాకుండా ఉండేలా ఈ ధరలు నిర్ణయించాలన్నారు. పంటల దిగుబడులు కూడా ఏ స్థాయిలో ఉంటాయన్న దానిపై అంచనాలు రూపొందించాలన్నారు. గత ఏడాదితో పోల్చి ఈ వివరాలు తయారుచేయాలని సూచించారు.




Please Read Disclaimer