వైసీపీకి ఎంపీ రఘురామకృష్ణంరాజు ట్విస్ట్.. సంచలన నిర్ణయం

0

షోకాజ్ నోటీస్ జారీపై ఏపీ హైకోర్టులో రఘురామకృష్ణంరాజు పిటిషన్ దాఖలు చేశారు. షోకాజ్ నోటీసులోని లోపాలపై ఈసీ నుంచి స్పష్టత వచ్చే వరకు ఎలాంటి చర్యలు ఉండరాదని హైకోర్టును కోరారు. వైఎస్సార్‌సీపీ పేరుపై మరో పార్టీ ఉన్నందున షోకాజ్ నోటీసు చెల్లడంపై ఎన్నికల కమిషన్‌ను వివరణ కోరినట్లు పిటిషన్‌లో ప్రస్తావించారు. తనపై చర్యలు తీసుకునేందుకు క్రమశిక్షణ కమిటీ సమావేశం కాలేదని.. హైకోర్టుకు తెలియజేయనున్నారు.

తాను యువజన శ్రామిక రైతు కాంగ్రెస్ పార్టీ తరపున ఎన్నికయ్యానని.. వైఎస్సార్‌ కాంగ్రెస్ పార్టీ లెటర్ హెడ్‌పై షోకాజ్ నోటీసు ఇచ్చారని రఘురామ కృష్ణరాజు పేర్కొన్నారు. పార్టీ వ్యతిరేక కార్యకలాపాలకు తాను ఎక్కడా పాల్పడలేదన్నారు. కానీ వైసీపీ ఆ ఎంపీలు అదే కారణం చూపిస్తూ అనర్హత పిటిషన్ ఇచ్చేందుకు ఢిల్లీ వెళ్తున్నారని పేర్కొన్నారు. అత్యవసర పిటిషన్లను మాత్రమే విచారిస్తున్న హైకోర్టు.. ఎంపీ రఘురామకృష్ణరాజు పిటిషన్‌ను సోమవారం విచారించే అవకాశం ఉంది. రఘురామపై వైఎస్సార్‌సీపీ ఎంపీలు లోక్‌సభ స్పీకర్‌కు ఫిర్యాదు చేసేందుకు సిద్ధమయ్యారనే వార్తలు వస్తున్న సమయంలో ఆయన హైకోర్టులో పిటిషన్ వేయడం ఆసక్తికరంగా మారింది.

శుక్రవారం లోక్‌సభ స్పీకర్‌ ఓంబిర్లాను వైఎస్సార్‌సీపీ ఎంపీలు, న్యాయనిపుణులు కలవనున్నట్లు తెలుస్తోంది. రఘురామకృష్ణంరాజుపై అనర్హత వేటు వేయాలని స్పీకర్‌ను ఎంపీలు కోరనున్నారు. ఎంపీలకు స్పీకర్‌ అపాయింట్‌మెంట్ కూడా ఇచ్చినట్లు తెలుస్తోంది. వీరంతా ప్రత్యేక విమానంలో న్యాయనిపుణులతో ఎంపీలు ఢిల్లీకి వెళ్లనున్నట్లు ప్రచారం జరుగుతోంది. శుక్రవారం మధ్యాహ్నం తర్వాత స్పీకర్‌ను ఎంపీలు కలవబోతున్నారని తెలుస్తోంది. ఎంపీలు స్పీకర్‌ను కలుస్తారన్న వార్తలతో రాజకీయం మళ్లీ వేడెక్కిందనే చెప్పాలి. రఘురామ కూడా ఢిల్లీలోనే ఉండటం ఆసక్తికరంగా మారింది.

రఘురామకృష్ణంరాజు సొంత పార్టీ నేతలపై, ప్రభుత్వం చేసిన వ్యాఖ్యల్ని అధిష్టానం సీరియస్‌గా తీసుకుంది. వారంలోగా సమాధానం ఇవ్వాలని షోకాజ్ నోటీసులు పంపారు. కానీ ఆయన మాత్రం సమాధానం కాకుండా రిప్లై అంటూ ట్విస్ట్ ఇచ్చారు. ఏకంగా పార్టీకే టెండర్ పెట్టారు.. అలాగే క్రమశిక్షణ కమిటీ లేదన్నారు. అలాగే సీఎం జగన్‌కు మరో లేఖ రాశారు.