అలీకి షాక్.. బిగ్ బాస్ 3 ఫైనల్‌లో రాహుల్

0

ఏంటి బిగ్ బాస్ ఇది.. ఇలాంటి బురద టాస్క్‌లు ఇవ్వమన్నదెవ్వడు.. కొట్టుకుచచ్చాక రద్దు చేయడం దేనికి? ప్రస్తుతం బిగ్ బాస్ హౌస్‌ రణరంగంగా మారింది. టైటిల్ రేస్‌లో కంటెస్టెంట్స్ బలప్రయోగానికి దిగే టాస్క్‌లు ఇచ్చారు. బిగ్ బాస్ విన్నర్‌ అయ్యేందుకు మరో రెండు వారాలు మాత్రమే ఉండటంతో కొట్టుకోవడం, తిట్టుకోవడమే కాకుండా రక్తపాతానికి కూడా వెనకాడటం లేదు కంటెస్టెంట్స్. మంగళవారం నాటి ఎపిసోడ్‌లో బాబా, అలీల టిక్కెట్ టు ఫినాలే టాస్క్‌లో గెలివడం కోసం వాళ్లు కొట్టుకున్న తీరు హింసాత్మకంగా మారింది.

మట్టిలో మొక్కల కోసం కొట్లాట.. ప్రాణాలకు తెగించి పోరాటం
టికెట్ టు ఫినాలే టాస్క్‌లో భాగంగా.. బాబా భాస్కర్, అలీ రెజాకు బలమైన టాస్క్ ఇచ్చారు బిగ్ బాస్. వారి ముందు ఒక మడ్ పిట్, రెండు రకాల పూలు ఉంచారు. ఒక్కొక్కరూ ఒక్కో రకం పూలు ఎంచుకోవాలని చెప్పారు. బజర్ మోగగానే ఎవరికి వారు తమ పూలను ఆ బురద మట్టిలో నిలబెట్టాలి. ఒకరి పూలను ఇంకొకరు లాగే ప్రయత్నం చేయొచ్చు. ముందు వార్నింగ్ బెల్ మోగుతుంది. ఆ తరువాత కొంత సేపటికి ఎండ్ బెల్ మోగుతుంది. ఎండ్ బెల్ మోగిన సమయానికి మడ్ పిట్‌లో ఎవరి పూలయితే ఎక్కువగా ఉంటాయో వారు గెలిచినట్టు. అయితే ఈ టాస్క్ బిగ్ బాస్ చెప్పినంత ఈజీగా లేదు. ఈ మట్టిలో కొట్లాటకు ప్రాణాలను పణంగా పెట్టేందుకు రెడీ అయ్యారు బాబా, అలీలు.

తొట్టెలో మొక్కలను పాతడం కోసం పోటీ పడ్డ అలీ, బాబాలు ఒకర్నొకరు తోసుకోవడంతో మొదలుపెట్టి కొట్టుకుని ఒకర్నొకరు ఎత్తు పడేసుకునే వరకూ వెళ్లారు. బాబా భాస్కర్‌ని అయితే తన సిక్స్ ప్యాక్ బాడీతో ఫుడ్ బాల్ ఆడేశాడు అలీ. బాబా ఎంత ప్రయత్నించినా తొట్టెలో పూలు పెట్టకుండా అడ్డుకున్నాడు. బాబా కూడా గట్టిగానే పోరాడాడు. ఇద్దరూ మల్లయోధులుగా మారారు. ఒకానొక సందర్భంలో ఈ ఇద్దరూ తలలు కాని పగలు కొట్టుకుంటారా? అని భయం ఏర్పడేలా చేశారు. ఇంటిలో ఉన్న శ్రీముఖి అయితే భయంతో వణికిపోయింది.

అయితే అలీ, బాబాలు మాత్రం వెనక్కితగ్గలేదు. ప్రాణం పోయినా పర్లేదు అనుకున్నారా ఏమో కాని ఒళ్లు కుళ్లబొడుచేసుకున్నారు. అత్యంత జుగుప్సాకరంగా సాగుతున్న ఈ ఆటలో విన్నర్ ఎవరో తేలేలోపే ఎవరో ఒకరు పోయేట్టు కనిపించారు. దీంతో పాత సినిమాల్లో క్లైమాక్స్‌లో పోలీస్‌లు వచ్చి విలన్స్‌ని అరెస్ట్ చేసినట్టుగా బిగ్ బాస్ ఎంట్రీ ఇచ్చి ఒళ్లు హూనం చేసుకున్న తరువాత ఈ టాస్క్‌ని రద్దు చేశారు.

అలీకి షాక్.. ఫినాలే టికెట్ గల్లంతు
ఈ టాస్క్‌లో భాగంగా బిగ్ బాస్ అలీని హెచ్చరించినా.. బాబా భాస్కర్‌ని తలతో కొట్టడం.. చేతులతో నెట్టడం బల ప్రదర్శన చూపించడం వల్ల టిక్కెట్ టు ఫినాలే నుండి అలీని తప్పిస్తున్న ప్రకటించారు. ఈ టాస్క్‌ను తక్షణమే రద్దు చేస్తూ.. టాస్క్‌ను రద్దు చేయడం వల్లన ఈ టాస్క్‌లో ఎవరూ విన్నర్‌ని కాలేరని ప్రకటించారు బిగ్ బాస్. అలీని చివరిసారిగా హెచ్చిరస్తూ.. టిక్కెట్ టు ఫినాలే టాస్క్‌నుండి అలీని తప్పించారు.

అంతాబాగానే ఉంది కాని.. ఒక తొట్టి ఇచ్చి అందులో మొక్కలు పాతుకోండి.. నచ్చకపోతే పీక్కోండని పిచ్చి టాస్క్‌లు ఇవ్వడం ఎందుకు? వాళ్లు కొట్టుకుని చచ్చిపోతే వరకూ వెళ్లివరకూ ఆటను ఆడించడం ఎందుకు? కష్టపడి ఒళ్లు హూనం చేసుకున్నాక టాస్క్‌ను రద్దు చేయడం ఎందుకు? అదేదో టాస్క్ ఇచ్చే ముందు ఆలోచిస్తే ఇలాంటి కొట్లాటలు జరగవుగా బిగ్ బాస్.

టిక్కెట్ టు ఫినాలే విజేతగా రాహుల్.. మిగిలిన వాళ్లు నామినేషన్‌లో
ఈ టాస్క్‌లో భాగంగా మెరుగైన ప్రదర్శన ఇచ్చిన రాహుల్‌ని టికెట్ టు ఫినాలే టాస్క్ విజేతగా నిలిచాడు. మిగిలిన వరుణ్, అలీ, శ్రీముఖి, బాబా, శ్రీముఖి, శివజ్యోతిలు ఈవారం నామినేషన్స్‌లో నిలిచారు. ఈ ఐదుగురిలో ఒకరు ఈవారం బిగ్ బాస్ హౌస్‌ నుండి బ్యాగ్ సర్దేయనున్నారు. మొత్తంగా రాహుల్‌కి టికెట్‌ టు ఫినాలే రావడంతో బిగ్ బాస్ సీజన్ 3లో ఫైనల్‌కి వెళ్లిన తొలి కంటెస్టెంట్ అయ్యాడు. ఈ సందర్భంగా తన తల్లికి ఇచ్చిన మాటను గుర్తు చేసుకున్నాడు రాహుల్. ‘మమ్మీ టాస్క్‌లు బాగా ఆడు అని నువ్ చెప్పావ్.. నేను నీకు మాట ఇచ్చా చేస్తా అని.. ఆ మాటను నేను ఫైనల్‌కి చేరడం ద్వారా నెరవేర్చా’ అన్నాడు రాహుల్. బిగ్ బాస్ అప్డేట్స్ కొనసాగుతాయి.. మరిన్ని వివరాలు రేపటి ఎపిసోడ్‌లో.




Please Read Disclaimer