బిగ్ బాస్ హౌస్‌లో సుమక్క.. బాత్‌రూంలో డిస్కషన్లు

0

బిగ్ బాస్ హౌస్‌లో ఉన్న ఐదుగురు ఫైనలిస్టులు దీపావళి జరుపుకున్నారు. దీపావళి రోజు వాళ్లతో ప్రముఖ యాంకర్ సుమ జాయిన్ అయ్యారు. సుమ ఎంట్రీతో హౌస్‌మేట్స్ శ్రీముఖి, బాబా భాస్కర్, అలీ, వరుణ్, రాహుల్ ఆశ్చర్యానికి గురయ్యారు. అంతా ఆమెకు ఆత్మీయ స్వాగతం పలికారు. ఆ తరవాత సుమ హౌస్‌లో బాగానే హంగామా చేశారు. ప్రేక్షకుల్లో ఒకరిగా తాను హౌస్‌లోకి అడుగుపెట్టానని, తానే స్వయంగా తిరిగి అన్నీ తెలుసుకుంటానని ముందుగానే అందరికీ సుమ చెప్పేశారు.

మొదటిగా బెడ్‌రూంలోకి వెళ్లిన సుమ ఒక్కొక్కరి బెడ్ వద్ద ఏమేమి ఉన్నాయని ఆరా తీశారు. కొంత మందిని ఆటపట్టించారు. ముఖ్యంగా రాహుల్‌ను పునర్నవి పేరుతో కొన్ని పంచ్‌లు వేశారు. హౌస్‌లో అమ్మాయిలు చాలా బాగా రెడీ అవుతారని.. మీకు ఎవరైనా మేకప్ వేస్తారా అని శ్రీముఖిని సుమ అడిగారు. దీనికి శ్రీముఖి సమాధానం చెబుతూ.. తమ మేకప్ తామే వేసుకుంటామని చెప్పింది. వితికా ఉన్నప్పుడు హెయిర్ స్టైల్ చేసేదని వెల్లడించింది. అలాగే, తమ మేకప్ కిట్‌ను సుమకు చూపించింది.

ఆ తరవాత కిచెన్‌ను పరిశీలించారు సుమ. బాబా భాస్కర్ వంటలు బాగా చేస్తారని అంతా ఏకగ్రీవంగా సుమకు చెప్పారు. అక్కడ కబుర్లు చెప్పుకున్న తరవాత తాను బాత్‌రూం చెక్ చేయాలని సుమ ఇంటి సభ్యులను అడిగారు. దీంతో ఆమెను అంతా కలిసి అక్కడికి తీసుకెళ్లారు.

‘‘బాత్‌రూంలో కూడా ఏసీ ఉంది. ఒకవేళ మీరంతా ఇంటికెళ్తే ఏం చేస్తారు’’ అని నవ్వుతూ అడిగారు సుమ. ఆ తరవాత అక్కడే వాళ్లతో డిస్కషన్ పెట్టారు. చిన్నప్పుడు దీపావళి రోజు ఏం చేసేవారో చెప్పండి అంటూ బాబా భాస్కర్‌ను సుమ అడిగారు. చిన్నప్పుడు దీపావళి బాగానే జరుపుకునేవాడినని, నాన్న తీసుకొచ్చే టపాసుల కోసం వేచి చూసేవాడినని బాబా భాస్కర్ చెప్పారు. తన తండ్రికి ట్రావెల్స్ ఉండేదని.. ఆ తరవాత రాజకీయాల్లోకి వచ్చి కౌన్సెలర్ అయ్యారని వెల్లడించారు. ఆ తరవాత కూడా ఐదుగురితో కబుర్లు చెప్పిన సుమ మళ్లీ తిరిగి కిచెన్ దగ్గరకి తీసుకెళ్లారు.

ఇంట్లోకి వచ్చిన అతిథి సుమ కోసం బిగ్ బాస్ మటన్ బిర్యానీకి అవసరమయ్యే సామగ్రి అంతంటినీ పంపించారు. దీంతో మటన్ బిర్యాని చేసుకుని అతిథితో కలిసి దీపావళిని మరింత ఆనందంగా జరుపుకోవాలని బిగ్ బాస్ సూచించారు. శ్రీముఖి, బాబా భాస్కర్ కలిసి వంట మొదలుపెట్టారు. ఓవైపు వాళ్లు వంట చేస్తుంటే.. మరోవైపు సుమ ఎంటర్‌టైన్మెంట్ కార్యక్రమాలు మొదలుపెట్టారు. రాహుల్, వరుణ్‌తో పాటలు పాడించారు. వంట కార్యక్రమం పూర్తయిపోయిన తరవాత మరో ఎంటర్‌టైన్మెంట్ ప్రోగ్రాంను సుమ మొదలుపెట్టారు.

ఫన్నీ టాస్క్‌తో నవ్వులే నవ్వులు
ఇంటి సభ్యులకు బిగ్ బాస్ ఒక ఫన్నీ టాస్క్ ఇచ్చారు. దీనికి న్యాయనిర్ణేతగా అతిథి సుమను ఉండమని బిగ్ బాస్ సూచించారు. టాస్క్ ఏంటంటే.. ఇంటి సభ్యులు ఒకరి తరవాత ఒకరు హెడ్‌ఫోన్స్‌ను ధరించాలి. ఆ హెడ్‌ఫోన్స్‌లో మ్యూజిక్ ప్లే అవుతుంది. ఆ సమయంలో సుమ కార్డ్స్‌లోని వాక్యాలను చదివి వినిపిస్తారు. హెడ్‌ఫోన్స్ ధరించిన సభ్యుడు సుమ చెప్పిన వాక్యాన్ని కరెక్ట్‌గా చెప్పాలి. ఈ టాస్క్‌లో గెలిచిన వారు బెస్ట్ ఎంటర్‌టైనర్‌గా నిలుస్తారు. ఈ బెస్ట్ ఎంటర్‌టైనర్‌ను సుమ నిర్ణయిస్తారు. ఈ టాస్క్‌లో బెస్ట్ ఎంటర్‌టైనర్‌గా నిలిచినవారు తమ ఫ్యాన్ నుండి ఫోన్ కాల్ మాట్లాడే అవకాశాన్ని గెలుచుకుంటారని బిగ్ బాస్ వెల్లడించారు.

ఈ టాస్క్‌లో ముందుగా శ్రీముఖి పాల్గొన్నారు. సుమ చదివిన మూడు వాక్యాలను శ్రీముఖి కరెక్ట్‌గా చెప్పేసింది. ఆ తరవాత బాబా భాస్కర్ హెడ్‌ఫోన్స్ పెట్టుకున్నారు. తెలుగు సరిగా మాట్లాడలేని బాబా భాస్కర్.. సుమ చదివిన వాక్యాలు చెప్పడానికి ముప్పుతిప్పలు పడ్డారు. ఇక ఆ తరవాత వచ్చిన వరుణ్ సందేశ్‌తో పిచ్చ కామెడీ పండింది. ‘‘బుజ్జిగాడు బజ్జీలు తిని బుజ్జిగా బజ్జున్నాడు’’ అని సుమ వాక్యం చదివితే.. దానికి వరుణ్ ‘‘పుచ్చకాయ పచ్చిగా ఉంది, పుచ్చకాయ పెద్దగా ఉంది’’ అని అందరినీ తెగ నవ్వించాడు.

ఇదే ప్రశ్నను సుమ మూడు సార్లు మూడు వాక్యాల కింద వరుణ్ అని అడిగారు. మూడోసారి వరుణ్ కరెక్ట్‌గా చెప్పాడు. అయితే, ఈ మూడు వేర్వేరు వాక్యాలని వరుణ్ అనుకోవడం విశేషం. వరుణ్ తరవాత అలీ రెజా రంగంలోకి దిగాడు. ‘‘లక్ష భక్ష్యములు భక్షించుట లక్ష్మయ్యకు సాధ్యమా’’ అని అలీకి సుమ చెప్పారు. దీంతో అక్కడ ఒక్కటే నవ్వులు. అలీ హావభావాలు అయితే వర్ణనాతీతం. చివరిగా రాహుల్‌కు మూడు వాక్యాలను సుమ సంధించారు. వీటిలో ఒక్కదానికి రాహుల్ సమాధానం చెప్పాడు. మొత్తంగా ఈ ఫన్నీ టాస్క్‌లో బాగా నవ్వించని వరుణ్‌ను విజేతగా సుమ ప్రకటించారు.

కుక్కల్ని మొరిగించిన సుమ
ఫన్నీ టాస్క్ అయిపోయిన తరవాత అంతా కలిసి భోజనం చేశారు. బాబా భాస్కర్ చేసిన మటన్ బిర్యానీని సుమకు రుచి చూపించారు. బిర్యానీ చాలా బాగుందని సుమ కితాబిచ్చారు. అయితే, బిర్యానీతో ఫిజ్ ఉంటే బాగుంటుందని శ్రీముఖి ఆరాపటడింది. కానీ, తమకు తాగే అవకాశం లేదని కనీసం సుమక్కకైనా ఇవ్వండి అంది. వెంటనే, అలీ ఒక ఫిజ్ తీసి సుమకు ఇచ్చాడు. ఆ వెంటనే ఒక బెల్ మోగింది.. లెటర్ వచ్చింది. ఈరోజు ఇంటి సభ్యులందరూ ఫిజ్ తాగొచ్చని రాసుంది. ఇక శ్రీముఖి పెద్ద కేక పెట్టి ఆ తరవాత ఫిజ్ తాగేసింది.

కడుపు నిండా భోజనం చేసిన తరవాత కాసేపు నిద్రపోతే బాగుంటుందని సుమ ఇంటి సభ్యులతో అన్నారు. తాను పడుకుంటే కుక్కలు మొరుగుతాయో లేదో టెస్ట్ చేద్దామంటూ బెడ్‌పై దుప్పటి కప్పుకుని పడుకున్నారు. వెంటనే కుక్కలు మొరగడం మొదలుపెట్టాయి. అంటే, ప్రేక్షకులు వచ్చినా ఇంట్లో పడుకోకూడదు అని అర్థమైందని సుమ అన్నారు. టీవీ చూస్తున్న ప్రేక్షకులు కూడా నిద్ర పోవడానికి వీళ్లేదు.. కుక్కలు మొరుగుతాయి జాగ్రత్త అంటూ నవ్వించారు. దీంతో ఎపిసోడ్ ముగిసింది. రేపటి ఎపిసోడ్‌లో ఇంటి సభ్యులతో కలిసి సుమ సరదాగా టపాసులు కాల్చనున్నారు.




Please Read Disclaimer