పోలీస్ ఆఫీసర్‌గా అల్లు అర్జున్.. బయటికొచ్చిన సూపర్ లుక్

0

స్టైలిష్ స్టార్ అల్లు అర్జున్‌ను కంప్లీట్ పోలీస్ ఆఫీసర్ లుక్‌లో ఇప్పటి వరకు ఆయన అభిమానులు కానీ, ప్రేక్షకులు కానీ చూడలేదు. ‘రేసుగుర్రం’ సినిమాలో పోలీస్ ఆఫీసర్‌గా బన్నీ స్టన్నింగ్ ఎంట్రీ ఇచ్చినా ఆ లుక్ ప్రొఫెషనల్‌గా అనిపించదు. అందులో కమర్షియల్ హంగులు ఎక్కువగా కనిపిస్తాయి. కానీ, లేటెస్ట్‌గా విడుదలైన అల్లు అర్జున్ పోలీస్ లుక్ మాత్రం అదిరిపోయింది. బన్నీ బాడీ స్ట్రక్చర్‌కి పోలీస్ గెటప్ భలే కుదిరింది. అయితే, ఈ లుక్ ఇప్పటిది కాదు. ‘

DJ – దువ్వాడ జగన్నాథమ్’ సినిమాలోది. కానీ, ఈ స్టిల్ ఇప్పటి వరకు బయటికి రాలేదు.

అల్లు అర్జున్, పూజా హెగ్డే జంటగా హరీష్ శంకర్ దర్శకత్వంలో వచ్చిన సినిమా ‘దువ్వాడ జగన్నాథం’. శ్రీ వెంకటేశ్వర క్రియేషన్స్ బ్యానర్‌పై దిల్ రాజు ఈ చిత్రాన్ని నిర్మించారు. దేవిశ్రీ ప్రసాద్ సంగీతం సమకూర్చారు. 2017 జూన్ 23న ఈ చిత్రం విడుదలైంది. బాక్సాఫీసు వద్ద మంచి వసూళ్లు రాబట్టింది. ఈ చిత్రం విడుదలై రేపటికి మూడేళ్లు పూర్తికావస్తోంది. ఈ సందర్భంగా చిత్ర నిర్మాణ సంస్థ కొన్ని స్టిల్స్‌ను విడుదల చేసింది. వీటిలో పోలీస్ లుక్‌‌ కొత్తది. ఈ స్టిల్‌ను ప్రేక్షకులకు చూపించడం ఇదే తొలిసారి.

అల్లు అర్జున్‌ను కంప్లీట్ పోలీస్ ఆఫీసర్ గెటప్‌లో చూసిన ఆయన అభిమానులు ఈ స్టిల్‌ను సోషల్ మీడియాలో విపరీతంగా షేర్ చేస్తున్నారు. స్టిల్ అదిరిపోయిందని ప్రశంసల వర్షం కురిపిస్తున్నారు. కాగా, ప్రస్తుతం అల్లు అర్జున్.. సుకుమార్ దర్శకత్వంలో ‘పుష్ప’ సినిమా చేస్తోన్న సంగతి తెలిసిందే. లాక్‌డౌన్ తరవాత ఈ సినిమా షూటింగ్‌ను ఇంకా తిరిగి ప్రారంభించలేదు. ఈ సినిమా షూటింగ్ కోసం సుకుమార్ హైదరాబాద్‌లో ప్రత్యేకంగా సెట్ వేస్తున్నారని సమాచారం. త్వరలోనే ఈ సెట్‌లో షూటింగ్ ప్రారంభిస్తారట. సుకుమార్, బన్నీ కాంబోలో వస్తోన్న మూడో సినిమా ఇది.




Please Read Disclaimer