KGF 2 టీమ్ నుంచి అభిమానులకు శుభవార్త

రాక్ స్టార్ యశ్ నటించిన కేజీఎఫ్ ఎలాంటి సంచలనాలు సృష్టించిందో తెలిసిందే. రాఖీభాయ్ హవా బాక్సాఫీస్ వద్ద ఓ రేంజులో సాగింది. కేవలం కన్నడ ఇండస్ట్రీ నుంచే ఈ మూవీ 100 కోట్ల షేర్ వసూలు చేయడం సంచలనం కాగా హిందీ చిత్రపరిశ్రమ నుంచి అసాధారణ వసూళ్లను తెచ్చింది. అందుకే ఇప్పుడు ఈ మూవీకి సీక్వెల్ వస్తోంది? అనగానే సర్వత్రా ఒకటే ఉత్కంఠ.

నిజానికి మహమ్మారీ లాక్ డౌన్ అన్నివిధాలా నాశనం చేసింది. కేజీఎఫ్ 2 ఈపాటికే రిలీజవ్వాల్సినది వాయిదా పడింది. రకరకాల కోర్టు కేసులు గొడవల వల్ల కూడా షూటింగ్ వాయిదా ఫర్వంలో సాగడం మైనస్ అయ్యింది. ఎట్టకేలకు కోర్టులు అనుమతించాక షూటింగును పూర్తి చేశారు.

తాజా సమాచారం ప్రకారం.. కేజీఎఫ్ 2 పోస్ట్ ప్రొడక్షన్ వేగంగా పూర్తవుతోంది. ఈ మూవీని ఈ ఏడాది చివరిలో రిలీజ్ చేసేందుకు ప్రశాంత్ నీల్ బృందం ప్రణాళికలు సిద్ధం చేస్తోందట. కెజిఎఫ్: చాప్టర్ 2 విడుదల తేదీకి సంబంధించి ఎవరూ అధికారికంగా ఏదీ ధృవీకరించని ఈ సన్నివేశంలో దర్శకనిర్మాతల ట్వీట్ అందరి దృష్టిని ఆకర్షించింది.

నేడు (అక్టోబర్ 3) నిర్మాత విజయ్ కిరంగదూర్ పుట్టినరోజు సందర్భంగా ప్రశాంత్ నీల్ దృష్టి రిలీజ్ తేదీ పైనే ఫోకస్ అయ్యింది. ఈ సంవత్సరం తమకు అతిపెద్దదిగా ఉంటుందని నిర్మాత హింట్ ఇవ్వడం ఆసక్తిని రేకెత్తించింది. అంటే దీనర్థం ఈ సంవత్సరమే కేజీఎఫ్ 2 ని రిలీజ్ చేస్తామనేది దర్శకనిర్మాతల ఆలోచన అని అర్థం చేసుకోవాలా? ఒకవేళ ఇదే నిజమైతే ప్రస్తుత కోవిడ్ భయాల నడుమ జనాల్ని థియేటర్లకు రప్పించే సీన్ ఉంటుందా? కేజీఎఫ్ 2 గేమ్ ఛేంజర్ అవుతుందా? అన్నది సస్పెన్స్ గా మారింది.

ఇప్పటికి అంతా గందరగోళంగా ఉంది. థియేటర్లు తెరిచే నాటికి పరిస్థితి ఎలా ఉంటుందో ఎవరికీ తెలియదు. అన్నీ సాధారణ స్థితికి వచ్చేస్తే మేలే. కానీ అలా కాకపోతే బహుభాషా సీక్వెల్ కు ఎదురుదెబ్బ పడినా పడొచ్చు. `కేజీఎఫ్: చాప్టర్ 2` లోనూ రాకీ భాయ్ పాత్రలో యష్ కనిపిస్తాడు. సంజయ్ దత్ అధీరాగా కనిపిస్తున్నారు. విడుదల తేదీకి సంబంధించి మేకర్స్ నుండి అధికారిక ప్రకటన వెలువడాల్సి ఉంది.