లావణ్య నవ్వంటే ఇష్టం నాకు.. చొట్టబుగ్గ భలే ఉంటుంది: చిరంజీవి

0

మెగాస్టార్ చిరంజీవి మాటల్లో ఈమధ్య చమత్కారం బాగా కనిపిస్తోంది. ఎప్పుడూ వెండితెరపై తన నటనతో, హావభావాలతో, డైలాగులతో ప్రేక్షకులను ఉర్రూతలూగించే చిరంజీవి.. ఇప్పుడు బయట ఫంక్షన్లలో కూడా అదే ఉత్సాహంతో మాట్లాడుతున్నారు. ఆ మధ్య ‘బిగ్ బాస్’ గ్రాండ్ ఫినాలేలో చిరంజీవి తన చమత్కారం, పంచ్ డైలాగులతో అదరగొట్టారు. ఇటీవల ఏఎన్నార్ నేషనల్ అవార్డ్స్ ఫంక్షన్‌లో కూడా ఆసక్తికరంగా మాట్లాడారు. ఇప్పుడు ‘అర్జున్ సురవరం’ ప్రీ రిలీజ్ వేడుకలో సెంటర్ ఆఫ్ అట్రాక్షన్‌గా నిలిచారు. నిఖిల్ సిద్ధార్థ హీరోగా నటించిన ‘అర్జున్ సురవరం’ ప్రీరిలీజ్ ఈవెంట్‌కు ముఖ్య అతిథిగా విచ్చేశారు మెగాస్టార్.

లావణ్య చొట్టబుగ్గ భలే ఉంటుంది

హీరోయిన్ లావణ్య త్రిపాఠి గురించి చిరంజీవి మాట్లాడుతూ.. ‘‘ఒక విషయం చెప్పేస్తాను ఏమనుకోకు.. నీ నవ్వంటే ఇష్టం నాకు. ఆ చొట్టబుగ్గలు.. డింపుల్ భలే ఉంటుందిలే. మారుతి సినిమాలో లావణ్యను కళ్లు ఆర్పకుండా చూశాను. అంత బాగా చేసింది. మారుతి ఆ అమ్మాయిని అంత బాగా చూపించారు. ఈ సినిమాలో మరో కోణంలో అంతే బాగా చేసింది. ఆమెకు మంచి భవిష్యత్తు ఉంది. ఆమె ఇప్పటికే తానేంటో నిరూపించుకుంది. నాలాంటోడు కొత్తగా చెప్పాల్సిన అవసరంలేదు. ఆ అమ్మాయికి మంచి భవిష్యత్తు ఉంటుంది. ఈ సినిమా ద్వారా మరొక మెట్టు ఎక్కుతుంది. ఆ అమ్మాయి ద్వారా ఈ సినిమాకి చాలా హెల్ప్ జరిగింది’’ అని చెప్పుకొచ్చారు.

చాలా మందికి ఆశ్చర్యమే..

తాను ఈ ప్రీరిలీజ్ ఈవెంట్‌కు రావడం చాలా మందికి ఆశ్చర్యంగానే ఉండొచ్చని అభిప్రాయపడ్డారు చిరంజీవి. ‘‘ఇంత వరకు నేను ఈ హీరోను కలుసుకుంది, చూసింది లేదు. ఫస్ట్ టైమ్ మొన్న ప్రీమియర్ చూస్తున్నప్పుడు చూశానంతే. ఠాగూర్ మధు నన్ను ఫంక్షన్‌కు రమ్మని ఇబ్బంది పెట్టేంత ప్రయత్నం చేయడు. నేను చాలా బిజీగా ఉంటాను డిస్టర్బ్ చేయడం ఎందుకులే అనుకుంటాడు. మరి ఇక్కడికి ఎవరి ప్రమేయంతో వచ్చానని చాలా మందికి డౌట్ ఉండొచ్చు. నిజం చెప్పాలంటే ప్రీమియర్ షో చూసిన తరవాత నాకు నేనుగా రావాలని కోరుకున్నాను’’ అని చెప్పారు చిరంజీవి.

నేను చెప్తేనే ఏర్పాటు చేశారు..

ఈ ప్రీరిలీజ్ ఈవెంట్‌ను నిర్మాత రాజ్ కుమార్ ఏర్పాటుచేసి తనను ముఖ్య అతిథిగా పిలవలేదని.. తాను చీఫ్ గెస్ట్‌గా వస్తాను ఒక ఫంక్షన్ ఏర్పాటు చేయమని చెప్తేనే చేశారని చిరంజీవి వెల్లడించారు. నిర్మాత రాజ్ కుమార్ తనకు చాలా కావాల్సిన వ్యక్తి అని అన్నారు మెగాస్టార్. చాలా మొహమాటస్తుడని, చాలా తక్కువ మాట్లాడుతూ ఉంటాడని చెప్పారు. ‘‘ప్రీమియర్ షో చూసిన తరవాత సినిమా చాలా బాగుంది.. ఎప్పుడు రిలీజ్ అని రాజ్‌ కుమార్‌ను అడిగాను. 29న అని చెప్పాడు. ఏమైనా ఫంక్షన్ ఏర్పాటుచేశావా అంటే లేదన్నాడు. నన్నేమైనా పిలవాలని అనుకుంటున్నావా అంటే.. అది, అది అంటూ నసుకుతున్నాడు. దీంతో నేనే ఇనిషియేటివ్ తీసుకొని ఒక ఫంక్షన్ ఏర్పాటుచేయమని చెప్పాను’’ అని మెగాస్టార్ వెల్లడించారు.

ఇది ప్రజల్లోకి వెళ్లాల్సిన సినిమా

‘అర్జున్ సురవరం’ ప్రజల్లోకి వెళ్లాల్సిన సినిమా అని, ఇలాంటి మంచి సినిమా గురించి కచ్చితంగా ప్రచారం చేయాలని, ప్రేక్షకులకు తెలియజేయాలని చిరంజీవి అన్నారు. అందుకే, ఈ చిత్రానికి తనవంతుగా ప్రచారం కల్పించడానికి ఈ ప్రీరిలీజ్ వేడుకను ఏర్పాటుచేయమని చెప్పానని వెల్లడించారు. అయితే, తనను వాడుకోవడానికి కూడా నిర్మాత రాజ్ కుమార్ మొహమాటం పడ్డారని సరదాగా అన్నారు మెగాస్టార్. ‘‘ఇలాంటి వాడు ఆడపిల్ల అయితే చాలా ప్రమాదం కదా. థ్యాంక్ గాడ్ మగాడిగా పుట్టాడు’’ అని నిర్మాత రాజ్ కుమార్ మొహమాటంపై సరదాగా మాట్లాడారు చిరు.




Please Read Disclaimer