రాళ్లపల్లి చివరి ఇంటర్వ్యూ: ఆ సినిమా కోసం ప్రభుత్వ ఉద్యోగం వదిలేశారు

0

తెలుగు సినీ ప్రేక్షకుల్ని ఐదు దశాబ్ధాలుగా తన అద్భుత నటనతో అలరించిన సీనియర్ నటుడు రాళ్లపల్లి నర్సింహారావు శుక్రవారం సాయంత్రం కన్నుమూసారు. గత కొంతకాలంగా తీవ్ర అనారోగ్యంతో హైదరాబాద్‌లోని మ్యాక్స్ క్యూర్ హాస్పటల్‌లో చికిత్స పొందుతున్న ఆయన శుక్రవారం సాయంత్రం తుదిశ్వాస విడిచారు.

2 వేలకు పైగా నాటకాల్లో నటించిన ఆయన ‘స్త్రీ’ చిత్రంతో ఇండస్ట్రీలో అడుగుపెట్టి 800పైగా చిత్రాల్లో నటించారు. ఇటీవల ఆయన ఓ మీడియా సంస్థకు ఇచ్చిన ఇంటర్వ్యూలో తన ఉద్యోగం, సినీ ప్రస్థానం గురించి ఆసక్తికరమైన విషయాలు తెలియజేశారు.

రాళ్లపల్లి మాట్లాడుతూ.. ‘స్త్రీ’ సినిమాతో నేను నాటకరంగం నుండి సినిమా ఇండస్ట్రీలో అడుగుపెట్టాను. చిల్లరదేవుళ్లులో వేషం వేశాను. తరువాత ఊరిబతుకులు చిత్రంలో మేజర్ క్యారెక్టర్ వేశా. హరిశ్ఛంద్రుడిగా తాగుబోతు పాత్ర వేశా. దానికి నంది అవార్డు వచ్చింది. తరువాత బాపుగారి ‘తూర్పువెళ్లే రైలు’ సినిమా నా జీవితానికి టర్నింగ్ పాయింట్. నా ఉద్యోగాన్ని సైతం వదిలేయడానికి ఆ సినిమానే కారణం. అది బాపు గారు పెట్టిన భిక్ష అని చెప్పాలి. తూర్పు వెళ్లే రైలుతో నా ప్రస్థానం మొదలైంది. అభిలాష, అన్వేషణ, పట్నంపిల్ల ఇలా చాలా సినిమాలు చేశా.

తూర్పు వెళ్లే రైలు సినిమా షూటింగ్‌కి లేట్‌గా వెళ్లా. అప్పుడు నేను ప్రభుత్వ ఉద్యోగం చేస్తున్నా లీవ్ దొరకడానికి లేట్ అయ్యింది. క్షమించాలి సార్.. లీవ్ ఆలస్యం కావడంతో షూటింగ్‌కి రాలేకపోయా అన్నా.. బాపు గారు పర్లేదయ్యా అన్నారు. ఈ సినిమా విడుదలయ్యాక నువ్ ఉద్యోగం చేయాల్సిన అవసరం రాదులే.. ఒకవేళ వస్తే నేను సినిమాలు చేయను బొమ్మలు గీసుకుంటా అన్నారు బాపు గారు. అన్నట్టుగానే ఆ సినిమా పెద్ద హిట్ అయ్యింది.

ఈ సినిమా రిలీజ్ అయ్యాక.. నాటకం వేయడానికి విజయవాడ వెళ్తే జనం నుండి గోల… మాకు నాటకం డైలాగ్‌లు వద్దు.. ‘తూర్పు వెళ్లే రైలు’ సినిమా డైలాగ్‌లు కావాలని. అప్పుడు మా మేనేజర్‌ గారు నువ్ రిజైన్ చేస్తే బాగుంటుంది కదా అన్నారు. వెంటనే నేను తెల్లకాగితం తీసుకుని సంతకం పెట్టి మిగతాది నువ్వే రాసుకో నా ఉద్యోగం మానేస్తున్నా అన్నాను. అలా నా ఉద్యోగానికి రాజీనామా చేశా. అప్పట్లో ఆ సినిమాకు నాకు వచ్చిన రెమ్యూనరేషన్ రూ. 800 కాని.. నా ఉద్యోగానికి జీతం అప్పట్లోనే రూ. 2000 వేలు. కాని నటుడిగానే నాకు సంతృప్తి అనిపించింది అందుకే ఉద్యోగం వదలేశా’ అంటూ చెప్పుకొచ్చారు రాళ్లపల్లి.




Please Read Disclaimer