RRR Update: ఎన్టీఆర్ ఫ్యాన్స్‌కు పండగే.. గుడ్ న్యూస్ చెప్పిన రాజమౌళి

0
దర్శకధీరుడు ఎస్.ఎస్.రాజమౌళి ప్రతిష్టాత్మకంగా తెరకెక్కిస్తోన్న RRR సినిమా షూటింగ్ కిందటేడాది ప్రారంభమైంది. యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ హీరోలుగా తెరకెక్కుతోన్న ఈ భారీ మల్టీస్టారర్‌ను వచ్చే ఏడాది జులై 30న విడుదల చేస్తామని ఇప్పటికే రాజమౌళి ప్రకటించారు. కానీ, దీనిపై బోలెడన్ని రూమర్లు. అసలు ఆ సమయానికి షూటింగ్ పూర్తి కాదని, సినిమా వాయిదా పడటం ఖాయమని ఇప్పటికే చాలా వార్తలు వచ్చాయి. కానీ, ఈ వార్తలను రామ్ చరణ్ గతంలో ఖండించారు. ఇప్పుడు చిత్ర యూనిట్ ఈ రూమర్లకు పుల్‌స్టామ్ పెట్టింది.

70 శాతం షూటింగ్ పూర్తి

కిందటేడాది నవంబర్ 11న పూజాకార్యక్రమాలు నిర్వహించి సినిమాను ఘనంగా ప్రారంభించారు. నవంబర్ 19 నుంచి రెగ్యులర్ షూటింగ్‌ను మొదలుపెట్టారు. హైదరాబాద్‌లోని అల్యూమినియం ఫ్యాక్టరీలో భారీ సెట్ వేసి కీలక సన్నివేశాలను చిత్రీకరించారు. అలాగే, రామోజీ ఫిలిం సిటీలో యాక్షన్ సీన్లను షూట్ చేశారు. అంతేకాకుండా వడోదర, బుల్గారియాలో కూడా షూటింగ్ జరిపారు. అయితే, షూటింగ్ ప్రారంభమై నేటికి ఏడాది పూర్తయింది. ఇప్పటి వరకు 70 శాతం షూటింగ్ పూర్తయినట్టు చిత్ర యూనిట్ ప్రకటించింది. ఈ మేరకు RRR మూవీ అఫిషియల్ ట్విట్టర్ ఖాతా నుంచి ట్వీట్ చేసింది.

ఎన్టీఆర్ ఫ్యాన్స్‌కు స్వీట్ న్యూస్

ఈ సినిమాలో జూనియర్ ఎన్టీఆర్ కొమరం భీమ్‌గా కనిపించనున్న సంగతి తెలిసిందే. అలాగే రామ్ చరణ్ అల్లూరి సీతారామరాజుగా కనిపించనున్నారు. రామ్ చరణ్‌కు జోడీగా బాలీవుడ్ బ్యూటీ ఆలియా భట్ నటిస్తోంది. అయితే, ఎన్టీఆర్ సరసన నటించే హీరోయిన్ ఎవరనే విషయాన్ని మాత్రం ఇప్పటి వరకు చిత్ర యూనిట్ ప్రకటించలేదు. కానీ, దీనిపై ఇప్పటికే బోలెడన్ని ఊహాగానాలు. ఇప్పుడు వాటన్నిటికీ శుభంకార్డు వేయనున్నట్టు చిత్ర యూనిట్ ప్రకటించింది. తారక్ సరసన నటించే హీరోయిన్‌తో పాటు, సినిమాలోని విలన్లను కూడా బుధవారం (నవంబర్ 20న) పరిచయం చేయనున్నట్లు ట్వీట్‌లో పేర్కొన్నారు.

రూ.300 కోట్ల భారీ చిత్రం

చిత్రంతో తన స్థాయిని ప్రపంచ వ్యాప్తం చేసుకున్న ఎస్.ఎస్.రాజమౌళి.. RRRను కూడా పాన్ ఇండియా చిత్రంగా తీర్చి దిద్దుతున్నారు. తెలుగుతో పాటు హిందీ, తమిళం, కన్నడం, మలయాళ భాషల్లో ఈ చిత్రం తెరకెక్కుతోంది. డీవీవీ ఎంటర్‌టైన్మెంట్ బ్యానర్‌పై డీవీవీ దానయ్య ఈ చిత్రాన్ని నిర్మిస్తున్నారు. సుమారు 300 కోట్ల రూపాయలతో ఈ చిత్రాన్ని నిర్మిస్తున్నారు. ఎం.ఎం.కీరవాణి సంగీత సమకూరుస్తోన్న ఈ చిత్రానికి సెంథిల్ కుమార్ సినిమాటోగ్రాఫర్.

అంతా సూపర్ స్టార్లే

ఈ చిత్రంలో హీరోలతో పాటు మిగిలిన నటీనటుల విషయంలోనూ రాజమౌళి చాలా జాగ్రత్తలు తీసుకున్నారు. రామ్ చరణ్‌కు హీరోయిన్‌గా ఆలియా భట్‌ను తీసుకోవడంతో పాటు సినిమాలోని ముఖ్య పాత్రలకు బాలీవుడ్ నటుడు అజయ్ దేవగణ్‌ను రంగంలోకి దించారు. అలాగే.. తమిళ దర్శకుడు, నటుడు సముద్రఖనిని మరో ముఖ్య పాత్ర కోసం ఎంపిక చేసుకున్నారు. మరి రేపు ప్రకటించబోయే నటీనటుల్లో ఎలాంటి స్టార్స్ ఉంటారో చూడాలి.




Please Read Disclaimer