దర్శకధీరుడు రాజమౌళి – యంగ్ టైగర్ ఎన్టీఆర్ ల స్నేహం గురించి ప్రత్యేకంగా చెప్పక్కర్లేదు. ఒక హీరో – దర్శకుడుకి మధ్య ఉండే అనుబంధం కంటే అంతకుమించిన స్నేహబంధం ఉందనుకునేలా మెలుగుతూ ఉంటారు. ‘స్టూడెంట్ నెంబర్ 1’ సినిమాతో మొదలైన వీరి సినీ ప్రయాణం.. ఇప్పుడు ‘ఆర్.ఆర్.ఆర్’ వరకు కొనసాగుతోంది. రాజమౌళిని ముద్దుగా ‘జక్కన్న’ అని పిలుస్తుంటారు తారక్. వీరి కాంబినేషన్ లో ఇప్పటి వరకు ‘స్టూడెంట్ నెంబర్ 1’ ‘సింహాద్రి’ ‘యమదొంగ’ వంటి హ్యాట్రిక్ హిట్ సినిమాలు తెరకెక్కాయి. ఇప్పుడు నాలుగో సినిమాగా ‘ఆర్.ఆర్.ఆర్’ రెడీ అవుతోంది. ఇది కూడా ఖచ్చితంగా హిట్ అవుతుందని సినీ అభిమానులు నమ్మకంతో ఉన్నారు. నేడు రాజమౌళి బర్త్ డే సందర్భంగా విషెష్ చెప్తూ తారక్ ఓ ఫోటోను ట్విట్టర్ లో షేర్ చేశారు.
ఎన్టీఆర్ – రాజమౌళి కలిసి ఉన్న ఈ ఫోటో నెట్టింట హాల్ చల్ చేస్తోంది. ఫొటోలో ఇద్దరూ హుడీలు ధరించి ఒకరినొకరు చూసుకుంటూ చిరునవ్వులు చిందిస్తున్నారు. ఈ ఫోటో షూటింగ్ లొకేషన్స్ లో తీసినదిగా తెలుస్తోంది. ఇక కరోనా కారణంగా నిలిచిపోయిన షూటింగ్ ఏడు నెలల తర్వాత ఇటీవలే తిరిగి ప్రారంభమైంది. ‘వియ్ ఆర్ ఆర్ ఆర్ బ్యాక్’ అంటూ షూటింగ్ విశేషాలను తెలియజేసారు. ‘బాహుబలి’ తర్వాత రాజమౌళి నుంచి వస్తున్న సినిమా కావడంతో ఆర్.ఆర్.ఆర్ కోసం యావత్ సినీ అభిమానులు ఆసక్తిగా ఎదురు చూస్తున్నారు. అందులోనూ స్టార్ హీరోలు ఎన్టీఆర్ – రామ్ చరణ్ లు కలిసి నటిస్తుండటంతో ఈ సినిమాపై భారీ అంచనాలే ఏర్పడ్డాయి. ఇప్పటికే మన్యం వీరుడు ‘అల్లూరి సీతారామరాజు’ గా రామ్ చరణ్ చూపిన ‘రౌద్రం’ ప్రేక్షకులకు చూపించారు. ఈ క్రమంలో విప్లవ వీరుడు ‘కొమరం భీమ్’ గా తారక్ చూపించబోయే ‘రుధిరం’ అక్టోబర్ 22న రానుంది.
దర్శకధీరుడు రాజమౌళి తెరకెక్కిస్తున్న భారీ మల్టీస్టారర్ ‘ఆర్.ఆర్.ఆర్’. స్టార్ట్ హీరోలు యంగ్ టైగర్ ఎన్టీఆర్ – మెగా పవర్ స్టార్ రామ్ చరణ్ కలిసి నటిస్తున్న ఈ చిత్రంపై అంచనాలు ఏ రేంజ్ లో ఉన్నాయో ప్రత్యేకంగా చెప్పనక్కర్లేదు. చరణ్ ‘మన్నెం దొర అల్లూరి సీతారామరాజు’గా కనిపిస్తుండగా తారక్ ‘కొమరం భీమ్’ పాత్రలో నటిస్తున్నాడు. ఇప్పటికే మేకర్స్ విడుదల చేసిన రామరాజు రామ్ చరణ్ ఇంట్రో వీడియో విశేషంగా ఆకట్టుకుంది. ఎన్టీఆర్ వాయిస్ ఓవర్ తో చరణ్ పాత్ర హీరోయిజాన్ని ఎలివేట్ చేస్తూ సాగిన ఆ వీడియో సినీ అభిమానులకి మంచి అనుభూతిని పంచింది. ఈ క్రమంలో ఎన్టీఆర్ పుట్టిన రోజున ఆయన ఫస్ట్ లుక్ మరియు ఇంట్రో వీడియో రిలీజ్ చేస్తారని అందరూ భావించారు. కానీ కరోనా పరిస్థితుల కారణంగా ఎన్టీఆర్ కి సంబంధించిన ఎలాంటి అప్డేట్ ఇవ్వడం లేదని ‘ఆర్.ఆర్.ఆర్’ యూనిట్ ప్రకటించింది. ఇక అప్పటి నుంచి అభిమానులు తారక్ అప్డేట్ కోసం ఆతృతగా ఎదురుచూస్తున్నారు.
కాగా ఇటీవలే కరోనా నుంచి బయటపడిన రాజమౌళి ఓ మీడియా ఛానల్ తో మాట్లాడుతూ ‘ఆర్.ఆర్.ఆర్’ నుంచి రానున్న ఎన్టీఆర్ ఫస్ట్ లుక్ మరియు ఇంట్రో వీడియోపై క్లారిటీ ఇచ్చాడు. వైద్యుల సలహా మేరకు మరికొన్ని రోజులు షూటింగ్ కి వెళ్లకూడదని అనుకుంటున్నాని.. ఒకవేళ షూటింగ్ స్టార్ట్ అయితే పది రోజుల తర్వాత తారక్ కి సంబంధించిన విజువల్స్ అందుబాటులోకి వస్తాయని చెప్పారు. అప్పుడు ఎన్టీఆర్ అప్డేట్ ఇస్తామని రాజమౌళి స్పష్టం చేశారు. దీంతో ‘ఆర్.ఆర్.ఆర్’ షూటింగ్ ఎప్పుడు స్టార్ట్ అవుతుందా అని తారక్ అభిమానులు ఉత్సాహంతో వెయిట్ చేస్తున్నారు. ఇక పాన్ ఇండియా స్థాయిలో రూపొందుతున్న ఈ చిత్రాన్ని భారీ బడ్జెట్ తో ప్రొడ్యూసర్ డీవీవీ దానయ్య ప్రతిష్టాత్మకంగా నిర్మిస్తున్నారు. కీరవాణి సంగీతం అందిస్తున్నారు.