రాజ‌శేఖ‌ర్ సెకెండ్ ఇన్నింగ్స్ అనుకోవ‌చ్చా?

యాంగ్రీ యంగ్ మెన్ రాజ‌శేఖ‌ర్ సెకెండ్ ఇన్నింగ్స్ ప్రారంభ‌మైన‌ట్లేనా? ఇంత‌కాలం హీరోగా అల‌రించిన రాజ‌శేఖ‌ర్ క్యారెక్ట‌ర్ ఆర్టిస్ట్ గా కొత్త ట‌ర్నింగ్ తీసుకున్న‌ట్లేనా? అంటే అవున‌నే తెలుస్తోంది. యూత్ స్టార్ నితిన్ క‌థానాయ‌కుడిగా వ‌క్కంతం వంశీ తెర‌కెక్కిస్తోన్న ‘ఎక్స్ ట్రా’ సినిమాలో రాజశేఖ‌ర్ ఓ కీల‌క పాత్ర‌కి ఎంపిక‌య్యారు. రెండు రోజుల కింద‌టే ఆయ‌న ఎక్స్ ట్రా సెట్స్ కి హాజ‌ర‌య్యారు. త‌న‌దైన శైలిలో సాగే పాత్ర అని తెలుస్తోంది.

ఆయ‌న ఇమేజ్ ని ప‌క్కాగా మ్యాచ్ చేసే రోల్ ఇది. తెర‌పై క‌నిపించినంత సేపు త‌న మార్క్ త‌ప్ప‌నిస‌రిగా ఉంటుంద‌ని అంటున్నారు. ఇంత‌వ‌ర‌కూ బాగానే ఉంది. అయితే ఇలాంటి అవ‌కాశాలు రావ‌డం రాజశేఖ‌ర్ కి కొత్తేం కాదు. గ‌తంలో చాలా మంది స్టార్ హీరోల చిత్రాల్లో రాజ‌శేఖ‌ర్ కి అవ‌కాశాలు వ‌చ్చాయి. కానీ వాటిని ఆయ‌న సున్నితంగా తిర‌స్క‌రించారు. చివ‌రికి మెగాస్టార్ చిరంజీవి సినిమాలో కూడా చాలా కీల‌క‌మైన పాత్ర ఇచ్చిన‌ట్లు ప్ర‌చారం సాగింది.

వ‌చ్చిన అవ‌కాశాల‌న్నీ కూడా ఆయ‌న ఇమేజ్ కి త‌గ్గ‌ట్టు డిజైన్ చేసిన‌వే. కానీ అలాంటి అవ‌కాశాలు కూడా కాద‌నుకున్నారు. అప్పుడ‌లా కాదనుకున్న రాజేశేఖ‌ర్ ఇప్పుడు నితిన్ సినిమాలో న‌టించ‌డం అన్న‌ది ఆస‌క్తిక‌ర అంశ‌మే. ఈ సినిమా త‌ర్వాత ఇదే త‌ర‌హా పాత్ర‌లు వ‌స్తే కొన‌సాగుతారా? లేక నితిన్ సినిమాతోనే స‌రిపెడ‌త‌రా? అన్న‌ది ఆలోచించాల్సిన విష‌య‌మే. ఎందుకంటే రాజ‌శేఖ‌ర్ హీరోగా ప్ర‌త్యేక‌మైన ఇమేజ్ ఉంది. తెలుగు ప్రేక్ష‌కుల్లో గొప్ప ఫాలోయింగ్ ఉన్న న‌టుడు. వెండి తెర‌పై కొన్ని సాహ‌సోపేత‌మైన పాత్ర‌లు సైతం చేసారు.

అయితే కాల‌క్ర‌మంలో సినిమాలు త‌గ్గించారు. దీంతో మార్కెట్ పైనా ప్ర‌భావం ప‌డింది. ఆ స‌మయంలో ఇత‌ర హీరోల చిత్రాల్లో అవ‌కాశాలు వ‌చ్చినా ముందుకెళ్ల‌లేదు. అయితే ఇండ‌స్ట్రీలో ఎద‌గ‌కుండా త‌న‌ని కొన్ని శ‌క్తులు అడ్డుకున్నాయని రాజేశ‌ఖ‌ర్ ప‌లు సంద‌ర్భాల్లో ఆరోపించారు. ఓ స‌మ‌యంలో ఏకంగా కొంత మంది సినిమా న‌టుల కాళ్ల‌కి సైతం న‌మ‌స్క‌రించ‌డం జ‌రిగింది. తొటి న‌టుడు అలా న‌మ‌స్క‌రించ‌డంతో అంతా షాక్ అయ్యారు. ఆయ‌న ఎందుకిలా చేస్తున్నారో అర్దం కాక త‌ల ప‌ట్టుకున్నారు. రాజశేఖ‌ర్ చివ‌రిగా ‘శేఖర్’ అనే చిత్రంలో న‌టించారు. ఆ త‌ర్వాత ఆయ‌న నుంచి ఎలాంటి ప్ర‌క‌ట‌న రాలేదు.