కలవరమైన వేళ కరుణించే ఇలా.. డెవిల్ లవ్

నందమూరి హీరో కళ్యాణ్ రామ్ మరికొద్ది రోజుల్లో డెవిల్ సినిమాతో ప్రేక్షకుల ముందుకు రాబోతున్న విషయం తెలిసిందే. పీరియాడిక్ యాక్షన్ అండ్ స్పై థ్రిల్లర్ గా తెరకెక్కిన ఈ చిత్రంలో కళ్యాణ్ రామ్ బ్రిటిష్ సీక్రెట్ ఏజెంట్ గా కనిపించబోతున్నారు. గతనెల 24వ తేదీనే ఈ సినిమాను విడుదల చేయాలని అనుకున్నారు. కానీ కొన్ని కారణాల వల్ల డిసెంబర్ 29వ తేదీకి రిలీజ్ వాయిదా వేయాల్సి వచ్చింది.

అయితే రిలీజ్ తేదీ దగ్గర పడడంతో మేకర్స్ సినిమా ప్రమోషన్ల స్పీడ్ ను పెంచారు. ఇటీవలే ట్రైలర్ ను రిలీజ్ చేయగా.. ప్రేక్షకుల నుంచి సూపర్ రెస్పాన్స్ అందుకుంది. ఈ ట్రైలర్ సినిమాపై అంచనాలను పెంచడంతోపాటు ఆడియెన్స్ లో కూడా సూపర్ బ్రజ్ క్రియేట్ చేసింది.

తాజాగా ఈ సినిమా నుంచి దూరమే తీరమై అంటూ సాగే మెలోడియస్ లిరికల్ సాంగ్ ను మేకర్స్ రిలీజ్ చేశారు. హర్షవర్ధన్ రామేశ్వర్ సంగీతం సమకూర్చారు. సమీరా భరద్వాజ్ ఈ పాటను రాసి పాడటం విశేషం. ప్రస్తుతం ఈ సాంగ్ అందరినీ ఆకట్టుకుంటోంది. కళ్యాణ్ రామ్, సంయుక్త కెమిస్ట్రీ బాగుందని ఫ్యాన్స్ చెబుతున్నారు. పల్లెటూరి బ్యాక్ గ్రౌండ్ లో సాంగ్ అదిరిపోయిందని అంటున్నారు.

సలార్ విడుదలైన తర్వాత వారం రోజులకు రిలీజ్ అవ్వనున్న ఈ మూవీకి థియేట్రికల్ బిజినెస్ బాగానే జరిగిందని ట్రేడ్ వర్గాలు చెబుతున్నాయి. ఆంధ్రలో రూ.8.5 కోట్ల బిజినెస్ జరిగినట్లు సమాచారం. సీడెడ్ హక్కులు రూ.3.25 కోట్లకు అమ్ముడైనట్లు సినీ వర్గాల్లో టాక్. ప్రపంచవ్యాప్తంగా రూ.21 కోట్లకుపైగా ప్రీ రిలీజ్ బిజినెస్ జరిగినట్లు సమాచారం.

భారీ బడ్జెట్ తో రూపొందిన ఈ సినిమాలో హీరో కళ్యాణ్ రామ్ రెండు పాత్రల్లో కనిపించనున్నారు. ఆయనకు జోడీగా సంయుక్త మీనన్ నటిస్తున్నారు. అభిషేక్ పిక్చర్స్ బ్యానర్ పై అభిషేక్ నామా ఈ చిత్రాన్ని నిర్మించడంతోపాటు దర్శకత్వం వహించారు. శ్రీకాంత్ విస్సా స్టోరీ, స్క్రీన్ ప్లే, డైలాగ్స్ అందించారు. ఈ చిత్రాన్ని తెలుగు, హిందీ, త‌మిళ్‌, క‌న్న‌డ భాష‌ల్లో రిలీజ్ చేస్తున్నారు. గ‌త ఏడాది తెలుగు సినీ ఇండ‌స్ట్రీలో బిగ్గెస్ట్ హిట్ మూవీగా నిలిచిన బింబిసారతో మెప్పించిన కళ్యాణ్ రామ్ ఈ ఏడాది డెవిల్ తో ఆకట్టుకునేందుకు రెడీ అవుతున్నారు. మరి నందమూరి హీరోకు సక్సెస్ దొరుకుతుందో లేదో చూడాలి.