నాగార్జునకే షాకిచ్చిన వంటలక్క..

బుల్లితెర భారీ పాపులర్ షో ఏదయ్యా అంటే.. అందరి నోటా ముందుగా వినిపించే పేరు బిగ్ బాస్. తెలుగుతో పాటు ఇతర భాషల్లోనూ ఇదే పరిస్థితి. బిగ్ బాస్ టాస్క్‌లు, గేమ్‌లో పంచే రియాలిటిక్ వినోదాన్ని ఎక్కువగా ఇష్టపడుతుంటారు ఆడియన్స్. బిగ్ బాస్ ప్రారంభమైతే చాలు టీవీలకు అతుక్కుపోతుంటారు. దీంతో టీఆర్పీ పరంగా దూసుకుపోతుంటుంది బిగ్ బాస్. మరోవైపు తెలుగులో అదే రేంజ్ పాపులారిటీ ఉన్న సీరియల్ కార్తీక దీపం. వంటలక్క నటనకు ఫిదా అయిన ప్రేక్షకులు ఈ ప్రోగ్రాం అస్సలు వదలరు. అందుకే ప్రతిసారి కార్తీక దీపం- బిగ్ బాస్ మధ్య పోటీ చూస్తూనే ఉంటాం.

ఈ నేపథ్యంలో తాజాగా విడుదల చేసిన 42వ వారం బార్క్ రేటింగ్స్ చూస్తే కార్తీక దీపం సీరియల్‌తో పోటీపడటంలో చతికిలపడింది బిగ్ బాస్. వంటలక్క దెబ్బకు నాగార్జున వెనుకడుగేయక తప్పలేదు. 42వ వారం రేటింగ్స్‌లో కార్తీక దీపం సీరియల్ మొదటి స్థానంలో నిలవగా.. ఆ తర్వాతి స్థానాల్లో వరుసగా ఇస్మార్ట్ శంకర్ సినిమాతో పాటు, వదినమ్మ, కోయిలమ్మ, మౌనరాగం సీరియల్స్ ఉన్నాయి. టాప్ 5 ప్రోగ్రామ్స్‌లో అసలు బిగ్ బాస్ కనిపించకపోవడం గమనార్హం.

మరోవైపు టీఆర్పీ రేటింగ్ పరంగా భారీ రియాలిటీ షో బిగ్ బాస్ కంటే కార్తీకదీపం సీరియల్ ముందంజలో ఉండటం చూసి హ్యాపీగా ఫీల్ అవుతున్నారు వంటలక్క ఫ్యాన్స్. ఎన్నో రోజులుగా ప్రసారమవుతున్న ఈ కార్తీక దీపం సీరియల్‌లో డాక్టర్ బాబు, వంటలక్క పాత్రలు ప్రేక్షకులను కట్టిపడేస్తున్నాయి. దీంతో ఈ సీరియల్ టీఆర్పీని బీట్ చేసే మరో ప్రోగ్రామ్ రావడం ఇప్పట్లో కష్టమే అంటున్నారు విశ్లేషకులు. ఏదేమైనా నాగార్జున లాంటి బిగ్గెస్ట్ హీరో హోస్ట్ చేస్తున్న బిగ్ బాస్‌తో పోటీపడి కార్తీకదీపం ఫస్ట్ ప్లేస్ కొట్టేయడం చూస్తుంటే ఈ సీరియల్ ఆదరణ ఎలా ఉందనేది మరోసారి స్పష్టమైంది.