అందమైన పోస్టర్ తో టీజర్ అప్డేట్ ఇచ్చిన ‘లవ్ స్టొరీ’ టీమ్..!

యువ సామ్రాట్ అక్కినేని నాగచైతన్య – నేచురల్ బ్యూటీ సాయి పల్లవి జంటగా నటిస్తున్న లేటెస్ట్ మూవీ ”లవ్ స్టోరీ”. ఆహ్లాదకరమైన ప్రేమ కథల్ని తనదైన శైలిలో తెరకెక్కిస్తూ సెన్సిబుల్ డైరెక్టర్ గా పేరు తెచ్చుకున్న శేఖర్ కమ్ముల ఈ చిత్రానికి దర్శకత్వం వహించారు. ‘ఫిదా’ తర్వాత స్టార్ డైరెక్టర్ శేఖర్ కమ్ముల తీస్తున్న సినిమా కావడం.. నాగ చైతన్య – సాయి పల్లవి ఫస్ట్ టైం కలిసి నటిస్తుండటంతో ఈ సినిమాపై ఫ్యాన్స్ తో పాటు సినీ అభిమానుల్లో కూడా భారీ అంచనాలున్నాయి. ఇప్పటికే రిలీజైన ఫస్ట్ లుక్ మరియు ‘ఏయ్ పిల్లా’ సాంగ్ కు మంచి రెస్పాన్స్ తెచ్చుకున్నాయి. ఈ క్రమంలో ఫ్యాన్స్ ఎప్పుడెప్పుడా అని ఎదురుచూస్తున్న ‘లవ్ స్టొరీ’ టీజర్ అప్డేట్ వచ్చింది.

సంక్రాంతి కానుకగా జనవరి 10న ఉదయం 10 గంటల 08 నిమిషాలకు ‘‘లవ్ స్టోరీ’’ టీజర్ రాబోతుందని మేకర్స్ ప్రకటించారు. ఈ అనౌన్స్ మెంట్ కు సంబంధించి ఓ లవ్లీ పోస్టర్ ను ‘లవ్ స్టొరీ’ టీమ్ వదిలింది. ఈ పోస్టర్ లో నాగచైతన్య చేతులు కట్టుకొని నిల్చుండగా.. కాళ్ళు పైకి లేపి సాయి పల్లవి అతని చెవిలో ఏదో చెబుతోంది. చూడ ముచ్చటగా ఉన్న ఈ పోస్టర్ విశేషంగా ఆకట్టుకుంటోంది. ఈ అందమైన ప్రేమ కథను సోనాలి నారంగ్ సమర్పణలో శ్రీ వెంకటేశ్వర సినిమాస్ మరియు అమిగోస్ క్రియేషన్స్ సంస్థలు సంయుక్తంగా నిర్మిస్తున్నాయి. నారాయణదాస్ కె నారంగ్ – పుష్కర్ రామ్మోహన్ రావ్ నిర్మాతలుగా వ్యవహరిస్తున్నారు. ఇందులో రాజీవ్ కనకాల – ఈశ్వరీ రావు – దేవయాని ఇతర కీలక పాత్రల్లో నటిస్తున్నారు. పవన్ సి.హెచ్ సంగీతం సమకూరుస్తున్న ఈ చిత్రానికి విజయ్ సి.కుమార్ సినిమాటోగ్రఫీ అందిస్తున్నారు. ఇప్పటికే షూటింగ్ అంతా కంప్లీట్ చేసుకున్న ‘లవ్ స్టొరీ’ సినిమా ప్రస్తుతం పోస్ట్ ప్రొడక్షన్ పనులు జరుపుకుంటోంది.

Related Images: