బన్నీ సపోర్ట్ తో మెగా కాంపౌండ్ నుంచి వస్తున్న 11వ హీరో..!

మెగా ఫ్యామిలీ నుంచి ఇప్పటి వరకు 10 మంది హీరోలు ఒక హీరోయిన్ ఇండస్ట్రీకి పరిచయం అయ్యారు. ఈ క్రమంలో ఇప్పుడు కాంపౌండ్ నుంచి 11వ హీరో వస్తున్నాడు. మెగా ప్రొడ్యూసర్ అల్లు అరవింద్ బావమరిది కొడుకు ముత్తంశెట్టి విరాన్ హీరోగా లాంఛ్ అవుతున్నాడు. ‘బతుకు బస్టాండ్’ అనే సినిమాతో విరాన్ ప్రేక్షకుల ముందుకు రాబోతున్నాడు. ఐవీఆర్ దర్శకత్వం వహిస్తున్న ఈ చిత్రాన్ని కవితా రెడ్డి – కె.మాధవి నిర్మిస్తున్నారు. ఇటీవలే ఈ సినిమా ఫస్ట్ లుక్ కూడా విడుదలైంది. షూటింగ్ చివరి దశలో ఉన్న ఈ చిత్రాన్ని జూన్ 11న సినిమాని రిలీజ్ చేస్తున్నట్లు మేకర్స్ ప్రకటించారు.

అయితే మామ కొడుకైన ముత్తంశెట్టి విరాన్ కు అల్లు అర్జున్ – అల్లు శిరీష్ సపోర్ట్ గా నిలుస్తున్నట్లు తెలుస్తోంది. తాజాగా విరాన్ ముగ్గురు అల్లు బ్రదర్స్ తో కలిసి ఉన్న ఓ ఫోటో సోషల్ మీడియాలో చక్కర్లు కొడుతోంది. ముత్తంశెట్టి మీడియా వారు బన్నీ నటిస్తున్న ‘పుష్ప’ నిర్మాణంలో భాగస్వాములుగా ఉన్న విషయం తెలిసిందే. ఈ క్రమంలో ఇప్పుడు విరాన్ ని హీరోగా నిలబెట్టడానికి తమవంతు మద్దతు తెలుపుతున్నారు. అయితే ఈ బ్యాగ్రౌండ్ అనేది ఇండస్ట్రీలో ఈజీగా ఎంట్రీ ఇవ్వడానికి మాత్రమే ఉపయోగపడుతుంది. ఆ తర్వాత ఎవరికివారే తమ సొంత టాలెంట్ తో ఎదగాల్సి ఉంటుంది. మరి మెగా కాంపౌండ్ నుంచి వస్తున్న ఈ కొత్త హీరో ఇండస్ట్రీలో నిలబడతాడో లేదో చూడాలి.

Related Images: