నజ్రియా ఎంట్రీ అంటే కుర్రమనసుల దోపిడీనే!

అందగత్తెలను ఆలస్యంగా చూడటం కంటే దురదృష్టం మరొకటి లేదు. అలాంటి దురదృష్టవంతులంతా వచ్చే ఏడాదిలో అదృష్టవంతులు కాబోతున్నారు. ఎందుకంటే వచ్చే ఏడాదిలో ‘నజ్రియా నజీమ్’ తెలుగు తెరకి వచ్చేస్తుంది కదా!. నాని కథానాయకుడిగా రూపొందనున్న ‘అంటే సుందరానికి.. !’ అనే సినిమా ద్వారా నజ్రియా నజీమ్ టాలీవుడ్ కి పరిచయం కానుంది. ఇప్పటివరకూ తమిళ .. మలయాళ సినిమాలు మాత్రమే చేస్తూ వచ్చిన ఈ బ్యూటీ వచ్చే ఏడాదిలో వసంతంలా తెలుగు ప్రేక్షకుల ముందుకు రానుంది.

నజ్రియా .. మలయాళ తెరకి బాలనటిగా పరిచయమై ఆ తరువాత కొంత గ్యాప్ ఇచ్చేసి మన ‘మీనా’ మాదిరిగా హీరోయిన్ అయిపోయింది. హీరోయిన్ గా ఈ అమ్మాయిని చూసిన మలయాళీ ప్రేక్షకులు షాక్ అయ్యారు. ఇంతగొప్ప అందాన్ని ఇంతవరకూ చూడలేదంటూ మరింతగా కళ్లప్పగించారు. చురుకుదనంతో .. చలాకీదనంతో .. చామంతుల వంటి కళ్లను చక్రాల్లా తిప్పేస్తూ నజ్రియా గ్లామర్ గారడీ చేసేసింది. తమిళంలో చేసింది తక్కువ సినిమాలే అయినా అక్కడ కూడా ఈ అమ్మాయి కుర్రాళ్ల హృదయాలను లూటీ చేసేసింది.

వివాహమైన తరువాత గ్యాప్ తీసుకున్న ఈ అమ్మాయి మళ్లీ ఈ మధ్యనే రీ ఎంట్రీ ఇచ్చింది. అప్పటికీ ఇప్పటికీ అదే గ్లామర్ అంటూ ఆమె అభిమానులు అదే ఆరాధనను కంటిన్యూ చేస్తున్నారు. ఈ నేపథ్యంలోనే నజ్రియా .. ‘అంటే .. సుందరానికి!’ సినిమాతో తెలుగులోకి ఎంట్రీ ఇస్తోంది. వివేక్ ఆత్రేయ ఈ సినిమాకి దర్శకుడిగా వ్యవహరిస్తున్నాడు. తమిళ .. మలయాళ భాషల్లో నజ్రియా నటించిన సినిమాలు చూసిన తెలుగు కుర్రాళ్లు ‘నీ కోల కళ్లకు నీరాజనాలు .. ఆ వాలు చూపుకు అభివందనాలు’ అంటూ పాడుకున్నారు.

అలాంటి నజ్రియా ఇప్పుడు ఏకంగా తెలుగులోకే ఎంట్రీ ఇస్తోందంటే ఇంకా ఏమైనా ఉందా? వాళ్ల ఉరుకులకు కళ్లెం వేయడం .. వాళ్ల ఊహలపై దుప్పటి కప్పడం చాలా కష్టం. నిజంగానే నజ్రియా గొప్ప అందగత్తె .. అభినయం విషయంలోను ఆమెకి వంకబెట్టలేం. సీరియస్ గా ఆమె టాలీవుడ్ పై దృష్టిపెడితే మాత్రం ఇక్కడ గట్టిపోటీ ఇచ్చే ఛాన్స్ ఉంది. మరి నజ్రియా ఇక్కడ కసితో అడుగుపెడుతుందో .. కాలక్షేపానికి అడుగుపెడుతుందో చూడాలి.

Related Images: