చెవిలో గులిమి.. మీ ఆరోగ్యాన్ని చెప్పేస్తుంది, ఎలాగంటే..

0

మనం బయటకు ఆరోగ్యంగానే కనిపించవచ్చు. కానీ, శరీరంలో మనకు తెలియకుండానే మార్పులు జరుగుతుంటాయి. అవి మంచి కావచ్చు.. లేదా చెడువీ కావచ్చు. మంచి మార్పుల గురించి మనం తెలుసుకోకపోయినా పర్వాలేదు. కానీ, చెడు గురించి తప్పకుండా తెలుసుకోవాలి. ఇందుకు ప్రతిసారి హాస్పిటల్‌కు వెళ్లి పరీక్షలు చేయించుకోవడం కష్టం. ముఖ్యంగా ఈ కరోనా సమయంలో హాస్పిటల్‌కు వెళ్లడమంటే సాహసం చేసినట్లే. అయితే, ఇంట్లో ఉండే మీరు ఆరోగ్యాన్ని చెక్ చేసుకోవచ్చు. అదెలా అనుకుంటున్నారా? మీ చెవి గులిమితో! నమ్మబుద్ధి కావడం లేదా?

శరీరం అనారోగ్యానికి గురవ్వుతున్నప్పుడు చెవిలోని గులిమి కొన్ని సంకేతాలు ఇస్తుందని వైద్య నిపుణులు చెబుతున్నారు. అదెలాగో చూడండి.

❂ చెవుల్లోని గులిమి తీసి శుభ్రం చేసుకుంటున్నా.. మళ్లీ మళ్లీ పెరుగుతుంది. గులిమి ఎక్కువ పరిమాణంలో ఏర్పడుతుంటే తప్పకుండా అనారోగ్య సంకేతమని భావించాలి.
❂ చెవిలో ఉండే గులిమి రంగు సైతం మీ ఆరోగ్య పరిస్థితిని తెలియజేస్తుంది.
❂ చెవిలోని గులిమి బూడిద రంగులో ఉన్నట్లయితే పెద్దగా భయపడాల్సిన అవసరం లేదు.
❂ కాలుష్యం ఎక్కువగా ఉండే.. నగరాల్లో నివసించేవారి చెవిలోని గులిమి ఎక్కువగా బూడిద రంగులో ఉంటుంది.
❂ చెవిలో గులిమి తీసినప్పుడు రక్తం వస్తున్నట్లు అనిపిస్తే కర్ణభేరిలో పగుళ్లు ఏర్పడినట్లు.
❂ కర్ణభేరీలో పగుళ్లు ఇన్ఫెక్షన్‌కు దారి తీస్తాయి. దీనివల్ల వినికిడి కోల్పోయే ప్రమాదం ఉంది. కాబట్టి, వైద్యుడిని సంప్రదించడం ఉత్తమం.
❂ గులిమి గోదుమ రంగులో ఉంటే.. మీరు ఒత్తిడితో ఉన్నారని అర్థం. ఈ సమయంలో ప్రశాంతంగా ఉంటూ ఆరోగ్యాన్ని కాపాడుకోండి.
❂ గులిమి నలుపు రంగులో ఉంటే ఫంగల్ ఇన్ఫెక్షన్‌గా భావించాలి.
❂ నల్లని గులిమి ఉన్నవారికి చెవిలో దురద ఎక్కువగా వస్తుంది. ఈ సమయంలో ఇంటి వైద్యాన్ని నమ్ముకోకుండా వైద్యుడిని సంప్రదించండి.
❂ గులిమి తెలుపు రంగులో ఉంటే శరీరంలో విటమిన్లు, మూలకాలు లోపం ఉన్నట్లు భావించాలి.
❂ ఐరన్, కాపర్ లోపం ఉన్నవారి గులిమి తెలుపు రంగులో ఉంటుంది.

చూశారుగా.. ఈ సంకేతాలను దృష్టిలో పెట్టుకుని జాగ్రత్తగా ఉండండి. చెవిలో రసాయనాలు పోయడం, పిన్నీసులు, తాళం చెవులు పెట్టుకోకండి. ఇయర్ బడ్స్‌తోనే శుభ్రం చేసుకోండి. సొంత వైద్యంపై ఆధారపడకుండా వైద్యుడిని సంప్రదించి సమస్యను ముందుగానే పరిష్కరించుకోండి.