ఒక సూపర్ స్టార్ కథ ఇంకో సూపర్ స్టార్ ద్వారా శింబు వద్దకు..!

యూనివర్శిల్ స్టార్‌ కమల్‌ హాసన్ ఒక వైపు హీరోగా వరుసగా సినిమాలు చేస్తూనే మరో వైపు నిర్మాతగా కూడా సినిమాలు నిర్మిస్తున్నారు. ఇంతకు ముందు తన సొంత సినిమాల నిర్మాణంలో నిర్మాణ భాగస్వామిగా కొనసాగిన కమల్‌ హాసన్‌ ఇప్పుడు ఇతర హీరోలతో బ్యాక్ టు బ్యాక్ సినిమాలను చేస్తున్న విషయం తెల్సిందే.

తాజాగా శింబు హీరోగా దేశింగు పెరియసామి దర్శకత్వంలో ఒక సినిమాను కమల్‌ నిర్మించబోతున్నాడు. ఈ సినిమా కథపై పెద్ద ఎత్తున చర్చ జరుగుతోంది. తమిళ మీడియాలో ఈ సినిమా ను మరో బాహుబలి అంటూ కొందరు ప్రశంసిస్తున్నారు. ఇదే సమయంలో మొదట ఈ కథ ను దర్శకుడు దేశింగు పెరియసామి రాసుకున్నప్పుడు రజినీకాంత్ కోసం అనుకున్నాడట.

రజినీకాంత్‌ ను దృష్టిలో పెట్టుకుని దేశింగు పెరియసామి ఈ కథ ని రూపొందించాడు అంటూ తమిళ మీడియా వర్గాల్లో ప్రచారం జరుగుతోంది. రజినీకాంత్‌ బిజీగా ఉండటం వల్ల కమల్‌ హాసన్ ద్వారా ఈ కథ చివరికి శింబు వద్దకు చేరిందట. కమల్‌ హాసన్‌ కథ పై ఆసక్తి మరియు నమ్మకంతో భారీగా పెట్టుబడి పెట్టేందుకు ముందుకు వచ్చాడట.

ఈ మధ్య కాలంలో శింబు ఒక్క హిట్‌ కొడితే మూడు నాలుగు ఫ్లాప్స్ పడుతున్నాయి. ఇలాంటి సమయంలో ఓ మంచి కథ లభించడంతో పాటు కమల్‌ హాసన్‌ నిర్మాణం అవ్వడం తో కచ్చితంగా హిట్ గ్యారెంటీ అనే టాక్‌ తమిళ మీడియా వర్గాల్లో వినిపిస్తోంది. టైటిల్‌ ఖరారు కాని ఈ సినిమా త్వరలో పట్టాలెక్కబోతుంది. పాన్ ఇండియా సినిమాగా ఈ చిత్రాన్ని విడుదల చేయబోతున్నారట.