Redmi 9ను లాంచ్ చేసిన షియోమీ.. తక్కువ ధరలోనే అదరగొట్టే ఫీచర్లు!

ప్రముఖ స్మార్ట్ ఫోన్ బ్రాండ్ షియోమీ తన బడ్జెట్ ఫోన్ రెడ్ మీ 9ను లాంచ్ చేసింది. మొదటగా ఈ ఫోన్ స్పెయిన్ లో లాంచ్ అయింది. ఈ సిరీస్ ఫోన్లు బాగా పాపులర్ కాబట్టి త్వరలో మిగతా దేశాల్లో కూడా లాంచ్ అయ్యే అవకాశం ఉంది. ఇందులో మీడియాటెక్ హీలియో జీ80 ప్రాసెసర్ ను అందించారు. 5020 ఎంఏహెచ్ బ్యాటరీ కూడా ఇందులో ఉంది. వెనకవైపు నాలుగు కెమెరాల సెటప్ ఇందులో అందుబాటులో ఉంది. వాటర్ డ్రాప్ తరహా డిస్ ప్లే కూడా ఇందులో ఉంది.

ఇక ధర విషయానికి వస్తే.. ఇందులో రెండు వేరియంట్లు అందుబాటులో ఉన్నాయి. వీటిలో మొదటి వేరియంట్ అయిన 3 జీబీ ర్యామ్ + 32 జీబీ స్టోరేజ్ వేరియంట్ ధరను 149 యూరోలుగా(సుమారు రూ.12,800) నిర్ణయించారు. 4 జీబీ ర్యామ్ + 64 జీబీ స్టోరేజ్ వేరియంట్ ధర 179 యూరోలుగా(సుమారు రూ.11,900) ఉంది. దీనికి సంబంధించిన ప్రీఆర్డర్లు జూన్ 15వ తేదీ నుంచి ప్రారంభం కానున్నాయి. సేల్ జూన్ 18వ తేదీన ఆన్ లైన్, ఆఫ్ లైన్ లో ఒకేసారి జరగనుంది. దీన్ని ప్రీఆర్డర్ చేసుకున్న వారికి 10 యూరోలు(సుమారు రూ.900) తగ్గింపు లభించనుంది. కార్బన్ గ్రే, సన్ సెట్ పర్పుల్, ఓషన్ గ్రీన్ రంగుల్లో ఈ ఫోన్ అందుబాటులో ఉండనుంది.

ఇక స్పెసిఫికేషన్ల విషయానికి వస్తే.. ఈ స్మార్ట్ ఫోన్ లో 6.53 అంగుళాల ఫుల్ హెచ్ డీ+ డిస్ ప్లేను అందించారు. స్క్రీన్ రిజల్యూషన్ 2340×1080 పిక్సెల్స్ గా ఉంది. దీని యాస్పెక్ట్ రేషియో 19.5:9గా ఉంది. ఫింగర్ ప్రింట్ సెన్సార్ ను ఫోన్ వెనకవైపు అందించారు. మీడియాటెక్ హీలియో జీ80 ఆక్టాకోర్ ప్రాసెసర్ పై ఈ ఫోన్ పనిచేయనుంది. 4 జీబీ వరకు ర్యామ్, 64 జీబీ వరకు స్టోరేజ్ ను ఇందులో అందించారు. దీన్ని మైక్రో ఎస్ డీ కార్డు ద్వారా పెంచుకునే అవకాశం ఉంది.

ఇందులో వెనకవైపు నాలుగు కెమెరాలను అందించారు. వీటిలో ప్రధాన కెమెరా సామర్థ్యం 13 మెగా పిక్సెల్ గా ఉంది. దీంతో పాటు 8 మెగా పిక్సెల్ అల్ట్రా వైడ్ యాంగిల్ కెమెరా, 5 మెగా పిక్సెల్ మాక్రో సెన్సార్, 2 మెగా పిక్సెల్ డెప్త్ సెన్సార్ లు కూడా ఇందులో ఉన్నాయి. సెల్ఫీల కోసం ముందువైపు 8 మెగాపిక్సెల్ సామర్థ్యమున్న కెమెరాను అందించారు.

దీని బ్యాటరీ సామర్థ్యం 5,020 ఎంఏహెచ్ గా ఉంది. 10W ఫాస్ట్ చార్జింగ్ టెక్నాలజీని ఈ ఫోన్ సపోర్ట్ చేస్తుంది. దీంతోపాటు 4జీ వోల్టే, వైఫై 802.11a/b/g/n/ac, బ్లూటూత్ v5.0, జీపీఎస్, యూఎస్ బీ టైప్-సీ పోర్టు, ఎన్ఎఫ్ సీ, 3.5 ఎంఎం హెడ్ ఫోన్ జాక్ వంటి కనెక్టివిటీ ఫీచర్లు కూడా ఇందులో ఉన్నాయి. వైబ్రేషన్ మోటర్, డిస్టెన్స్ సెన్సార్, యాంబియంట్ లైట్ సెన్సార్, యాక్సెలరో మీటర్, ఎలక్ట్రానిక్ కంపాస్ వంటి సెన్సార్లను కూడా షియోమీ ఇందులో అందించింది.