మీకు నిద్ర సరిపోయిందా.. లేదా.. ఇలా తెలుసుకోండి..

0

ఆహారం, వ్యాయామం, నీటితో పాటూ మన జీవితానికి నిద్ర కూడా ముఖ్యమే. సరైన నిద్ర లేకపొతే మర్నాడు రోజంతా ఎలా ఉంటుందో మనందరికీ తెలిసిన విషయమే. ప్రతి మనిషికీ సరాసరి ఏడుగంటల నిద్ర తప్పనిసరి అని చెబుతున్నారు. ఇది ఒక గంట అటో, ఇటో అయినా పెద్ద నష్టం లేదు. మీరు సరిపోయినంత నిద్రపోతున్నారా లేదా అని తెలుసుకునేందుకు ఒక్కటే మార్గం. మర్నాడు రోజంతా మీకు నిద్ర రాకూడదు, నిద్ర పోవాలనిపించకూడదు, కునుకు తియ్యాలని కూడా అనిపించకపోతే మీకు నిద్ర సరిపోతున్నట్టు.

అయితే, ఎంత సమయం నిద్ర పోతున్నారు అన్న విషయంతో పాటూ, ఎప్పట్నుంచి ఎప్పటి వరకూ నిద్రపోతున్నారు అనేది కూడా ఆరోగ్యం మీద ప్రభావం చూపుతుంది. ఉదాహరణకి, ఒక వ్యక్తి ఏడు గంటలు నిద్రపోతారనుకుందాం. రాత్రి పదింటికి నిద్రపోయి తెల్లవారి ఐదుగంటలకి లేవడం ఒక లెక్క. రాత్రి పన్నెండింటికి నిద్రపోయి పొద్దున్న ఏడుగంటలకి లేవడం ఇంకో లెక్క. అర్ధరాత్రి రెండింటికి పడుకుని పొద్దున్న తొమ్మిదింటికి లేవడం, తెల్లవారుజామున నాలుగింటికి పడుకుని పొద్దున్న పదకొండింటికి లేవడం ఇంకో లెక్క. అన్ని సందర్భాలలోనూ నిద్రపోయిన సమయం ఏడుగంటలే. కానీ, రోజులో ఏ సమయంలో నిద్ర పోయారనేది కూడా చాలా ముఖ్యమైన విషయం. సూర్యోదయానికీ, మనం నిద్రలేచిన సమయానికీ దూరం పెరుగుతున్న కొద్దీ అనారోగ్యానికి మనకి దూరం తగ్గుతుందన్నది అక్షరసత్యం. మిగిలిన అనారోగ్యాలతో పాటూ ఇప్పుడు పరిశోధకులు మరో విషయం కూడా కనుక్కున్నారు. టీనేజ్ పిల్లలు రాత్రి లేట్‌గా పడుకుని పొద్దున్న లేట్‌గా లేస్తుంటే వారు ఎలర్జీల బారిన ఆస్థ్మా బారినపడే అవకాశం చాలా ఎక్కువగా ఉందని తెలిసింది.

ఈ పరిశోధనలో 1684 టీనేజ్ పిల్లలు పాల్గొన్నారు. వారిని ఏ టైమ్‌కి పడుకుంటారు. ఏ టైమ్‌కి లేస్తారు. ఏ టైమ్‌లో చురుగ్గా ఉంటారు. రోజులో ఏ టైమ్‌లో అలసటగా అనిపిస్తుంది, ఏ టైమ్‌లో చదువుకుంటే బాగా అర్ధమవుతుంది లాంటి ప్రశ్నలు వేసి సమాధానాలు రాబట్టారు. ఈ ప్రశ్నలతో పాటు వారు గురక పెడతారా, ఆస్థ్మా ఉందా, తుమ్ములు, జలుబు ఎక్కువగా ఉంటాయా అని కూడా అడిగారు. వీటితో పాటూ పరిశోధకులు ఈ టీనేజ్ పిల్లలు జీవిస్తున్న పరిసరాలను, పరిస్థితులను కూడా సేకరించారు. అంటే, వారి ఫ్యామిలీలో ఎవరైనా స్మోక్ చేస్తారా వంటివి. ఈ వివరాలన్నీ పోల్చి చూస్తే లేట్‌గా పడుకుని లేట్‌గా లేచే టీనేజర్లలో ఆస్థ్మా, అలెర్జీలు వచ్చే అవకాశం మిగిలిన వారి కన్నా మూడు రెట్లు అధికంగా ఉందని తెలిసింది. తెల్లవారి లేట్‌గా లేచినప్పుడు మన బాడీ క్లాక్ కన్‌ఫ్యూజ్ అవుతుంది. దీనివల్లే ఇలాంటివి వచ్చే అవకాశం పెరిగిందనుకోవచ్చు.