రూ.9 వేల లోపే 5000 ఎంఏహెచ్ బ్యాటరీ, నాలుగు కెమెరాలు.. Realme అదిరిపోయే ఫోన్!

భారత స్మార్ట్ ఫోన్ మార్కెట్లో అత్యంత వేగంగా దూసుకెళ్తోన్న బ్రాండ్ రియల్ మీ. కేవలం ఒకే ఒక్క సంవత్సరంలో అమ్మకాల్లో 401 శాతం వృద్ధిని చవిచూసిన రికార్డు రియల్ మీ సొంతం. బడ్జెట్ స్మార్ట్ ఫోన్ల విభాగంలో వినియోగదారుల చూపును అధికంగా ఆకర్షిస్తున్న రెడ్ మీ నోట్ 8, శాంసంగ్ గెలాక్సీ ఎం20లకు పోటీగా రియల్ మీ 5ఐ స్మార్ట్ ఫోన్ ను రియల్ మీ లాంచ్ చేసింది. కేవలం రూ.9 వేలలోపే 5000 ఎంఏహెచ్ బ్యాటరీ, వెనకవైపు నాలుగు కెమెరాలు వంటి అద్భుతమైన ఫీచర్లు ఈ ఫోన్ సొంతం. మరి ఈ ఫోన్ లాంచ్ ఆఫర్లేంటి? దీని ప్రత్యేకతలేంటి?

ధర ఎంత?

ఈ స్మార్ట్ ఫోన్ మనదేశంలో కేవలం ఒకే ఒక్క వేరియంట్లో మాత్రమే లాంచ్ అయింది. 4 జీబీ ర్యామ్ + 64 జీబీ స్టోరేజ్ తో లాంచ్ అయిన ఈ ఫోన్ ధర రూ.8,999గా నిర్ణయించారు. ఆక్వా బ్లూ, ఫారెస్ట్ గ్రీన్ రంగుల్లో ఈ స్మార్ట్ ఫోన్ అందుబాటులో ఉండనుంది. జనవరి 15న ఈ ఫోన్ లాంచ్ కానుంది. దీనికి సంబంధించిన మొదటి సేల్ జనవరి 15న జరగనుంది. ఫ్లిప్ కార్ట్, రియల్ మీ వెబ్ సైట్లలో ఈ ఫోన్ అందుబాటులో ఉండనుంది. రియల్ మీ 5ఐ కొనుగోలు చేసిన జియో వినియోగదారులకు రూ.7,550 విలువైన జియో లాభాలను అందించనున్నారు.

​స్పెసిఫికేషన్లు ఇవే?

ఇందులో 6.52 అంగుళాల హెచ్ డీ+ డిస్ ప్లేను అందించారు. డిస్ ప్లే యాస్పెక్ట్ రేషియో 20:9గా ఉండనుంది. 2.5D కర్వ్ డ్ కార్నింగ్ గొరిల్లా గ్లాస్ 3 ప్రొటెక్షన్ ను అందించారు. ఆక్టాకోర్ క్వాల్ కాం స్నాప్ డ్రాగన్ 665 ప్రాసెసర్ పై ఈ ఫోన్ పనిచేయనుంది. ఆండ్రాయిడ్ 9 Pie ఆధారిత కలర్ ఓఎస్ 6.1 ఆపరేటింగ్ సిస్టంపై ఈ స్మార్ట్ ఫోన్ పనిచేయనుంది.

కెమెరా ఎలా ఉందంటే?

ఫొటోలు, వీడియోల కోసం ఈ స్మార్ట్ ఫోన్ లో వెనకవైపు నాలుగు కెమెరాల సెటప్ ను అందించారు. ఇందులో ప్రధాన కెమెరా సామర్థ్యం 12 మెగా పిక్సెల్ కాగా, 8 మెగా పిక్సెల్ సామర్థ్యమున్న వైడ్ యాంగిల్ లెన్స్, 2 మెగా పిక్సెల్ పొర్ ట్రెయిట్ లెన్స్, మరో 2 మెగా పిక్సెల్ మాక్రో లెన్స్ ను అందించారు. సెల్ఫీ ప్రియుల కోసం ముందు వైపు 8 మెగా పిక్సెల్ కెమెరాను అందించారు.

​మరి మిగతా ఫీచర్లు?

ఇందులో 5,000 ఎంఏహెచ్ సామర్థ్యమున్న బ్యాటరీని అందించారు. 10W ఫాస్ట్ చార్జింగ్ ఫీచర్ కూడా ఇందులో ఉంది. కనెక్టివిటీ విషయానికి వస్తే.. 4జీ వోల్టే, వైఫై, బ్లూటూత్ 5.0, జీపీఎస్/ఏ-జీపీఎస్, మైక్రో-యూఎస్ బీ, 3.5 ఎంఎం హెడ్ ఫోన్ జాక్ వంటి ఫీచర్లు కూడా ఉన్నాయి. యాక్సెలరో మీటర్, యాంబియంట్ లైట్, గైరోస్కోప్, ప్రాక్సిమిటీ సెన్సార్ వంటి ఫీచర్లు కూడా ఉన్నాయి. వెనకవైపు ఫింగర్ ప్రింట్ సెన్సార్ ను అందించారు. ఈ ఫోన్ బరువు 195 గ్రాములుగా ఉంది.