నాగబాబుకి ప్రకాష్ రాజ్ కౌంటర్..!

గ్రేటర్ హైదరాబాద్ ఎన్నికల నేపథ్యంలో విలక్షణ నటుడు ప్రకాష్ రాజ్ – మెగా బ్రదర్ నాగబాబు మధ్య మాటల యుద్ధం మొదలైంది. ఇటీవల ఓ ఇంటర్వ్యూలో ప్రకాశ్ రాజ్ మాట్లాడుతూ జనసేన అధ్యక్షుడు పవన్ కల్యాణ్ జీహెచ్ఎంసీ ఎన్నికల్లో బీజేపీ కి మద్దతు ప్రకటించడం తనకు నచ్చలేదని.. అభిప్రాయం వ్యక్తం చేసిన సంగతి తెలిసిందే. ‘2014లో మీరే బీజేపీ వాళ్లు ఇంద్రుడు చంద్రుడు అన్నారు. మళ్లీ గత ఎన్నికల్లో లేదు వాళ్లు ద్రోహులు అన్నారు. మళ్లీ ఇప్పుడు వీళ్లే నాయకులుగా కనిపిస్తున్నారు. అంటే ఇలా మూడు నాలుగు సార్లు మారుతున్నారంటే.. మీరు ఊసరవెల్లి అయి ఉండాలి కదా’ అని ప్రకాష్ రాజ్ వ్యాఖ్యానించారు. అయితే పవన్ ని ఏదైనా అంటే ఒంటి కాలిపై లేచొచ్చే సోదరుడు నాగబాబు ఆయన వ్యాఖ్యలపై ఘాటుగా స్పందించారు.

‘పవన్ కళ్యాణ్ జీహెచ్ఎంసీ ఎన్నికల్లో బీజేపీకి మద్దతు తెలపడం వెనుక విస్తృత ప్రయోజనాలు ఉన్నాయని నా నమ్మకం. పవన్ కళ్యాణ్ ఎవరికి ద్రోహం చేశాడని ప్రతి పనికిమాలినవాడు విమర్శిస్తున్నాడు. మిస్టర్ ప్రకాష్ రాజ్.. నీ డొల్లతనం ఏంటో బీజేపీ ఎంపీ సుబ్రహ్మణ్యస్వామి డిబేట్ లోనే అర్థం అయ్యింది. సుబ్రహ్మణ్య స్వామి నిన్ను తొక్కి నారతీస్తుంటే మాట్లాడలేక తడబడటం నాకు ఇంకా గుర్తుంది. నిర్మాతలని డబ్బు కోసం ఎన్ని రకాలుగా హింస పెట్టావో.. డేట్స్ ఇచ్చి రద్దు చేసి ఎంత హింసకు గురిచేశావో అన్నీ గుర్తున్నాయి. ముందు నువ్వు మంచి మనిషిగా మారు. ఆ తర్వాత మాట్లాడు. డైరెక్టర్స్ ని కాకా పట్టి నిర్మాతలను కాల్చుకు తినే నీకు ఇంత కంటే మంచిగా మాట్లాడడం ఏమి తెలుసు. మీడియా అడిగింది కదాని ఒళ్లు పొంగి నీ పనికి మాలిన రాజకీయ డొల్లతనాన్ని బయట వేసుకోకు” అని నాగబాబు ట్విట్టర్ లో పోస్ట్ చేసాడు. నాగబాబు ట్వీట్ పై ప్రకాష్ రాజ్ ట్విట్టర్ వేదికగా స్పందించారు.

అయితే ప్రకాష్ రాజ్.. నాగబాబు లా కాకుండా తనదైన కౌంటర్ ఇచ్చారు. నాకు తెలుగు వచ్చు.. కానీ మీ భాష రాదంటూ నాగబాబు అభ్యంతరకర వ్యాఖ్యలపై వ్యంగ్యాస్త్రాలు విసిరారు. ”గౌరవనీయులైన నాగబాబు గారికి.. మీ తమ్ముడి మీద మీకున్న ప్రేమ నాకు అర్థమైంది. నాకు దేశం మీద ఉన్న ప్రేమను మీరు అర్థం చేసుకోండి. నాకు తెలుగు భాష వచ్చు. కానీ మీ భాష రాదు” అంటూ ప్రకాష్ రాజ్ తెలుగులో ట్వీట్ చేశారు. దీనికి #Justasking అనే హ్యాష్ ట్యాగ్ తో నాగబాబు ని ట్యాగ్ చేసిన ప్రకాష్.. దండాలు పెడుతున్న ఎమోజీలు ఉంచాడు. మరి దీనిపై మెగా బ్రదర్ స్పదిస్తారా లేదా సైలెంటుగా ఉంటారా అనేది చూడాలి.

Related Images: